Kha Vharoma
8 Vha re na vhuthihi na Kristo Yesu a vha na mulandu. 2 Ngauri mulayo wa muya mukhethwa wo ni ṋea vhutshilo, uri ni tshile ni na vhuthihi na Kristo Yesu. Wonoyo mulayo wo ni vhofholola+ kha mulayo wa tshivhi na lufu. 3 Zwe Mulayo wa kundwa u zwi ita+ ngauri vhathu a vho ngo fhelela,+ Mudzimu o zwi ita nga u ruma Murwa wawe+ uri a ḓe a vhe muthu,*+ u itela u fhelisa tshivhi na u ita uri vhathu vha si tsha vha na mulandu wa tshivhi. 4 Zwenezwi ndi u itela uri ri ite zwithu zwo lugaho zwine Mulayo wa ri ri zwi ite+ nga u tenda muya wa Mudzimu u tshi ri langa nṱhani ha u langiwa nga mivhili yashu i re na tshivhi.+ 5 Ngauri vhane vha ṱoḓa u ita zwine mivhili yavho ya funa, vha dzula vha tshi humbula u ita zwithu zwivhi,+ fhedzi vhane vha livhiswa nga muya mukhethwa vha dzula vha tshi humbula u ita zwithu zwi takadzaho muya mukhethwa.+ 6 U humbula nga ha zwithu zwivhi zwi isa lufuni,+ fhedzi u humbula nga ha zwithu zwi tshimbidzanaho na muya mukhethwa zwi amba vhutshilo na mulalo;+ 7 ngauri u humbula nga ha zwithu zwivhi zwi ita uri muthu a vhe swina ḽa Mudzimu,+ ngauri muvhili a u tevhedzi mulayo wa Mudzimu, a u zwi koni. 8 Vhane vha tshilela u takadza mivhili yavho vha nga si takadze Mudzimu.
9 Arali ni na muya wa Mudzimu a ni nga ḓo tshila u tendelana na ṋama,+ fhedzi ni ḓo tshila u tendelana na muya. Arali muthu a si na muya wa Kristo, onoyo muthu a si wa Kristo. 10 Arali ni na vhuthihi na Kristo,+ muvhili wo fa nga nṱhani ha tshivhi, fhedzi muya u a tshila nga nṱhani ha u luga. 11 Arali ni na muya wa o vusaho Yesu vhafuni,+ we a vusa Kristo Yesu vhafuni u ḓo ita uri mivhili* yaṋu i tshile+ nga muya wawe une wa vha hone kha inwi.
12 Vhahashu, ri songo tendela mivhili yashu i tshi ri langa, ra ita zwine ya ṱoḓa;+ 13 arali na tenda i tshi ni langa, ni ḓo fa; arali na litsha u ita zwithu zwo khakheaho+ ni tshi thuswa nga muya mukhethwa, ni ḓo tshila.+ 14 Ngauri vhoṱhe vhane vha livhiswa nga muya wa Mudzimu ndi vhana vha Mudzimu.+ 15 Ngauri a no ngo ṱanganedza muya wa uri ni vhe phuli, u itaho uri ni dovhe ni ofhe, fhedzi no ṱanganedza muya wa uri ni vhe vhana vhawe, wonoyo muya u ita uri ri vhidzelele ri ri: “Aba,* Khotsi!”+ 16 Muya wa Mudzimu u a ri dzumbululela+ uri ri vhana vha Mudzimu.+ 17 Arali ri vhana, ri maḽaifa a Mudzimu, vhane ifa ra ḽa roṱhe+ na Kristo, tenda ri tshi tambula nae,+ ri ḓo ṋewa vhugala nae.+
18 Ngauri ndi dzhia u tambula hashu ha tshino tshifhinga hu sa vhambedzwi na vhugala vhune ra ḓo dzumbululelwa hone.+ 19 Ngauri tsiko yo lavhelela nga maṱo matswuku u dzumbululwa ha vhana vha Mudzimu.+ 20 Tsiko yoṱhe yo kumedzelwa kha vhutshilo ha mahandana,+ hu si nga u funa hayo, fhedzi ndi Mudzimu we a i kumedzela, a i ṋea fhulufhelo ḽa uri: 21 tsiko i ḓo vhofhololwa+ vhupulini ha tshivhi na lufu, ya ṋewa vhugala ha vhana vha Mudzimu vho vhofholowaho. 22 Ngauri ri a zwi ḓivha uri tsiko yoṱhe i kha ḓi gomela, i kha ḓi pfa vhuṱungu u swika zwino. 23 Na riṋe vhe ra wana khaṋo ya u thoma ya muya mukhethwa, ri khou gomela+ ro lavhelela ḓuvha ḽine ra ḓo itwa vhana vhawe,+ na u vhofhololwa ha mivhili yashu nga tshirengululi. 24 Ngauri ro tshidzwa ri na ḽeneḽi fhulufhelo; fhedzi fhulufhelo ḽine ḽa vhonwa a si fhulufhelo, ngauri muthu a nga fhulufhela hani zwithu zwine a zwi vhona? 25 Arali ri tshi fhulufhela+ tshithu tshine ra sa athu u tshi vhona,+ ri dzula ro tshi lavhelela ri tshi khou konḓelela.+
26 Zwiṅwe hafhu, nga nṱhani ha vhushayanungo hashu,+ nga zwiṅwe zwifhinga zwi a itea uri ri rabele, fhedzi ri sa ḓivhi zwine ra fanela u zwi amba uri ri sumbedze nḓila ine ra ḓipfa ngayo, ri wana thuso nga maanḓa a Mudzimu. 27 Fhedzi Mudzimu ane a ṱolisisa mbilu dzashu+ u a ḓivha zwine muya mukhethwa wa khou zwi humbelela vhakhethwa ngauri zwi tshimbidzana na zwine a zwi funa.
28 Ri a zwi ḓivha uri Mudzimu u ita uri mishumo yawe yoṱhe i shumisane a tshi itela vhane vha mu funa, vhenevho ndi vhe vha vhidzwa u ya nga zwine a zwi funa;+ 29 ngauri vhe a vha ḓivha hu tshee nga phanḓa o dzula o vha nanga uri vha fane na Murwa wawe,+ uri a vhe tanzhe+ kha vharathu vhanzhi.+ 30 Zwiṅwe hafhu, vhenevho vhe a dzula o vha nanga+ o dovha a vha vhidza;+ na vhe a vha vhidza ndi vhone vhe a vha dzhia vho luga.+ Mafheleloni vhe a ri vho luga ndi vhone vhe a vha ṋea vhugala.+
31 Zwino ri ḓo ri mini nga ha enea mafhungo? Arali Mudzimu a tshi ima na riṋe, ndi nnyi ane a nga lwa na riṋe?+ 32 Arali a songo tshivha Murwa wawe, a mu ṋekedza a tshi itela riṋe roṱhe,+ a nga kundwa hani u ri ṋea zwiṅwe zwithu zwoṱhe nga vhuthu? 33 Ndi nnyi ane a nga vhona vhanangiwa vha Mudzimu mulandu?+ Mudzimu ndi Ene o ambaho uri vho luga.+ 34 Ndi nnyi ane a nga vha vhona mulandu? Kristo Yesu ndi ene o faho, ndi ene we a vuswa vhafuni, ane a vha kha tshanḓa tsha u ḽa tsha Mudzimu,+ ane a ri ambelela.+
35 Ndi mini zwine zwa nga ita uri Kristo a si tsha ri funa?+ Naa ndi vhuṱungu, mutsiko, u tovholwa, nḓala, u sa vha na zwiambaro, khombo kana banga?+ 36 Samusi ho ṅwaliwa ha pfi: “Nga nṱhani hau, vha dzula vha tshi ṱoḓa u ri vhulaya, vha ri dzhia sa nngu dzine dza khou ya u ṱhavhiwa.”+ 37 Fhedzi ri a kunda kha zwithu zwoṱhe+ ri tshi thuswa nga we a ri funa. 38 Ngauri ndi a tenda uri lufu, vhutshilo, vharuṅwa, mivhuso, zwithu zwa zwino na zwa tshifhinga tshi ḓaho kana maanḓa,+ 39 vhulapfu, vhudzivha kana tsiko naho i ifhio zwi nga si ite uri Mudzimu na Kristo Yesu Murena washu, vha si ri fune.