Dotoronomio
18 “Vhotshifhe vha Vhalevi na lushaka lwoṱhe lwa Levi, a vha nga vhi na mukovhe kana ifa u fana na Isiraele. Vha ḓo ḽa zwifhiwa zwi fhiselwaho Yehova, zwine zwa vha ifa ḽawe.+ 2 Nga zwenezwo, a vho ngo fanela u vha na ifa u fana na vhahavho. Yehova ndi ifa ḽavho, sa zwe a vha vhudza.
3 “Zwine vhathu vha fanela u dzula vha tshi ṋea vhotshifhe ndi hezwi: Ane a ṋekedza tshiṱhavhelo, hu sa londwi uri ndi kholomo kana nngu, a ṋee tshifhe tshiakha, ṱhaha na zwa thumbuni. 4 U mu ṋee zwiranzhe zwa goroi, waini yau ntswa, mapfura au na wuḽu ya u thoma u vheulwa kha nngu dzau.+ 5 Yehova Mudzimu wau o nanga ene na vharwa vhawe kha tshaka dzoṱhe uri vha dzule vhe vhaḓinḓa dzinani ḽa Yehova.+
6 “Arali Mulevi a pfuluwa kha muḓi wa Isiraele we a vha a tshi dzula khawo,+ a tshi tama u ya fhethu he Yehova a hu nanga,+ 7 a nga vha muḓinḓa henefho dzinani ḽa Yehova Mudzimu wawe u fana na Vhalevi vhahawe vhoṱhe, vho imaho phanḓa ha Yehova.+ 8 Ene u ḓo wana mukovhe wa zwiḽiwa u linganaho na wavho,+ nga nnḓa ha zwe a zwi wana musi a tshi rengisa thundu dza vhomakhulukuku wawe.
9 “Musi wo no dzhena shangoni ḽine Yehova Mudzimu wau a khou u ṋea ḽone, a wo ngo tea u edzisa zwithu zwi nengisaho zwine zwa itwa nga dzenedzo tshaka.+ 10 Hu songo vha na ane a posa murwa wawe kana ṅwananyana wawe muliloni,+ ane a tungula,+ ane a ita zwa manditi,+ ane a bvumba,+ ane a lowa,+ 11 ane a huvhadza vhaṅwe nga mishonga, ane a ya kha mungome,+ mubvumbi+ kana ane a vhudzisa vhafu.+ 12 Ngauri Yehova u a nengiswa nga ane a ita zwenezwi zwithu, nga nṱhani ha zwenezwi zwiito zwi nengisaho Yehova Mudzimu wau u khou vha pandela phanḓa hau. 13 U songo vha na mulandu phanḓa ha Yehova Mudzimu wau.+
14 “Ngauri dzenedzi tshaka dzine wa khou dzi dzhiela mashango dzo vha dzi tshi thetshelesa vhane vha ita zwa manditi+ na zwa u bvumba,+ fhedzi Yehova Mudzimu wau ho ngo u tendela uri u ite zwithu zwo raloho. 15 Yehova Mudzimu wau u ḓo u vusela muporofita ane a nga nṋe vhukati ha vhahau. U mu thetshelese.+ 16 Zwenezwi ndi nga nṱhani ha zwe wa humbela Yehova Mudzimu wau ngei Horebe nga ḓuvha ḽe na vha no kuvhangana+ musi ni tshi ri: ‘U songo tenda ndi tshi pfa ipfi ḽa Yehova Mudzimu wanga kana uri ndi dovhe ndi vhone wonoyu mulilo muhulu uri ndi si fe.’+ 17 Yehova a amba na nṋe a ri: ‘Zwe vha amba ndi zwavhuḓi. 18 Ndi ḓo vha vusela muporofita ane a nga iwe vhukati havho,+ maipfi anga ndi ḓo a dzhenisa mulomoni wawe,+ u ḓo vha vhudza zwoṱhe zwine nda mu laya.+ 19 Ndi ḓo sengisa ane a si thetshelese maipfi anga ane onoyo muporofita a ḓo a amba dzinani ḽanga.+
20 “‘Arali muporofita naho e ufhio a amba dzinani ḽanga nga u ḓihudza zwe ndi si mu laedze uri a zwi ambe kana a amba dzinani ḽa miṅwe midzimu, onoyo muporofita u tea u fa.+ 21 Naho zwo ralo, mbiluni yau u nga amba wa ri: “Ri ḓo zwi ḓivha hani arali eneo maipfi a songo ambiwa nga Yehova?” 22 Musi muporofita a tshi amba dzinani ḽa Yehova zwi si itee, Yehova u ḓo vha a songo zwi amba. Muporofita o zwi amba nga u ḓihudza. U songo mu ofha.’