Evangeli Ya Luka

6 Nga savhatha musi a tshi khou fhira nga masimuni a goroi, vhafunziwa vhawe vha ṱhukhula thoro dza goroi,+ vha dzi swoṱa nga zwanḓa vha dzi ḽa.+ 2 Vhafarisei vha tshi vhona zwenezwo, vha ri: “Ndi ngani ni tshi ita zwithu zwi songo tendelwaho nga Savhatha?”+ 3 Yesu a ri: “Naa a ni athu u vhala zwe Davida na vhanna vhe a vha e navho vha zwi ita musi vho farwa nga nḓala?+ 4 Musi a tshi dzhena nḓuni ya Mudzimu a ḽa vhurotho ho ṋekedzwaho Mudzimu,* he ene na vhanna vhe a vha e navho vha vha vha songo tendelwa u vhu ḽa, vhu tshi tea u ḽiwa nga vhotshifhe fhedzi.”+ 5 A amba navho a ri: “Murwa muthu ndi Murena wa Savhatha.”+

6 Nga iṅwe savhatha,+ a dzhena sinagogoni a thoma u funza. Henefho ho vha hu na munna we a vha o oma tshanḓa tsha u ḽa.+ 7 Vhamaṅwalo na Vhafarisei vha sedza Yesu uri vha vhone arali a tshi ḓo fhodza onoyu munna nga Savhatha, uri vha mu vhone mulandu. 8 Nge a vha a tshi ḓivha zwine vha khou zwi elekanya,+ a amba na munna o omaho tshanḓa a ri: “Takuwa u ḓe ngeno vhukati.” A takuwa a ya. 9 Yesu a vha vhudzisa a ri: “Naa zwo tendelwa u ita zwithu zwavhuḓi kana zwo khakheaho nga Savhatha, zwi ngaho u tshidza kana u vhulaya?”+ 10 Musi o no vha lavhelesa vhoṱhe, a amba na onoyo munna a ri: “Onyolosa tshanḓa tshau.” A tshi onyolosa tsha fhola. 11 Vhone vha sinyuwa, vha amba nga tshavho nga ha zwine vha ḓo zwi ita Yesu.

12 Ḽiṅwe ḓuvha o ya a rabela thavhani,+ a fhedza vhusiku hoṱhe a tshi khou rabela Mudzimu.+ 13 Musi ḽi tshi tsha, a vhidza vhafunziwa vhawe a nanga vha 12 vhukati havho, a vha vhidza vhaapostola:+ 14 Vhenevho ndi Simoni we a vha a tshi mu vhidza Petro, Andrea murathu wawe, Yakobo, Yohane, Filipo,+ Baratholomeo, 15 Mateo, Thomasi,+ Yakobo murwa wa Alifeo, Simoni ane a vhidzwa “a fhiseaho,” 16 Yudasi murwa wa Yakobo na Yudasi Iskariote we a vha mufheṱi.

17 A tsa navho a ima fhethu ho itaho mudavhi, henefho ho vha hu na vhafunziwa vhawe vhanzhi na vhathu vhanzhi vha bvaho Yudea na Yerusalema na madzinguni a re tsini na lwanzhe a Tiro na a Sidoni. Vhenevho vhathu vho vha vho ḓa u mu thetshelesa na uri vha fhodzwe. 18 O fhodza na vhane vha tambudzwa nga madimoni. 19 Vhathu vhoṱhe vho vha vha tshi ṱoḓa u mu kwama, ngauri maanḓa o vha a tshi bva khae,+ a tshi khou fhodza vhoṱhe.

20 A lavhelesa vhafunziwa vhawe a ri:

“Hu takala inwi ni shayaho, ngauri Muvhuso wa Mudzimu ndi waṋu.+

21 “Hu takala inwi ni re na nḓala zwino, ngauri ni ḓo fushwa.+

“Hu takala inwi ni lilaho zwino, ngauri ni ḓo sea.+

22 “Ni takale musi vhathu vha tshi ni vhenga,+ vha tshi ni pandela,+ na u ni sema, vha tshi ni nyadza nga nṱhani ha Murwa muthu. 23 Ni takale na u pembela nga ḽeneḽo ḓuvha, ngauri ni ḓo fhaṱutshedzwa zwihulu ngei ṱaḓulu, ngauri vhomakhulukuku wavho vho ita zwi fanaho kha vhaporofita.+

24 “Fhedzi khombo kha inwi no pfumaho,+ ngauri no no ḓiphiṋa.+

25 “Khombo inwi no furaho zwino, ngauri ni ḓo farwa nga nḓala.

“Khombo inwi ni seaho zwino, ngauri ni ḓo ṱungufhala na lila.+

26 “Khombo musi vhathu vhoṱhe vha tshi ni khoḓa,+ ngauri na vhomakhulukuku wavho vho ita zwi fanaho kha vhaporofita vha mazwifhi.

27 “Ndi a ni vhudza inwi no thetshelesaho uri: Dzulani ni tshi funa maswina aṋu, ni tshi itela zwivhuya vhane vha ni vhenga,+ 28 ni tshi fhaṱutshedza vhane vha ni sema, ni tshi rabelela vhane vha ni tambudza.+ 29 Ane a ni rwa kha shama ni mu ṋekedze na ḽiṅwe, ane a ni dzhiela tshiambaro ni mu fhe na tshiṅwe.*+ 30 Ṋeani vhoṱhe vha ni humbelaho,+ ni songo vhila ane a dzhia tshithu tshaṋu.

31 “Zwiṅwe hafhu, zwine na funa vhathu vha tshi ni ita, na inwi ni vha ite zwenezwo.+

32 “Arali ni tshi funa vhane vha ni funa, ni ḓo vhuyelwa nga mini? Ngauri na vhaitazwivhi vha funa vhane vha vha funa.+ 33 Arali ni tshi itela zwivhuya vhane vha ni itela zwivhuya, ni ḓo vhuyelwa nga mini? Ngauri na vhaitazwivhi vha ita zwenezwo. 34 Zwiṅwe hafhu, arali ni tshi hadzima vhane na ḓivha uri vha ḓo ni lifhela, ni ḓo vhuyelwa nga mini?+ Na vhaitazwivhi vha hadzima vhaṅwe vhaitazwivhi uri vha vhuyelwe. 35 Fhedzi inwi dzulani ni tshi funa maswina aṋu na u ita zwivhuya na u hadzima ni sa lavheleli nzwalelo,+ ndi hone malamba aṋu a tshi ḓo vha manzhi, na vha vharwa vha Wa-Ṱaḓulu-ṱaḓulu, ngauri u na vhulenda kha vha sa livhuwi na vhavhi.+ 36 Dzulani ni tshi khathutshela, vhunga Khotsi aṋu a tshi khathutshela.+

37 “Zwiṅwe hafhu, litshani u haṱula uri ni si haṱulwe;+ ni litshe u vhona muthu mulandu uri ni si vhonwe mulandu. Dzulani ni tshi hangwela, na inwi ni ḓo hangwelwa.+ 38 Dzulani ni tshi ṋea, na inwi vhathu vha ḓo ni ṋea.+ Vha ḓo ni shelela kha tshiambaro muelo wo ḓalaho, wo gadelwaho wo khusiwaho, wa ḓala wa tevhukana. Ngauri muelo une na kala ngawo, na inwi ni ḓo kalelwa ngawo.”

39 A vha vhudza tshifanyiso a ri: “Naa muthu a sa vhoni a nga sumbedza a sa vhoni nḓila? Naa vhuvhili havho vha nga si wele dindini?+ 40 Mufunziwa ha fhiri we a mu funza, fhedzi o funzwaho zwavhuḓi u ḓo fana na we a mu funza. 41 Ndi ngani ni tshi sedza lufhanza lu re ḽiṱoni ḽa wahaṋu, ngeno inwi ni sa vhoni danda ḽi re ḽiṱoni ḽaṋu?+ 42 Ni nga amba hani na wahaṋu na ri, ‘Irani ndi ṱomole lufhanza ḽiṱoni ḽaṋu,’ ngeno inwi ni na danda ḽiṱoni ḽaṋu? Inwi ni re na muhoyo, thomani ni bvise danda ḽi re ḽiṱoni ḽaṋu, ndi hone ni tshi ḓo kona u vhona zwavhuḓi na bvisa lufhanza lu re ḽiṱoni ḽa wahaṋu.

43 “Ngauri muri wavhuḓi u nga si aṋwe mitshelo i si yavhuḓi na muri u si wavhuḓi u nga si aṋwe mitshelo yavhuḓi.+ 44 Muri u ḓivhiwa nga mitshelo yawo.+ Vhathu a vha fuli mahuyu kha miri ya mipfa kana u fula nḓirivhe kha miri ya mipfa. 45 Muvhuya u bvisa zwithu zwavhuḓi kha lupfumo lwawe lwavhuḓi lu re mbiluni yawe, fhedzi muvhi u bvisa zwithu zwivhi kha lupfumo lwawe luvhi, ngauri zwo ḓalaho mbiluni ndi zwine mulomo wa amba zwone.+

46 “Ndi ngani ni tshi mmbidza na ri, ‘Murena! Murena!’ fhedzi ni sa iti zwine nda amba?+ 47 Ane a ḓa kha nṋe a thetshelesa zwine nda zwi amba, a zwi ita, u fana na:+ 48 Muthu ane a ri a tshi fhaṱa nnḓu a bwa a adza mutheo wayo nṱha ha tombo. Musi hu tshi ḓa mukumbela wa kuḓa yeneyo nnḓu, a i dzinginyei, ngauri yo fhaṱwa zwavhuḓi.+ 49 Ane a pfa zwine nda amba a si ite tshithu,+ u fana na muthu ane a fhaṱa nnḓu mavuni hu si na mutheo. Mukumbela wa kuḓa yeneyo nnḓu nga khathihi fhedzi ya wa, tshinyalelo ya yeneyo nnḓu ya vha khulu.”