Levitiko

11 Yehova a amba na Mushe na Aroni a ri: 2 “Vhudza Vhaisiraele u ri: ‘Zwivhumbiwa zwi tshilaho zwi re kha ḽifhasi zwine na nga zwi ḽa ndi hezwi:+ 3 Zwipuka zwoṱhe zwi re na khwanḓa dzo fhandekanaho na zwine zwa dzeula zwi nga ḽiwa.

4 “‘Fhedzi a no ngo tea u ḽa hezwi zwipuka zwine zwa dzeula kana zwi re na khwanḓa dzo fhandekanaho: gamela i a dzeula, fhedzi a i na khwanḓa dzo fhandekanaho. I na tshika.+ 5 Na mbila+ ngauri i a dzeula, fhedzi a i na khwanḓa dzo fhandekanaho. I na tshika. 6 Na muvhuḓa, ngauri u a dzeula, fhedzi a u na khwanḓa dzo fhandekanaho. U na tshika. 7 Na nguluvhe,+ ngauri khwanḓa dzayo dzo fhandekana, fhedzi a i dzeuli. I na tshika. 8 A no ngo tea u ḽa ṋama yazwo kana u kwama mitumbu yazwo. Zwi na tshika.+

9 “‘Zwine na nga zwi ḽa kha zwiṅwe na zwiṅwe zwi re maḓini ndi hezwi: Tshiṅwe na tshiṅwe tshi re maḓini tshine tsha vha na khwea na makwanda, hu sa londwi uri ndi zwa lwanzheni kana milamboni, zwenezwo ni nga zwi ḽa.+ 10 Tshiṅwe na tshiṅwe tshi re lwanzheni na milamboni tshi si na khwea na makwanda, kha zwoṱhe zwivhumbiwa zwi tshatshamaho na zwivhumbiwa zwoṱhe zwi tshilaho zwi re maḓini, zwi a nengisa. 11 Zwi fanela u ni nengisa, a no ngo tea u ḽa ṋama yazwo,+ ni tea u nengwa mitumbu yazwo. 12 Zwoṱhe zwi re maḓini zwi si na khwea na makwanda zwi fanela u ni nengisa.

13 “‘Hezwi ndi zwivhumbiwa zwi fhufhaho zwine na fanela u zwi nengwa; zwine ni si fanele u zwi ḽa ngauri zwi a nengisa: goni,+ lurwanzhivha, ḽianga,+ 14 lurwanzhivha lutswuku na mifuda yoṱhe ya lurwanzhivha lutswu, 15 mafunguvhu a mifuda yoṱhe, 16 mphwe, gwitha, begwa, mifuda yoṱhe ya ṱhamba-lwanzhe, 17 kugwitha, dandila, gwitha ḽihulu, 18 sekwa, ḽiṋulakhovhe, ḽianga, 19 ḽiovhelwa, mifuda yoṱhe ya maṋula-khovhe, khororo na nyamulemalema. 20 Zwikhokhonono zwoṱhe zwi re na phapha zwine zwa tshimbila nga milenzhe miṋa zwi fanela u ni nengisa.

21 “‘Kha zwikhokhonono zwi re na phapha zwi tshatshamaho zwine zwa tshimbila nga milenzhe miṋa, ni nga ḽa zwine zwa vha na milenzhe ya u thamuwa fhedzi. 22 Ni nga ḽa hezwi: nzie tshikume dza mifuda yoṱhe, dziṅwe nzie dzi ḽiwaho,+ dziṱhonono na madone. 23 Zwiṅwe zwikhokhonono zwoṱhe zwi re na phapha zwi tshatshamaho zwine zwa tshimbila nga milenzhe miṋa ni fanela u zwi nengwa. 24 Zwenezwi zwi ḓo ita uri ni vhe na tshika. Ane a kwama mitumbu yazwo u ḓo vha na tshika u swika ḽi tshi kovhela.+ 25 Ane a hwala mitumbu yazwo u fanela u kuvha zwiambaro zwawe;+ u ḓo vha na tshika u swika ḽi tshi kovhela.

26 “‘Tshipuka tshine tsha vha na khwanḓa dzo fhandekanaho, tshi sa dzeuli tshi na tshika. Ane a tshi kwama u ḓo vha na tshika.+ 27 Tshivhumbiwa tshi tshilaho tshine tsha tshimbila nga marimba vhukati ha zwivhumbiwa zwi tshimbilaho nga milenzhe miṋa tshi na tshika. Ane a kwama mitumbu yazwo u ḓo vha na tshika u swika ḽi tshi kovhela. 28 Ane a hwala mitumbu yazwo u fanela u kuvha zwiambaro zwawe,+ u ḓo vha na tshika u swika ḽi tshi kovhela.+ Zwi na tshika.

29 “‘Zwivhumbiwa zwi re na tshika zwi tshatshamaho kha ḽifhasi ndi hezwi: mbevha i si na mamvele, mbevha,+ mifuda yoṱhe ya tswina, 30 tshikwavhavha, mbulu-maḓi, tshivhululu, gwavhavha na luaviavi. 31 Hezwo ndi zwivhumbiwa zwi re na tshika.+ Ane a kwama mitumbu yazwo u ḓo vha na tshika u swika ḽi tshi kovhela.+

32 “‘Tshiṅwe na tshiṅwe tshine tsha wela khatsho musi tshi tshi fa tshi ḓo vha na tshika, hu sa londwi uri ndi tshishumiswa tsho vhaḓwaho, tshiambaro, lukanda kana dzanganda. Tshishumiswa naho tshi tshifhio tshine tsha shumiswa tshi fanela u ṱanzwiwa nga maḓi, tshi ḓo vha na mashika u swika ḽi tshi kovhela; nga murahu tshi ḓo vha tsho kunaho. 33 Arali zwa wela kha mudzio wa vumba, ni fanela u u kwasha, tshiṅwe na tshiṅwe tshe tsha vha tshi khawo tshi ḓo vha na tshika.+ 34 Zwiḽiwa zwa mifuda yoṱhe zwine zwa shelwa nga maḓi a bvaho kha wonoyo mudzio zwi ḓo vha na tshika na zwiṅwe na zwiṅwe zwa luḓi zwi re kha wonoyo mudzio zwi ḓo vha na tshika. 35 Tshiṅwe na tshiṅwe tshine mitumbu yazwo ya wela khatsho tshi ḓo vha na tshika. Hu sa londwi uri ndi honndo kana ndi tshivhaso tshiṱuku, tshi fanela u kwashiwa. Zwi na tshika, zwi ḓo dzula zwi na tshika. 36 Ndi tshisima na milonga ya maḓi zwine zwa ḓo dzula zwo kuna, fhedzi ane a kwama mitumbu yazwo u ḓo vha na tshika. 37 Arali mitumbu yazwo ya wela kha mbeu ine ya ḓo ṱavhiwa, a i na tshika. 38 Fhedzi arali mitumbu yazwo ya wela kha mbeu yo lovhewaho, yeneyo mbeu i na tshika.

39 “‘Arali tshipuka tshine tsha ḽiwa tsha fa, ane a kwama mutumbu watsho u ḓo vha na tshika u swika ḽi tshi kovhela.+ 40 Ane a ḽa ṋama ya mutumbu watsho u fanela u kuvha zwiambaro zwawe, u ḓo vha na tshika u swika ḽi tshi kovhela.+ Ane a hwala mutumbu watsho u fanela u kuvha zwiambaro zwawe, u ḓo vha na tshika u swika ḽi tshi kovhela. 41 Zwivhumbiwa zwoṱhe zwi tshatshamaho kha ḽifhasi zwi a nengisa.+ A zwo ngo tea u ḽiwa. 42 A no ngo tea u ḽa tshivhumbiwa naho tshi tshifhio tshine tsha kokovha nga thumbu yatsho, zwikhokhonono zwoṱhe zwine zwa tshimbila nga milenzhe miṋa kana zwivhumbiwa zwoṱhe zwine zwa tshatshama kha ḽifhasi zwi re na milenzhe minzhi, ngauri zwi na tshika.+ 43 Ni songo ḓishata tshika nga zwivhumbiwa zwoṱhe zwi tshatshamaho, ni songo ḓishata tshika ngazwo.+ 44 Ngauri ndi nṋe Yehova Mudzimu waṋu,+ ni fanela u ḓikhetha ni vhe vhakhethwa,+ ngauri nṋe ndi mukhethwa.+ Nga zwenezwo, ni songo ḓishata tshika nga zwivhumbiwa zwoṱhe zwi tshatshamaho kha ḽifhasi. 45 Ngauri ndi nṋe Yehova we a ni bvisa shangoni ḽa Egipita nda sumbedza uri ndi Mudzimu waṋu,+ ni tea u vha vhakhethwa,+ ngauri ndi mukhethwa.+

46 “‘Hoyu ndi wone mulayo nga ha zwipuka, zwivhumbiwa zwi fhufhaho, zwivhumbiwa zwoṱhe zwi tshilaho zwine zwa tala maḓini na zwivhumbiwa zwoṱhe zwi tshatshamaho kha ḽifhasi, 47 uri ni kone u khethekanya vhukati ha zwi re na tshika na zwo kunaho na vhukati ha zwivhumbiwa zwi tshilaho zwine zwa nga ḽiwa na zwi songo teaho u ḽiwa.’”+