Hesekiele

1 Nga ṅwaha wa vhu 30, nga ḓuvha ḽa vhuṱanu ḽa ṅwedzi wa vhuṋa, musi ndi ngei mulamboni wa Kebara+ ndi na vhathu vhe vha thubiwa,+ ḽiṱaḓulu ḽo vuliwa nda thoma u vhona mabono a Mudzimu. 2 Nga ḓuvha ḽa vhuṱanu ḽa wonoyo ṅwedzi, nga ṅwaha wa vhuṱanu musi Khosi Yehoyakini e vhuthubwani,+ 3 Yehova o amba na Hesekiele* murwa wa Butsi we a vha e tshifhe ngei mulamboni wa Kebara shangoni ḽa Vhakaladea.+ Tshanḓa tsha Yehova tsho ḓa khae e henefho.+

4 Musi ndi tshi khou lavhelesa nda vhona ḓumbu+ ḽi tshi khou bva devhula, hu na gole ḽihulu ḽi na lupenyo lwa mulilo+ zwo tangwa nga tshedza tshihulu, vhukati ha mulilo ho vha hu na tshithu tshi ngaho tsimbi i penyaho.*+ 5 Vhukati hawo ho vha hu na zwivhumbiwa zwiṋa, zwe zwa vha zwi tshi nga muthu.+ 6 Zwoṱhe zwo vha zwi na zwifhaṱuwo zwiṋa na phapha nṋa.+ 7 Milenzhe yazwo yo vha yo tou tswititi, zwo vha zwi na khwanḓa dzi no nga dza ṋamana, zwo vha zwi tshi khou penya sa koporo yo pholishiwaho.+ 8 Nga fhasi ha phapha zwo vha zwi na zwanḓa zwa muthu kha thungo dzoṱhe nṋa, vhuṋa hazwo zwo vha zwi na zwifhaṱuwo na phapha. 9 Phapha dza tshiṅwe na tshiṅwe tshazwo dzo vha dzo kwamana. Zwo vha zwi sa rembuluwi musi zwi tshi tshimbila; zwoṱhe zwo vha zwi tshi ya phanḓa.+

10 Mbonalo ya zwifhaṱuwo zwazwo yo vha i heyi: Tshiṅwe na tshiṅwe tsha zwenezwo zwiṋa tsho vha tshi na tshifhaṱuwo tsha muthu, na tshifhaṱuwo tsha ndau+ kha tsha u ḽa, na tshifhaṱuwo tsha mboho+ kha tsha monde, tshiṅwe na tshiṅwe tshazwo tsho vha tshi na tshifhaṱuwo+ tsha goni.+ 11 Zwifhaṱuwo zwazwo zwo vha zwo tou ralo. Zwo vha zwo ṱharamudzela phapha dzazwo nṱha. Tshiṅwe na tshiṅwe tsho vha tshi na phapha mbili dze dza vha dzi tshi kwamana na phapha mbili dze dza vha dzo fukedza muvhili watsho.+

12 Zwoṱhe zwo vha zwi tshi ya phanḓa, zwo vha zwi tshi ya hune muya wa zwi rumela hone.+ Zwo vha zwi sa rembuluwi musi zwi tshi tshimbila. 13 Zwivhumbiwa zwi tshilaho zwo vha zwi na mbonalo ine ya nga ya malasha ane a khou duga, hu na zwithu zwine zwa nga mulilo zwi tshi khou ya phanḓa na murahu vhukati ha zwivhumbiwa zwi tshilaho, hu na lupenyo lwe lwa vha lu tshi khou bva kha mulilo.+ 14 Musi zwivhumbiwa zwi tshilaho zwi tshi ya phanḓa na musi zwi tshi humela murahu, zwo vha zwi tshi tshimbila nga luvhilo lwa lupenyo.

15 Musi ndo lavhelesa zwivhumbiwa zwi tshilaho, ndo vhona tshivhumbiwa tshiṅwe na tshiṅwe tshi tshilaho tshine tsha vha na zwifhaṱuwo zwiṋa tsho ima tsini na linga.+ 16 Malinga na tshivhumbeo tshao zwo vha zwi tshi penya sa tombo ḽa khirisoḽaithi, vhuṋa hao o vha a tshi fana. Mbonalo yao na tshivhumbeo tshao zwo vha zwi tshi tou nga linga ḽi kha ḽiṅwe linga.* 17 Musi a tshi gidima, o vha a tshi kona u ya thungo dzoṱhe nṋa, a sa khoni musi a tshi khou ṱuwa. 18 Rimu dzao dzo vha dzi khulu vhukuma dzi tshi mangadza, rimu dza eneo malinga maṋa dzo vha dzi na maṱo u mona nadzo.+ 19 Musi zwivhumbiwa zwi tshilaho zwi tshi tshimbila, na malinga o vha a tshi zwi tevhela, na musi zwivhumbiwa zwi tshilaho zwi tshi takuwa fhasi, na malinga o vha a tshi takuwa.+ 20 Zwo vha zwi tshi ya he muya wa zwi rumela hone, huṅwe na huṅwe hune muya wa ya. Malinga o vha a tshi takuwa nazwo, ngauri muya une wa tshimbidza zwivhumbiwa zwi tshilaho* wo vha u tshi tshimbidza na malinga. 21 Musi zwi tshi tshimbila, na one o vha a tshi tshimbila; musi zwi tshi ima, na one o vha a tshi ima; musi zwi tshi takuwa fhasi, na malinga o vha a tshi takuwa nazwo, ngauri muya une wa tshimbidza zwivhumbiwa zwi tshilaho wo vha u tshi tshimbidza na malinga.

22 Nṱha ha ṱhoho dza zwenezwo zwivhumbiwa zwi tshilaho ho vha hu na tshithu tshine tsha nga pulatifomo, i tshi penya sa gwada ḽa maḓi, i nṱha ha ṱhoho dzazwo.+ 23 Zwo vha zwo ṱharamudzela nṱha phapha dzazwo nga fhasi ha pulatifomo. Tshiṅwe na tshiṅwe tsho vha tshi na phapha mbili dza u fukedza tshiṅwe tshipiḓa tsha muvhili watsho na phapha mbili dza u fukedza tshiṅwe tshipiḓa. 24 Musi ndi tshi pfa mubvumo wa phapha dzazwo, wo vha u tshi tou nga mubvumo wa maḓi, wo vha u tshi tou nga mubvumo wa Ramaanḓaoṱhe.+ Musi zwi tshi tshimbila, ho vha hu tshi pfala mutsindo u ngaho wa mmbi. Musi zwi tshi ima, zwo vha zwi tshi peta phapha dzazwo.

25 Ho vha hu tshi pfala ipfi nṱha ha pulatifomo ye ya vha i nṱha ha ṱhoho dzazwo. (Musi zwi tshi ima, zwo vha zwi tshi peta phapha dzazwo.) 26 Nṱha ha pulatifomo ye ya vha i nṱha ha ṱhoho dzazwo ho vha hu na tshithu tshine tsha nga tombo ḽa safire,+ tshine tsha nga khuluṋoni.+ We a vha o dzula kha yeneyo khuluṋoni ye ya vha i nṱha o vha e na tshivhumbeo tshi ngaho tsha muthu.+ 27 Ndo vhona tshithu tshi ngaho tsimbi i penyaho*+ tshe tsha vha tshi tshi nga mulilo une wa khou bva kha zwine zwa nga ndi khundu dzawe u ya nṱha; na u bva khunduni dzawe u ya fhasi, ndo vhona zwine zwa nga mulilo.+ Ho vha hu na tshedza u mona nae 28 tshi ngaho musengavhadzimu+ une wa vhonala kha makole musi mvula yo na. Yeneyo ndi nḓila ye tshedza tsha vha tshi ngayo u mona nae. Tsho vha tshi tshi tou nga tshivhumbeo tsha vhugala ha Yehova.+ Musi ndi tshi tshi vhona, nda gwadama, nda thoma u pfa ipfi ḽi tshi khou amba.