Ekisoda

28 “Kha Vhaisiraele u vhidze Aroni mukomana wau, khathihi na vharwa vhawe, uri vha vhe vhotshifhe vhanga,+ vhenevho ndi Aroni+ na vharwa vhawe,+ Nadaba, Abihu,+ Eliasara na Ithamara.+ 2 U itele Aroni mukomana wau zwiambaro zwikhethwa zwa vhugala zwo nakaho.+ 3 U ambe na vhoṱhe vha re na vhutsila* vhe nda vha ḓadza nga muya wa vhuṱali,+ vha ḓo ita zwiambaro zwa Aroni uri a vhe mukhethwa uri a shume sa tshifhe wanga.

4 “Zwiambaro zwine vha fanela u mu itela zwone ndi hezwi: tsha u vhea khanani,+ efodo,*+ tshiambaro tshi si na zwanḓa,+ tshiambaro tsha tshikotshi, dugu+ na bannda;+ vha fanela u itela Aroni mukomana wau na vharwa vhawe zwenezwi zwiambaro zwikhethwa, uri a shume sa tshifhe wanga. 5 Vhashumi vha re na vhutsila vha shumise musuku na harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene.

6 “Vha ite efodo nga musuku, harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene ḽo lukwaho, i khavhiswe.+ 7 Yeneyo efodo i vhe na malabi mavhili o rungelelwaho kha mashaḓa ane a ḓo ṱumekanywa lumemeni u itela u ṱanganyisa eneo malabi mavhili. 8 Bannda* ḽayo ḽo lukwaho+ ḽo ṱumiwaho na efodo u itela u i vhofha zwavhuḓi, ḽi fanela u itwa nga zwithu zwe zwa ita efodo, zwine zwa vha: musuku, harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene ḽo lukwaho.

9 “U dzhie matombo mavhili a onikisi+ u kore madzina a vharwa vha Isiraele,+ 10 madzina a rathi kha tombo ḽiṅwe na madzina a rathi kha ḽiṅwe tombo, u ya nga u tevhekana ha kubebelwe kwavho. 11 Mutsila wa u kora matombo u fanela u kora madzina a vharwa vha Isiraele kha matombo mavhili u fana na musi a tshi kora luswayo.+ A tingeledzwe nga musuku. 12 U vhee matombo mavhili kha malabi o rungelelwaho kha mahaḓa a efodo, eneo matombo a ḓo vha tshihumbudzi kha vharwa vha Isiraele,+ Aroni a hwale eneo madzina phanḓa ha Yehova nga malabi mavhili o rungelelwaho kha mahaḓa sa tshihumbudzi. 13 U ite lupendelo nga musuku 14 na ngeḓane mbili dza musuku vhukuma dzo lukwaho vhunga thambo,+ u vhofhelele dzenedzo ngeḓane dzo lukwaho kha lupendelo.+

15 “U ite tsha u vhea khanani tsha khaṱhulo+ tsho itwaho nga mukhavhisi. Tshi fanela u itwa u fana na efodo, nga musuku, harane ya muvhala wa lutombo, wuḽu ya phephulu, labi ḽitswuku na labi ḽavhuḓi ḽa ḽinene ḽo lukwaho.+ 16 Tshenetsho tsha u vhea khanani tshi fanela u lingana thungo dzoṱhe musi tsho petwa, vhulapfu na vhuphara hatsho vhu lingane na tshanḓa tsho vuleaho.* 17 U ite miduba miṋa nga matombo. Wa u thoma u vhe tombo ḽa rubi, thophasi na emeralidi. 18 Wa vhuvhili u vhe tombo ḽa thekhoisi, safire na yasipere. 19 Wa vhuraru u vhe tombo ḽa lishemu, agate na amethisi. 20 Wa vhuṋa u vhe tombo ḽa khirisoḽaithi, onikisi na dzheidi. Matombo eneo a nambatedzwe nga musuku. 21 Eneo matombo a ḓo tshimbidzana na madzina a vharwa vha Isiraele vha 12. Tombo ḽiṅwe na ḽiṅwe ḽi fanela u koriwa u fana na luswayo, dzina ḽiṅwe na ḽiṅwe ḽi imele luṅwe lwa tshaka dza 12.

22 “Tsha u vhea khanani u tshi itele ngeḓane dzo lukwaho, dzi ngaho thambo dza musuku vhukuma.+ 23 Tshenetsho tsha u vhea khanani u tshi itele rinngi mbili nga musuku, u ṱumetshedze dzenedzo rinngi mbili kha thungo mbili dza tsha u vhea khanani. 24 U vhofhelele thambo mbili dza musuku kha rinngi mbili kha thungo dza tsha u vhea khanani. 25 U vhofhelele thambo mbili nga phanḓa kha phendelo mbili, u zwi ṱume na labi ḽo rungelelwaho kha mahaḓa a efodo. 26 U ite rinngi mbili dza musuku u dzi vhofhelele kha thungo mbili nga ngomu kha lumeme lwa tsha u vhea khanani, nga ngomu tsini na efodo.+ 27 U ite dziṅwe rinngi mbili dza musuku nga phanḓa ha efodo fhasi ha labi ḽo rungelelwaho kha mahaḓa, nṱha ha hune bannda* ḽo lukwaho ḽa ṱumanywa hone na efodo.+ 28 Tsha u vhea khanani tshi tea u vhofhelelwa nga thambo dza muvhala wa lutombo u bva kha rinngi dzatsho u ya kha rinngi dza efodo. Zwenezwi zwi ḓo ita uri tsha u vhea khanani tshi dzule fhethu hatsho kha efodo, nṱha ha bannda* ḽo lukwaho.

29 “Aroni u fanela u hwala tsha u vhea khanani tsha khaṱhulo tshi re na madzina a vharwa vha Isiraele khanani yawe musi a tshi ya fhethu Hukhethwa sa tshihumbudzi phanḓa ha Yehova tshifhinga tshoṱhe. 30 U dzhenise Urimi na Thumimi*+ kha tsha u vhea khanani tsha khaṱhulo, zwi fanela u vha kha khana ya Aroni musi a tshi ḓa phanḓa ha Yehova, Aroni a kungele tshenetshi tsha u vhea khanani tsha khaṱhulo tsha Vhaisiraele kha khana yawe phanḓa ha Yehova tshifhinga tshoṱhe.

31 “U ite tshiambaro tshi si na zwanḓa tshine tsha ambariwa nga fhasi ha efodo, u tshi ite nga harane ya muvhala wa lutombo.+ 32 Tshi vhe na mukulo nṱha vhukati hatsho.* Wonoyo mukulo u vhe na lupendelo lwo lukwaho nga muluki u mona nawo. U fanela u fana na wa tshiambaro tsha u ḓitsireledza nndwani uri tshi si kheruwe. 33 U mona na lupendelo lwatsho lwa fhasi u ite zwine zwa nga maphomagraneithi nga harane ya muvhala wa lutombo, wuḽu ya phephulu na labi ḽitswuku na ḓilogo dza musuku vhukati hao. 34 U tou tevhekanya ḓilogo ḽa musuku na phomagraneithi, ḓilogo ḽa musuku na phomagraneithi, u mona na lupendelo lwa tshiambaro tshi si na zwanḓa. 35 Tshi fanela u ambarwa nga Aroni musi a tshi ita mushumo wawe, hu pfale ḓilogo dzi tshi lila musi a tshi dzhena nḓuni khethwa phanḓa ha Yehova na musi a tshi bva uri a si fe.+

36 “U ite kuzennge ku penyaho nga musuku vhukuma u ku kore maipfi ane a ri, ‘Vhukhethwa ndi ha Yehova,’+ u fana na musi muthu a tshi kora luswayo. 37 U ku vhofhe nga thambo ya muvhala wa lutombo; ku tea u dzula ku phanḓa ha dugu.+ 38 Kuzennge ku ḓo vha ku kha phanḓa ya Aroni, Aroni u ḓo vha na vhuḓifhinduleli musi muṅwe o ita vhukhakhi kha zwifhiwa zwine vha zwi ṋekedza Mudzimu, zwine Vhaisiraele vha zwi ita zwikhethwa+ musi vha tshi zwi ṋekedza sa zwifhiwa zwikhethwa. Ku fanela u dzula ku kha phanḓa yawe uri vha takalelwe phanḓa ha Yehova.

39 “U luke tshiambaro tsha tshikotshi nga labi ḽavhuḓi ḽa ḽinene, u ite na dugu nga labi ḽavhuḓi ḽa ḽinene, u luke na bannda.+

40 “U dovhe u ite zwiambaro, mabannda na miṅadzi ya vharwa vha Aroni,+ u itela vhugala na lunako.+ 41 U ambadze Aroni mukomana wau khathihi na vharwa vhawe, u vha ḓodze+ u vha vhee,+ u vha ite vhakhethwa, uri vha shume sa vhotshifhe vhanga. 42 U dovhe u vha itele zwirukhu zwa ḽinene uri vha si sale vhe fhedzi.+ Zwi fanela u thivha u bva kha khundu dzavho u swika kha zwirumbi. 43 Zwi fanela u ambarwa nga Aroni na vharwa vhawe musi vha tshi ya denndeni ḽa muṱangano kana musi vha tshi sendela tsini na aḽeṱare u itela u shuma fhethu hukhethwa, uri vha si vhe na mulandu vha fa. Ndi mulayo wa lini na lini une wa ḓo shuma khae na kha vhana* vhawe vhane vha ḓo bebiwa nga murahu.