Mishumo Ya Vhaapostola
1 Iwe Theofilo, kha bugu yanga ya u thoma ye nda u ṅwalela, ndo ṅwala nga ha zwithu zwoṱhe zwe Yesu a zwi ita na u zwi funza,+ 2 u swikela nga ḓuvha ḽe a takulelwa ngaḽo nṱha,+ musi o no ṋea vhaapostola milayo a tshi livhiswa nga muya mukhethwa.+ 3 Musi o no tambudzwa, o ya khavho a vha sumbedza vhuṱanzi vhunzhi vhu fushaho+ ha uri u khou tshila. Vha fhedza maḓuvha a 40 vha tshi mu vhona, a tshi vha ṱalutshedza nga ha Muvhuso wa Mudzimu.+ 4 Musi a tshi ṱangana navho, o vha vhudza a ri: “Ni songo ṱuwa Yerusalema,+ fhedzi ni dzule no lindela zwe Khotsi a ni fhulufhedzisa,+ zwiḽa zwe nda ni vhudza nga hazwo; 5 ngauri Yohane o lovhedza nga maḓi, fhedzi inwi ni ḓo lovhedzwa nga muya mukhethwa+ hu si kale.”
6 Musi vho kuvhangana, vha vhudzisa Yesu vha ri: “Murena, naa u ḓo vusulusa muvhuso wa Isiraele zwino?”+ 7 Ene a ri: “Ndi Khotsi wa ṱaḓulu fhedzi ane a vha na maanḓa a u vhea tshifhinga tshine zwithu zwa ḓo itea ngatsho, inwi a no ngo tea u ḓivha tshenetsho tshifhinga.+ 8 Fhedzi ni ḓo wana maanḓa musi muya mukhethwa u tshi ḓa kha inwi,+ ni ḓo vha ṱhanzi+ dzanga Yerusalema+ na kha ḽoṱhe ḽa Yudea na Samaria,+ u swika magumoni a ḽifhasi.”+ 9 Musi o no amba zwenezwo, a takulelwa nṱha vha tshi kha ḓi vha vho lavhelesa, a tsirwa nga gole vhafunziwa vha si tsha mu vhona.+ 10 Vha tshi kha ḓi vha vho lavhelesa nṱha musi Yesu a tshi khou ṱuwa, ha bvelela vhanna vhavhili vho ambara zwiambaro+ zwitshena vha ima tsini navho, 11 vhenevho vhanna vha ri: “Vhanna vha Galilea, ndi ngani no ima no lavhelesa nṱha? Onoyo Yesu we na mu vhona a tshi takulelwa nṱha u ḓo vhuya nga nḓila i fanaho na ye na mu vhona a tshi ṱuwa ngayo.”
12 Vha vhuyelela Yerusalema+ vha tshi bva Thavhani ya Miṱwari he ha vha hu tsini na Yerusalema, hu tshikhala tshine tsha lingana na tshine tsha tshimbilwa nga Savhatha.* 13 Musi vha tshi swika, vha ya kamarani ya nṱha, he vha vha vha tshi dzula hone. Ho vha hu na Petro, Yohane, Yakobo, Andrea, Filipo, Thomasi, Baratholomeo, Mateo, Yakobo murwa wa Alifeo, Simoni a fhiseaho na Yudasi murwa wa Yakobo.+ 14 A vho ngo litsha u rabela nga vhuthihi, vhe na vhaṅwe vhafumakadzi+ na Maria mme a Yesu na vharathu vhawe.+
15 Misini yeneyo Petro a ima vhukati ha vhatendi ngae (vhathu vha re henefho vho vha vha tshi ṱoḓa u lingana 120) a ri: 16 Vhahashu, zwo vha zwo tea uri hu itee zwo ṅwaliwaho kha luṅwalo, samusi Davida o amba nga ha Yudasi+ a tshi livhiswa nga muya mukhethwa, ene we a vha o ranga phanḓa vhe vha fara Yesu.+ 17 Ngauri o vha e muṅwe washu,+ a tshi shuma na riṋe. 18 (Onoyo munna o renga tsimu nga tshelede ye a i wana nga u sa fhulufhedzea.+ O wa nga ṱhoho, thumbu ya phamuwa, mala a shuluwa.+ 19 Zwenezwo zwa ḓivhiwa nga vhathu vhoṱhe vha Yerusalema, ndi ngazwo yeneyo tsimu nga luambo lwavho vho i vhidza uri Hakeldama, zwine zwa amba uri, “Tsimu ya Malofha.”) 20 Ngauri kha bugu ya Dziphisalema ho ṅwaliwa u pfi, ‘Nnḓu yawe nga i sale i shubi, hu songo vha na ane a dzula khayo,’+ na ‘Mushumo wawe wa u vha mulavhelesi nga u dzhiiwe nga muṅwe.’+ 21 Ri tea u nanga munna muthihi kha vhanna vhe vha tshimbila na riṋe tshifhinga tshoṱhe musi ri na Murena Yesu a tshi khou ita mishumo yawe, 22 u bva a tshi lovhedzwa nga Yohane+ u swika nga ḓuvha ḽe a vhuyelela ṱaḓulu.+ A vhe e muṅwe we a zwi vhona na riṋe uri Yesu o vuswa.+
23 Vha nanga vhanna vhavhili, Mathia na Yosefa we a vha a tshi pfi Barasaba, ḽiṅwe a tshi pfi Yusto. 24 Vha rabela vha ri: “Iwe Yehova,* u ḓivhaho zwi re mbiluni dza vhathu vhoṱhe,+ ri sumbedze uri wo nanga ufhio kha havha vhanna vhavhili, 25 uri a dzhie mushumo wa u vha muapostola, we Yudasi a u ṱutshela a fara nḓila yawe.”+ 26 Vha ita madeṅwa,+ ha nangiwa Mathia, a vha muṅwe wa vhaapostola na vha 11.