Kha Vhahevheru
8 Zwa ndeme vhukuma kha zwine ra khou zwi amba ndi hezwi: Ri na onoyo tshifhe muhulu,+ o dzulaho kha tshanḓa tsha u ḽa tsha khuluṋoni ya wa Vhugala ṱaḓulu,+ 2 ndi mushumeli wa fhethu hukhethwa+ na denndeni ḽa ngoho, ḽe ḽa athwa nga Yehova,* hu si nga muthu. 3 Samusi vhotshifhe vhahulu vhoṱhe vho vhewa uri vha ṋekedze zwifhiwa na zwiṱhavhelo; na Yesu o vha a tshi fanela u ṋekedza tshiṱhavhelo.+ 4 Arali a vhe e kha ḽifhasi, o vha a sa ḓo vha tshifhe,+ samusi ho vha hu na vhanna vho vhewaho uri vha ṋekedze zwifhiwa u ya nga Mulayo. 5 Zwine vhenevha vhanna vha zwi ita zwi sumbedza na u imela+ zwithu zwa ṱaḓulu.+ Zwenezwi zwo vhonala musi Mudzimu a tshi vhudza Mushe nḓila ine a fanela u ita ngayo dennde. O ri: “U ite zwoṱhe nga nḓila ye nda u sumbedza ngayo thavhani.”+ 6 Fhedzi zwino Yesu o ṋewa mushumo wavhuḓi u fhira yoṱhe, ngauri u dovha a vha mupfumedzanyi+ wa mulanga wa khwine,+ we wa thewa kha zwa khwine zwe zwa fhulufhedziswa nga lwa mulayo.+
7 Ho vha hu sa ḓo ṱoḓea mulanga wa vhuvhili arali ho vha hu si na vhukhakhi kha mulanga wa u thoma.+ 8 Ngauri Yehova* u vhona vhathu mulandu musi a tshi ri: “‘Hu khou ḓa maḓuvha ane nda ḓo vhofha mulanga muswa na vha nnḓu ya Isiraele na vha nnḓu ya Yuda. 9 A u nga fani na mulanga we nda u vhofha na vhomakhulukuku wavho musi ndi tshi vha fara nga tshanḓa uri ndi vha bvise shangoni ḽa Egipita.+ Ndo litsha u vha ṱhogomela ngauri a vho ngo dzula vha tshi fhulufhedzea kha mulanga wanga,’ u ralo Yehova.*
10 “‘Wonoyu ndi mulanga une nda ḓo u vhofha na vha nnḓu ya Isiraele nga murahu ha eneo maḓuvha,’ u ralo Yehova.* ‘Ndi ḓo vhea milayo yanga mihumbuloni yavho, nda i ṅwala mbiluni dzavho.+ Ndi ḓo vha Mudzimu wavho, vhone vha vha vhathu vhanga.+
11 “‘A vha tsha ḓo funza vhahura vhavho na vhahavho, vha ri: “Ḓivhani Yehova!”* Ngauri vhoṱhe vha ḓo nḓivha, u bva kha muṱuku u swika kha muhulwane. 12 Ngauri ndi ḓo vha hangwela vhukhakhi havho, a thi tsha ḓo humbula zwivhi zwavho.’”+
13 Mudzimu o amba nga ha “mulanga muswa” ngauri wa kale a u tsha shuma.+ Wonoyo mulanga wa kale, u si tsha shumaho u tsini na u fheliswa.+