Genesi
3 Ṋowa+ yo vha yo ṱalifha* u fhira phukha dzoṱhe dze Yehova Mudzimu a dzi vhumba. Ya amba na mufumakadzi ya ri: “Naa zwa vhukuma Mudzimu o ni vhudza uri a no ngo tea u ḽa mitshelo ya miri yoṱhe ya tsimuni?”+ 2 Mufumakadzi a amba na ṋowa a ri: “Mitshelo ya miri ya tsimuni ri nga i ḽa.+ 3 Fhedzi Mudzimu o amba nga ha mutshelo wa muri u re vhukati ha tsimu+ a ri: ‘Ni songo u ḽa, ni songo u kwama uri ni sa ḓo fa.’” 4 Ṋowa ya amba na mufumakadzi ya ri: “Ni nga si fe.+ 5 Ngauri Mudzimu u a zwi ḓivha uri nga ḓuvha ḽine na ḓo u ḽa, maṱo aṋu a ḓo bonyolowa na fana na Mudzimu na ḓivha zwivhuya na zwivhi.”+
6 Ngauralo, mufumakadzi a vhona uri mutshelo wa muri ndi wavhuḓi lune wa nga ḽiwa, u tshi takadza maṱo, u muri u tamisaho. A fula mutshelo a ḽa.+ Nga murahu a ṋea na munna wawe musi e nae, na ene a ḽa.+ 7 Maṱo avho a bonyolowa vha vhona uri vha fhedzi. Vha luka maṱari a muhuyu vha a vhofha khunduni.+
8 Nga murahu vha pfa ipfi ḽa Yehova Mudzimu musi a tshi khou tshimbila tsimuni nga madekwana hu tshi vho rotholela, munna na mufumakadzi wawe vha dzumbama vhukati ha miri ya tsimuni uri vha si vhone tshifhaṱuwo tsha Yehova Mudzimu. 9 Yehova Mudzimu a bvela phanḓa a tshi vhidzelela munna a tshi ri: “U ngafhi?” 10 Mafheleloni munna a ri: “Ndo pfa ipfi ḽau tsimuni, nda ofha ngauri ndo vha ndi fhedzi, nda dzumbama.” 11 Mudzimu a ri: “Ndi nnyi o u vhudzaho uri a wo ngo ambara?+ Naa wo ḽa mutshelo wa muri we nda u laya uri u songo u ḽa?”+ 12 Munna a ri: “Mufumakadzi we wa nṋea ene uri ndi dzule nae, ndi ene we a nṋea mutshelo wa muri nda ḽa.” 13 Yehova Mudzimu a amba na mufumakadzi a ri: “Wo zwi itelani?” Mufumakadzi a fhindula a ri: “Ṋowa yo mphura nda ḽa.”+
14 Yehova Mudzimu a amba na ṋowa+ a ri: “Ngauri wo ita zwenezwo, ndi iwe u woṱhe wo semiwaho kha zwifuwo zwoṱhe na phukha dzoṱhe. U ḓo kokovha nga thumbu yau, wa ḽa buse maḓuvha oṱhe a vhutshilo hau. 15 Ndi ḓo vhea vhuswina*+ vhukati hau+ na mufumakadzi+ na vhukati ha vhana* vhau+ na ṅwana* wawe.+ Onoyo ṅwana u ḓo u kwasha* ṱhoho,+ iwe wa mu luma* tshirethe.”+
16 A amba na mufumakadzi a ri: “Ndi ḓo engedza vhuṱungu hau musi wo vhifha muvhilini; u ḓo pfa vhuṱungu musi u tshi beba vhana, u ḓo ṱuvha munna wau, wa vhusiwa nga munna wau.”
17 A amba na Adamu* a ri: “Ngauri wo thetshelesa mufumakadzi wau, wa ḽa mutshelo wa muri we nda u laya+ nda ri: ‘U songo u ḽa,’ mavu o semiwa nga mulandu wau.+ Zwine zwa ḓo bveledzwa nga mavu, u ḓo zwi wana wo zwi pfela vhuṱungu maḓuvha oṱhe a vhutshilo hau.+ 18 A ḓo u medzela mipfa na tsheṋe, u ḓo ḽa zwimela zwa ḓaka. 19 U ḓo ḽa zwiḽiwa* wo thoma wa bva biko u swika u tshi vhuyelela mavuni ngauri wo bviswa khao.+ U buse, u ḓo vhuyelela buseni.”+
20 Adamu a ira mufumakadzi wawe dzina ḽa Eva* ngauri o vha a tshi ḓo vha mme a vhoṱhe vha tshilaho.+ 21 Yehova Mudzimu a itela Adamu na mufumakadzi wawe zwiambaro zwilapfu zwa mukumba, a vha ambadza.+ 22 Yehova Mudzimu a ri: “Muthu u vho nga riṋe, u vho ḓivha zwivhuya na zwivhi.+ Uri a si tsha fula mutshelo wa muri wa vhutshilo+ a ḽa, a tshila tshoṱhe,*—” 23 Yehova Mudzimu a mu pandela tsimuni ya Edeni+ uri a ye a lime mavu e a bviswa khao.+ 24 A pandela muthu, a vhea vhakerube+ tsimuni ya Edeni thungo ya vhubvaḓuvha na banga ḽi dugaho mulilo ḽe ḽa vha ḽi tshi dzulela u mona u itela u linda nḓila i yaho murini wa vhutshilo.