Levitiko

19 Yehova a dovha a amba na Mushe a ri: 2 “Amba na tshitshavha tshoṱhe tsha Vhaisiraele, u ri: ‘Ni tea u vha vhakhethwa, ngauri nṋe Yehova Mudzimu waṋu ndi mukhethwa.+

3 “‘Muṅwe na muṅwe a ṱhonifhe* mme awe na khotsi awe,+ ni tevhedze Savhatha dzanga.+ Ndi nṋe Yehova Mudzimu waṋu. 4 Ni songo pambutshela kha midzimu+ i sa vhuyedzi tshithu kana na ḓiitela midzimu nga tsimbi yo ṋokiswaho.+ Ndi nṋe Yehova Mudzimu waṋu.

5 “‘Arali ni tshi ṋekedza Yehova tshiṱhavhelo tsha u pfumedzana,+ ni tshi ṋekedze nga nḓila ine a ḓo ni takalela.+ 6 Tshi ḽiwe nga ḓuvha ḽine na tshi ṋekedza ngaḽo na nga ḓuvha ḽi tevhelaho, fhedzi zwo salaho nga ḓuvha ḽa vhuraru zwi fhiswe nga mulilo.+ 7 Arali tsha ḽiwa nga ḓuvha ḽa vhuraru, tshi na tshika, a tshi nga takalelwi. 8 Ane a tshi ḽa u ḓo ḓifhindulela kha vhukhakhi hawe, ngauri o tshikafhadza tshithu tshikhethwa tsha Yehova, onoyo a vhulawe.

9 “‘Musi ni tshi kaṋa masimu aṋu, ni songo kaṋa na guma nga mukano, ni songo ṱala ṱhalane.*+ 10 Zwiṅwe hafhu, ni songo kuvhanganya zwo salaho tsimuni yaṋu ya minḓirivhe kana u doba nḓirivhe dzo waho tsimuni yaṋu. Ni dzi siele vhashai*+ na vhatsinda. Ndi nṋe Yehova Mudzimu waṋu.

11 “‘Ni songo tswa,+ ni songo fhura,+ ni songo zwifhelana. 12 Ni songo ana mazwifhi nga dzina ḽanga,+ na tshikafhadza dzina ḽa Mudzimu waṋu. Ndi nṋe Yehova. 13 U songo fhura muṅwe muthu,+ u songo mu dzhiela thundu dzawe.+ U songo lala u songo holela muthu we wa mu thola.+

14 “‘U songo sema muthu o dzingaho nḓevhe kana u vhea tshithu phanḓa ha muthu a sa vhoni uri a khukhulwe,+ u ofhe Mudzimu wau.+ Ndi nṋe Yehova.

15 “‘Ni haṱule nga u fhulufhedzea. Ni songo ṱalula mushai kana na takalela mupfumi.+ Ni haṱule muṅwe muthu nga nḓila yo teaho.

16 “‘U songo tshimbila u tshi tshinya vhaṅwe dzina kha vhahau.+ U songo vhulayisa muṅwe muthu.*+ Ndi nṋe Yehova.

17 “‘U songo vhenga wahau mbiluni yau.+ U kaidze muṅwe muthu,+ uri u si ṱanganele kha tshivhi tshawe.

18 “‘U songo lifhedza+ kana u fara nga mbilu vhathu vhahau, u tea u funa muṅwe muthu vhunga u tshi ḓifuna.+ Ndi nṋe Yehova.

19 “‘U tevhedze haya maitele anga: U songo ṱanganyisa zwifuwo zwa mifuda mivhili. U songo zwala mbeu dza mifuda mivhili tsimuni yau,+ u songo ambara tshiambaro tsho rungwaho nga harane dza mifuda mivhili yo ṱanganyiswaho.+

20 “‘Arali munna a ita zwa vhudzekani na mufumakadzi, onoyo mufumakadzi e mushumeli o vhetshelwaho muṅwe munna, fhedzi a sa athu u rengululwa kana u vhofhololwa, vha pfiswe vhuṱungu. Naho zwo ralo, vha songo vhulawa, ngauri mufumakadzi onoyo o vha a sa athu u vhofhololwa. 21 A ḓise tshifhiwa tshawe tsha u pfumelela mulandu kha Yehova muṋangoni wa dennde ḽa muṱangano, tshine tsha vha thutha ya tshifhiwa tsha u pfumelela mulandu.+ 22 Tshifhe a mu itele tshipfumelelo nga thutha ya tshifhiwa tsha u pfumelela mulandu phanḓa ha Yehova a tshi itela tshivhi tshe a tshi ita, ndi hone a tshi ḓo hangwelwa tshivhi tshe a tshi ita.

23 “‘Musi ni tshi swika kha ḽeneḽo shango, na ṱavha muri naho u ufhio wa mutshelo, ni tea u dzhia na yeneyo mitshelo i na tshika i songo tea u ḽiwa. Ni i iledze miṅwaha miraru. I songo ḽiwa. 24 Fhedzi nga ṅwaha wa vhuṋa, mitshelo yawo yoṱhe i ḓo vha mikhethwa, ni ḓo i ṋea Yehova no takala.+ 25 Nga ṅwaha wa vhuṱanu ni nga ḽa mitshelo yawo, mitshelo yawo i ḓo engedzea. Ndi nṋe Yehova Mudzimu waṋu.

26 “‘Ni songo ḽa tshithu tshi re na malofha.+

“‘Ni songo ita zwa u bvumba vhumatshelo kana u shumisa zwithu zwa manditi.+

27 “‘Ni songo vheula* mavhudzi a re nga matungo a ṱhoho dzaṋu kana u ṱunya ndebvu dzaṋu.+

28 “‘Ni songo ḓitshea muvhili ni tshi itela vho faho+ kana u ḓiola thathuu.* Ndi nṋe Yehova.

29 “‘U songo nyadzisa ṅwananyana wau nga u mu ita uri a rengise muvhili,+ uri shango ḽi si ite zwa u rengisa muvhili, ha ḓala vhuḓifari vhu si havhuḓi.+

30 “‘Ni tevhedze savhatha dzanga,+ ni ofhe nnḓu khethwa yanga. Ndi nṋe Yehova.

31 “‘Ni songo pambutshela kha mingome,+ ni songo ya kha vhabvumbi+ uri ni sa ḓo tshikafhadzwa ngazwo. Ndi nṋe Yehova Mudzimu waṋu.

32 “‘U ḓiṱukufhadze phanḓa ha mmvi,+ u ṱhonifhe mualuwa,+ u ofhe Mudzimu wau.+ Ndi nṋe Yehova.

33 “‘Arali ni tshi dzula na mutsinda shangoni ḽaṋu, ni songo mu fara luvhi.+ 34 Mutsinda ane a dzula na inwi a nge mudzulapo vhukati haṋu;+ ni mu fune vhunga ni tshi ḓifuna, ngauri na inwi no vha ni vhatsinda shangoni ḽa Egipita.+ Ndi nṋe Yehova Mudzimu waṋu.

35 “‘Ni songo shumisa zwikalo zwa vhufhura musi ni tshi kala vhulapfu, tshileme kana midzio.+ 36 Ni shumise zwikalo zwa vhukuma, tshileme tsha vhukuma, tshikalo tsha vhukuma tsha zwithu zwi si zwa luḓi* na zwa luḓi.*+ Ndi nṋe Yehova Mudzimu waṋu, we a ni bvisa shangoni ḽa Egipita. 37 Ni tevhedze maitele anga oṱhe na mahaṱulele anga oṱhe, ni zwi tevhele.+ Ndi nṋe Yehova.’”