Vhurifhi Ha U Thoma Vhu Yaho Kha Vhathesalonika

3 Musi ri si tsha kona u lindela u pfa nga ha inwi, ro humbula uri ndi khwine ri tshi sala Athene;+ 2 fhedzi ro ruma wahashu Timotheo,+ ane a shumela Mudzimu nga u ḓivhadza mafhungo maḓifha nga ha Kristo, uri a ni khwaṱhise, a ni khuthadze a tshi itela lutendo lwaṋu, 3 uri hu si vhe na ane a tsikeledzwa nga enea maṱungu. Ngauri ri nga si iledze u tambudzwa nga zwithu zwo raloho.*+ 4 Musi ri na inwi, ro vha ri tshi ni vhudza uri ri ḓo sedzana na maṱungu, zwenezwo ndi zwe zwa itea, samusi ni tshi zwi ḓivha.+ 5 Musi ndi si tsha kona u lindela, ndo ruma Timotheo uri ndi ḓivhe arali ni tshi kha ḓi fhulufhedzea kha Mudzimu,+ ndi tshi ofha uri Mulingi+ a nga vha o ni linga, zwe ra shuma zwa vha mahandana.

6 Ndi hone Timotheo o swika kha riṋe a tshi bva henengeo,+ o ri vhudza mafhungo avhuḓi nga ha lutendo lwaṋu na lufuno lwaṋu, na uri ni a takala musi ni tshi ri humbula, na uri no ri ṱuvha, samusi na riṋe ro ni ṱuvha. 7 Vhahashu, naho ri tshi shaya, ri maṱunguni, ro khuthadzwa musi ri tshi pfa uri ni kha ḓi fhulufhedzea.+ 8 Zwenezwo zwi a ri ṱuṱuwedza arali ni tshi ima no khwaṱha Murenani. 9 Ri livhuwa Mudzimu nga nṱhani haṋu ngauri ni ita uri ri takale vhukuma. 10 Vhusiku na masiari ri rabela zwi tshi bva mbiluni uri ri ni vhone na uri ri ni khwaṱhise lutendo.+

11 Ngavhe Mudzimu ane a vha Khotsi ashu na Murena washu Yesu vha tshi ita uri ri kone u ḓa kha inwi. 12 Ngavhe Murena a tshi ita uri ni funane na u funa vhaṅwe vhathu vhoṱhe nga ho engedzeaho,+ vhunga na riṋe ri tshi ni funa, 13 uri a khwaṱhise mbilu dzaṋu, ni vhe vha sa solei na u vha vhakhethwa phanḓa ha Mudzimu+ ane a vha Khotsi ashu na phanḓa ha Murena washu Yesu+ na vhakhethwa vhawe vhoṱhe.