Ekisoda
30 “U ite aḽeṱare ya u fhisela zwioro;+ u i ite nga thanda ya muunga.+ 2 I fanela u vha i tshi lingana thungo dzoṱhe, i vhulapfu ha khubithi* nthihi, i vhuphara ha khubithi nthihi, u ya nṱha i khubithi mbili. Ṋanga dzayo dzi vhonale khayo.+ 3 U i ḓodze musuku vhukuma, nṱha hayo na thungo dzayo dzoṱhe na kha ṋanga dzayo; u tea u i itela lumeme lwa musuku u mona nayo. 4 U i itele na rinngi mbili dza musuku nga fhasi ha lumeme nga thungo dzayo mbili, vha ḓo dzhenisa thanda dza u i hwala. 5 U ite thanda dza muunga, u dzi ḓodze musuku. 6 U dzi vhee phanḓa ha khetheni ḽine ḽa vha tsini na mbulungelo ya mulanga*+ na mutibo wayo, fhethu hune nda ḓo ḓivhonadza hone kha iwe.+
7 “Aroni+ u fanela u fhisa zwioro zwi nukhelelaho+ khayo,+ a tshi ita uri zwi dube kha aḽeṱare musi a tshi ḓa u lugisa mbone+ matsheloni maṅwe na maṅwe. 8 Musi Aroni a tshi funga mbone nga madekwana,* u ḓo fhisa zwioro. Ndi zwioro zwine zwa fanela u ṋekedzwa Yehova tshifhinga tshoṱhe kha mirafho yaṋu yoṱhe. 9 Ni songo fhisa zwioro zwi songo teaho khayo kana tshifhiwa tsha u fhiswa kana tshifhiwa tsha thoro, ni songo shela tshifhiwa tsha tshinwiwa khayo.+ 10 Aroni u tea u ita tshipfumelelo kha ṋanga dzayo luthihi nga ṅwaha.+ U ḓo ita tshipfumelelo+ nga maṅwe malofha a tshifhiwa tsha u pfumelela tshivhi luthihi nga ṅwaha kha mirafho yaṋu yoṱhe. Yeneyo aḽeṱare ndi khethwa-khethwa kha Yehova.”
11 Yehova a amba na Mushe a ri: 12 “Musi u tshi vhala vharwa vha Isiraele,+ muṅwe na muṅwe wavho u tea u bvisa tshirengululi a tshi itela vhutshilo hawe kha Yehova musi hu tshi vhalwa vhathu. Zwenezwi zwi khou itelwa uri hu si vhe na dwadze khavho musi vha tshi ṅwaliswa. 13 Vhoṱhe vhane vha ḓo vhalwa vha fanela u bvisa: hafu ya shekele* u ya nga nḓila ine ha elwa ngayo tshileme tsha shekele fhethu hukhethwa.+ Gera* dza fumbili* dzi lingana na shekele. Hafu ya shekele ndi muṋeelo wa Yehova.+ 14 Muṅwe na muṅwe o ṅwaliswaho a re na miṅwaha ya 20 u ya nṱha u fanela u ṋea Yehova muṋeelo.+ 15 Mupfumi ho ngo fanela u bvisa i fhiraho yeneyo na mushai ho ngo fanela u bvisa i re fhasi ha hafu ya shekele* sa muṋeelo wa Yehova wa u rengulula vhutshilo hawe. 16 U kuvhanganye tshelede ya siḽiva ya u pfumelela kha Vhaisiraele, i ḓo shuma u tikedza mushumo une wa itwa denndeni ḽa muṱangano uri i shume sa tshihumbudzi phanḓa ha Yehova kha Vhaisiraele, uri i rengulule vhutshilo haṋu.”
17 Yehova a dovha a amba na Mushe a ri: 18 “Ita sambelo ḽa u ṱambela+ nga koporo u ḽi vhee vhukati ha dennde ḽa muṱangano na aḽeṱare, u shele maḓi khaḽo.+ 19 Aroni na vharwa vhawe vha fanela u ṱamba zwanḓa zwavho na milenzhe yavho henefho.+ 20 Musi vha tshi ya denndeni ḽa muṱangano kana musi vha tshi sendela tsini na aḽeṱare u itela u shuma na u ṋekedza Yehova tshifhiwa tsha u fhiswa, vha fanela u ṱamba nga maḓi uri vha si fe. 21 Vha ṱambe zwanḓa zwavho na milenzhe yavho uri vha si fe, zwi vhe mulayo une vha tea u u tevhedza tshifhinga tshoṱhe, ene na vhana vhawe, kha mirafho yavho yoṱhe.”+
22 Yehova a bvela phanḓa a tshi amba na Mushe a ri: 23 “Dzhia tshiḓolo tshi nukhelelaho vhukuma: ṋonzhe dza mira dza shekele* dza 500, hafu ya muelo wonoyo wa sinamoni i nukhelelaho ya shekele dza 250, muelo wa tshimela tshi nukhelelaho tshi vhidzwaho kalamo wa shekele dza 250, 24 na shekele dza 500 dza muri wa mukasia, u ya nga nḓila ine ha elwa ngayo tshileme tsha shekele fhethu hukhethwa,+ khathihi na hini* dza mapfura a muṱwari. 25 Kha zwenezwo u ite mapfura makhethwa a u ḓodza; a fanela u ṱanganyiswa zwavhuḓi.+ A fanela u vha mapfura makhethwa a u ḓodza.
26 “U ḓodze dennde ḽa muṱangano+ na mbulungelo ya mulanga* ngao, 27 khathihi na ṱafula na thundu dzayo dzoṱhe, tshiṱomambone na thundu dzatsho, aḽeṱare ya zwioro, 28 aḽeṱare ya tshifhiwa tsha u fhiswa na thundu dzayo dzoṱhe, sambelo na milenzhe yaḽo. 29 U tea uri u zwi khethe uri zwi vhe zwikhethwa-khethwa.+ Ane a zwi kwama u fanela u vha mukhethwa.+ 30 U ḓodze Aroni+ na vharwa vhawe,+ u vha khethe uri vha shume sa vhotshifhe vhanga.+
31 “U ambe na Vhaisiraele u ri: ‘Kha nṋe haya ndi mapfura makhethwa a u ḓodza kha mirafho yaṋu.+ 32 Ho ngo fanela u ḓolwa nga muthu, ni songo ita tshithu naho tshi tshini tshi ṱoḓaho u fana nao. Ndi makhethwa. A ḓo dzula e makhethwa. 33 Ane a ita mapfura a fanaho na eneo na ane a ḓodza ane a si fanelee* u fanela u vhulawa.’”+
34 Yehova a amba na Mushe a ri: “Dzhia mielo i eḓanaho ya zwiḓolo zwi nukhelelaho zwi tevhelaho:+ ṋonzhe dzi nukhelelaho, onikha, galabanumu i nukhelelaho na zwioro zwavhuḓi zwitshena. 35 U zwi ite zwi vhe tshioro;+ zwenezwo zwilungi* zwo ṱanganyiswaho zwi fanela u ṱanganyiswa nga vhutsila, zwi shelwe muṋo,+ uri zwi vhe tshioro tshikhethwa tsho kunaho. 36 U sinḓe zwiṅwe zwazwo zwi vhe luphuse, zwiṅwe u zwi vhee phanḓa ha mbulungelo ya mulanga* denndeni ḽa muṱangano, hune nda ḓo ḓivhonadza hone kha iwe. Zwi fanela u vha zwikhethwa-khethwa kha inwi. 37 U songo ḓiitela tshioro nga wonoyu muvango.+ U tshi dzhie tshi tshithu tshikhethwa kha Yehova. 38 Ane a ita tshioro tshi fanaho natsho a tshi itela u ḓifhelwa nga u nukhelela hatsho, a vhulawe.”