Evangeli Ya Mateo
19 Musi Yesu o no fhedza u amba eneo mafhungo, a ṱuwa Galilea a ya mikanoni ya Yudea seli ha Mulambo wa Yorodane.+ 2 Vhathu vhanzhi vha mu tevhela, a vha fhodza henefho.
3 Vhafarisei vha ḓa kha Yesu uri vha mu linge, vha mu vhudzisa vha ri: “Naa zwo tendelwa uri munna a ṱale mufumakadzi wawe nga tshiitisi naho tshi tshifhio?”+ 4 A fhindula a ri: “Naa a no ngo vhala uri we a vha sika u thomani o vha sika vhe munna na mufumakadzi?+ 5 Ndi ngazwo o ri: ‘Munna u ḓo sia khotsi awe na mme awe a nambatela mufumakadzi wawe, vhuvhili havho vha vha ṋama nthihi.’+ 6 Ngauralo, a vha tsha ḓo vha vhavhili, fhedzi vha ḓo vha ṋama nthihi. Zwo vhofhekanywaho nga Mudzimu muthu a songo zwi fhandekanya.”+ 7 Vha ri: “Ndi ngani Mushe o amba uri mufumakadzi a ṋewe luṅwalo lwa u mu pandela na u mu ṱala?”+ 8 A vha fhindula a ri: “Mushe o ni tendela ni tshi ṱala vhafumakadzi+ vhaṋu ngauri mbilu dzaṋu dzo rindila, fhedzi mathomoni zwo vha zwi songo ralo.+ 9 Ndi a ni vhudza uri ane a ṱala mufumakadzi wawe, hu si ngauri o ḓifara luvhi nga zwa vhudzekani,* a vhinga muṅwe u ita vhupombwe.”+
10 Vhafunziwa vhawe vha amba nae vha ri: “Arali u vha mbinganoni zwo tou rali, ndi khwine muthu a sa vhingi.” 11 A amba navho a ri: “A si vhathu vhoṱhe vhane vha kona u ita nga u ralo, fhedzi ndi vhane vha vha na tshifhiwa.+ 12 Ngauri hu na khombe dze dza bebwa dzi khombe, hu na khombe dze dza itwa khombe nga vhathu, hu na khombe dze dza ḓiita khombe dzi tshi itela Muvhuso wa ṱaḓulu. Ane a nga kona u dzula e siho mbinganoni, nga a ite nga u ralo.”+
13 Nga tshenetsho tshifhinga, ha ḓiswa vhana khae uri a vha vhee zwanḓa na u vha rabelela, fhedzi vhafunziwa vhawe vha vha kaidza.+ 14 Naho zwo ralo, Yesu a ri: “Litshani vhana vha ḓe kha nṋe, ni songo vha thivhela, ngauri Muvhuso wa ṱaḓulu ndi wa vhane vha nga vhenevha.”+ 15 O no vha fhaṱutshedza,* a ṱuwa.
16 Muṅwe muṱhannga a ḓa a amba nae a ri: “Mufunzi, ndi zwithu zwifhio zwavhuḓi zwine nda tea u zwi ita uri ndi wane vhutshilo vhu sa fheli?”+ 17 Yesu a ri: “Ndi ngani u tshi mmbudzisa nga ha zwine zwa vha zwavhuḓi? Wavhuḓi ndi muthihi fhedzi.+ Arali u tshi ṱoḓa u wana vhutshilo, dzula u tshi tevhedza zwine milayo ya amba.”+ 18 A vhudzisa Yesu a ri: “Yeneyo milayo ndi ifhio?” Yesu a ri: “U songo vhulaya;+ u songo vha phombwe;+ u songo tswa;+ u songo amba vhuṱanzi ha u zwifha,+ 19 hulisa khotsi au na mme au;+ na une wa ri, u tea u funa muhura wau vhunga u tshi ḓifuna.”+ 20 Ene a ri: “Hezwo zwoṱhe ndo zwi ita; hu tshee ho sala mini?” 21 Yesu a amba nae a ri: “Arali u tshi ṱoḓa u vha o fhelelaho, tshimbila u rengise thundu dzau u ṋee vhashai, ndi hone u tshi ḓo vha na lupfumo ngei ṱaḓulu;+ u ḓe u ntevhele.”+ 22 Musi muṱhannga a tshi pfa zwenezwo, a ṱuwa o ṱungufhala, ngauri o vha e na thundu nnzhi.+ 23 Yesu a amba na vhafunziwa vhawe a ri: “Ngoho ndi a ni vhudza uri, zwi ḓo konḓa uri mupfumi a dzhene Muvhusoni wa ṱaḓulu.+ 24 Ndi dovha nda ri, zwi ḓo konḓela mupfumi u dzhena Muvhusoni wa Mudzimu, zwi ḓo tou nga gamela i tshi lingedza u dzhena nga lubuli lwa ṋeleṱe.”+
25 Musi vhafunziwa vhawe vha tshi pfa zwenezwo vha mangala zwihulu, vha ri: “Ndi nnyi ane a nga tshidzwa?”+ 26 Yesu a vha lavhelesa a ri: “Hezwi vhathu a vha zwi koni, fhedzi a hu na tshine Mudzimu a si tshi kone.”+
27 Petro a ri: “Ro sia zwoṱhe ra u tevhela; zwino ri ḓo wana mini?”+ 28 Yesu a ri, “Ngoho ndi a ni vhudza ndi ri, musi zwithu zwo no sikwa nga huswa, Murwa muthu a tshi dzula kha khuluṋoni yawe ya vhugala, inwi vhe na ntevhela ni ḓo dzula kha khuluṋoni dza 12 na haṱula tshaka dza 12 dza Isiraele.+ 29 Vhoṱhe vhe vha sia nnḓu dzavho, vharathu kana vhakomana kana khaladzi kana khotsi kana mme kana vhana kana masimu vha tshi itela dzina ḽanga, vha ḓo wana zwithu zwinzhi u fhira zwe vha zwi sia, vha ḓo wana na vhutshilo vhu sa fheli.+
30 “Fhedzi vhanzhi vhane vha vha vha u thoma vha ḓo vha vha u fhedza, vha u fhedza vha vha vha u thoma.+