Evangeli Ya Mateo

16 Vhafarisei na Vhasadukei vha ḓa kha Yesu vha tshi itela u mu linga, vha mu humbela uri a vha itele vhuṱolo vhu bvaho ṱaḓulu.+ 2 A vha fhindula a ri: “Nga madekwana ni ri, ‘Ḽi ḓo tsha zwavhuḓi, ngauri lutombo lwo tswuka,’ 3 nga matsheloni na ri, ‘Ṋamusi hu ḓo rothola, mvula i ḓo na ngauri lutombo lwo tswuka, hu na makole.’ Inwi ni a kona u bvumba mutsho nga zwine na zwi vhona, fhedzi a ni pfesesi zwine zwa khou itea zwino. 4 Murafho muvhi na u sa fhulufhedzei u dzula u tshi ṱoḓa u itelwa vhuṱolo, a hu na vhuṱolo vhune wonoyu murafho wa ḓo vhu vhona+ nga nnḓa ha vhuṱolo he ha itea kha Yona.”+ A tshi fhedza u amba, a ṱuwa a vha sia henefho.

5 Vhafunziwa vho vha vho hangwa u dzhia vhurotho musi vha tshi wela seli.+ 6 Yesu a amba navho a ri: “Ni dzule no fhaṱuwa, ni thanyele mbiliso ya Vhafarisei na ya Vhasadukei.”+ 7 Vha thoma u amba nga tshavho, vha ri: “Khamusi u khou amba zwenezwi ngauri ro hangwa vhurotho.” 8 Musi Yesu a tshi pfa zwenezwo, a ri: “Ndi ngani ni tshi khou amba nga vhurotho, inwi vha re na lutendo luṱuku? 9 Naa a ni pfesesi zwine nda khou ni vhudza? A ni humbuli nḓila ye nda fusha ngayo vhanna vha 5 000 nga ḽofo ṱhanu, na uri no kuvhanganya matshakatshaka na ḓadza mimanngi mingana?+ 10 Kana a ni humbuli nḓila ye nda fusha ngayo vhanna vha 4 000 nga ḽofo dza sumbe na uri no ḓadza mimanngi mihulu mingana nga matshakatshaka e na kuvhanganya?+ 11 Ndi ngani ni sa zwi pfesesi uri ndo vha ndi sa khou amba nga vhurotho? Fhedzi nga ha uri ni thanyele mbiliso ya Vhafarisei na ya Vhasadukei.”+ 12 Vha kona u pfesesa uri o vha a tshi khou amba nga ha u thanyela pfunzo dza Vhafarisei na Vhasadukei, hu si nga mbiliso ya vhurotho.

13 Musi a tshi swika dzinguni ḽa Kesarea ngei Filipi, Yesu a vhudzisa vhafunziwa vhawe a ri: “Vhathu vha ri Murwa muthu ndi nnyi?”+ 14 Vhone vha ri: “Vhaṅwe vha ri ndi Yohane Mulovhedzi,+ vhaṅwe vha ri ndi Elia,+ ngeno vhaṅwe vha tshi ri ndi Yeremia kana muṅwe wa vhaporofita.” 15 Ene a ri: “Inwi ni ri ndi nṋe nnyi?” 16 Simoni Petro a ri: “Ndi iwe Kristo,+ Murwa wa Mudzimu a tshilaho.”+ 17 Yesu a mu fhindula a ri: “Wo fhaṱutshedzwa Simoni murwa wa Yona, ngauri a wo ngo dzumbululelwa nga ṋama na malofha,* fhedzi wo dzumbululelwa nga Khotsi anga wa ṱaḓulu.+ 18 Ndi dovha nda ri: Iwe u Petro,+ kha tombo+ heḽi ndi ḓo fhaṱa tshivhidzo tshanga, khoro dza Vhiḓa* dzi nga si tshi kunde. 19 Ndi ḓo u ṋea khii dza Muvhuso wa ṱaḓulu, zwoṱhe zwine wa zwi vhofha kha ḽifhasi zwi ḓo vha zwo no vhofhiwa ngei ṱaḓulu, zwine wa ḓo zwi vhofholola kha ḽifhasi zwi ḓo vha zwo no vhofhololwa ngei ṱaḓulu.” 20 A laya vhafunziwa vhawe uri vha si vhudze muthu uri ndi ene Kristo.+

21 U bva nga tshenetsho tshifhinga, Yesu a ṱalutshedza vhafunziwa vhawe uri u fanela u ya Yerusalema uri a tambudzwe zwihulu nga vhahulwane na nga vhahulwane vha vhotshifhe na nga vhamaṅwalo, u ḓo vhulawa, a vuswa nga ḓuvha ḽa vhuraru.+ 22 Petro a mu vhidzela thungo a mu kaidza, a ri: “Murena u songo amba zwithu zwo raloho; hezwi zwithu zwi nga si itee kha iwe.”+ 23 Yesu a furalela Petro, a ri: “Ibva phanḓa hanga Saṱhane! U ḓo nkhukhulisa ngauri zwine wa humbula ndi zwa vhathu, a si zwa Mudzimu.”+

24 Yesu a amba na vhafunziwa vhawe a ri: “Arali muthu a tshi ṱoḓa u ntevhela, nga a ḓihangwe, a hwale danda* ḽawe a dzule a tshi ntevhela.+ 25 Ngauri ane a ṱoḓa u tsireledza vhutshilo hawe u ḓo fa, ane a fa a tshi itela nṋe u ḓo tshila.+ 26 Ngauri muthu u ḓo vhuyelwa ngani arali a wana zwithu zwoṱhe shangoni, fhedzi a fa?+ Kana ndi mini tshine muthu a nga tshi bvisa u itela u renga vhutshilo hawe?+ 27 Ngauri Murwa muthu u ḓo ḓa e vhugalani ha Khotsi awe e na vharuṅwa vhawe, a lambedza muṅwe na muṅwe u ya nga vhuḓifari hawe.+ 28 Ngoho ndi a ni vhudza uri, hu na vhaṅwe vho imaho henefha vhane vha sa ḓo fa vha songo thoma vha vhona Murwa muthu a tshi ḓa e Muvhusoni wawe.”+