Daniele

7 Nga ṅwaha wa u thoma hu tshi khou vhusa Khosi Beḽesatsara+ wa Babele, Daniele o ḽora na u vhona mabono o eḓela.+ A ṅwala zwoṱhe zwe a ḽora+ nga vhuḓalo. 2 Daniele a ri:

“Ndo vha ndi tshi khou vhona mabono vhusiku, nda vhona muya u tshi khou vhudzula u tshi bva thungo dzoṱhe dza ṱaḓulu u tshi khou dzikusa lwanzhe.+ 3 Ha bva zwivhanda zwihulu zwiṋa+ lwanzheni, zwo vha zwi sa fani.

4 “Tsha u thoma tsho vha tshi tshi nga ndau,+ tshi na phapha dza goni.+ Musi ndi tshee ndo sedza nda vhona phapha dzatsho dzi tshi ṱhukhulwa, tsha takuswa tsha ima nga milenzhe sa muthu, tsha ṋewa mbilu ya muthu.

5 “Nda vhona tshiṅwe tshivhanda tsha vhuvhili, tshine tsha nga tshivhingwi.+ Tsha takusa mulenzhe muthihi, tshi na mbabvu tharu vhukati ha maṋo; tsha vhudzwa u pfi, ‘Takuwa u ḽe ṋama nnzhi.’+

6 “Nga murahu nda vhona tshiṅwe tshivhanda tshine tsha nga nngwe,+ tsho vha tshi na phapha nṋa dzi ngaho dza tshiṋoni kha muṱana. Tsho vha tshi na ṱhoho nṋa,+ tsha ṋewa maanḓa a u vhusa.

7 “Musi ndi tshi kha ḓi vhona mabono vhusiku, nda vhona tshivhanda tsha vhuṋa, tshi ofhisaho vhukuma tshi na maanḓa mahulu, tshi na maṋo mahulu a tsimbi. Tsho vha tshi tshi khou shengekanya na u kwashekanya zwi re tsini natsho, zwo salaho tsha zwi kandekanya nga milenzhe.+ Tsho vha tsho fhambana na zwiḽa zwiṅwe zwivhanda zwoṱhe zwe nda zwi vhona, tsho vha tshi na maṋanga a fumi. 8 Musi ndi tshee ndo lavhelesa maṋanga, nda vhona luṅwe luṋanga+ lu tshi bva vhukati hao, musi lu tshi bvelela ha ṱhukhulwa maṋanga mararu a u thoma. Ho vha hu na maṱo ane a nga a muthu kha lwonolwo luṋanga na mulomo we wa vha u tshi khou semana.*+

9 “Nda lavhelesa u swika hu tshi vhewa dzikhuluṋoni, Wa-Kale-kale wa Maḓuvha+ a dzula fhasi.+ Zwiambaro zwawe zwo vha zwo tshena sa mahaḓa,+ mavhudzi awe o vha a tshi nga wuḽu tshena. Khuluṋoni yawe na mavhili ayo zwo vha zwi tshi nga mulilo.+ 10 Ho vha hu na mulilo u tshi khou elela phanḓa hawe.+ Vha miḽioni vha tshi khou mu shumela, vha miḽioni dza ḓana* vho ima phanḓa hawe.+ Tsengo*+ ya thoma, ha vulwa dzibugu.

11 “Nda bvela phanḓa ndo lavhelesa musi luṋanga lu tshi khou semana;*+ nda lavhelesa u swikela tshivhanda tshi tshi vhulawa, mutumbu watsho wa poswa muliloni wa swa. 12 Zwiṅwe zwivhanda+ zwoṱhe zwa dzhielwa vhuhosi, fhedzi zwa tendelwa u tshila lwa tshifhinga na khalaṅwaha.

13 “Musi ndi tshee ndo lavhelesa mabono vhusiku, nda vhona muthu ane a nga murwa muthu+ a tshi ḓa e kha makole a ṱaḓulu; a tendelwa uri a dzhene hu re na Wa-Kale-kale wa Maḓuvha,+ vha mu isa tsini Nae. 14 A ṋewa vhuhosi,+ khuliso+ na muvhuso uri vhathu vhoṱhe vha tshaka na nyambo dzo fhambanaho vha mu shumele.+ Vhuhosi hawe ndi ha lini na lini, a vhu nga fheli na muvhuso wawe a u nga fheliswi.+

15 “Nṋe Daniele ndo vha ndo tsikeledzea, ngauri mabono e nda a vhona o ntshuwisa.+ 16 Nda ya tsini na muṅwe wa vho imaho henefho, nda mu vhudzisa uri zwenezwi zwi amba mini. A mmbudza zwine zwenezwi zwa amba zwone.

17 “‘Zwenezwi zwivhanda zwihulu zwiṋa+ ndi mahosi maṋa ane a ḓo vha hone kha ḽifhasi.+ 18 Fhedzi vhakhethwa vha Wa-Maanḓa-oṱhe+ vha ḓo ṋewa muvhuso,+ wonoyo muvhuso u ḓo vha wavho+ lini na lini.’

19 “Ndo vha ndi tshi ṱoḓa u ḓivha zwo engedzeaho nga ha tshivhanda tsha vhuṋa, tshe tsha vha tsho fhambana na zwiṅwe zwivhanda zwoṱhe; tsho vha tshi tshi tshuwisa nga maanḓa, tshi na maṋo a tsimbi na ṋala dza koporo, tshi tshi shengekanya na u kwashekanya zwi re nga tsini hatsho, zwo salaho tshi tshi kandekanya nga milenzhe yatsho;+ 20 na u ḓivha nga ha maṋanga a fumi+ a re kha ṱhoho yatsho, na nga ha luṋanga lwe lwa bvelela musi maṅwe mararu a tshi wa,+ lwe lwa vha lu na maṱo na mulomo we wa vha u tshi khou semana,* lwo hulaho u fhira maṅwe.

21 “Nda lavhelesa nda vhona lwonolwo luṋanga lu tshi lwa na vhakhethwa, lu tshi khou vha kunda,+ 22 u swikela Wa-Kale-kale wa Maḓuvha+ a tshi ḓa, ene Wa-Maanḓa-oṱhe,+ vhakhethwa vhawe vha haṱulwa nga nḓila yavhuḓi, ha swika tshifhinga tsho vhewaho tsha uri vhenevho vhakhethwa vha vhuse.+

23 “A amba a ri: ‘Tshivhanda tsha vhuṋa, ndi muvhuso wa vhuṋa une wa ḓo vha hone ḽifhasini. U ḓo vha wo fhambana na miṅwe mivhuso yoṱhe, u ḓo kwashekanya wa kandekanya na u fhelisa ḽifhasi ḽoṱhe.+ 24 Maṋanga a fumi ndi khosi dza fumi, dzine dza ḓo vhusa kha wonoyo muvhuso, hu ḓo vha na iṅwe khosi ine ya ḓo ḓa nga murahu hadzo, i ḓo vha yo fhambana na khosi dza u thoma, i ḓo kunda khosi tharu.+ 25 I ḓo sema Wa-Ṱaḓulu-ṱaḓulu,+ ene Wa-Maanḓa-oṱhe, ya bvela phanḓa i tshi shengedza vhakhethwa vhawe. I ḓo shandula zwifhinga na milayo, vhenevho vhakhethwa vha kumedzelwa zwanḓani zwayo lwa tshifhinga, zwifhinga na hafu.*+ 26 Tsengo* ya thoma, khosi ya dzhielwa vhuhosi, u itela u i fhelisa lwa tshoṱhe.+

27 “‘Muvhuso, vhuhosi na vhugala ha mivhuso yoṱhe i re nga fhasi ha ḽiṱaḓulu zwa ṋewa vhathu vhane vha vha vhakhethwa vha Wa-Maanḓa-oṱhe.+ Muvhuso wavho ndi wa tshoṱhe,+ mivhuso yoṱhe i re nga fhasi havho i ḓo vha shumela na u vha thetshelesa.’

28 “Zwe nda zwi vhona zwi guma henefha. Nṋe Daniele ndo tshuwa nga maanḓa lwe nda tshenuluwa; nda dzula ndi tshi humbula nga hazwo.”