Evangeli Ya Marko
7 Vhafarisei na vhaṅwe vhamaṅwalo vha bvaho Yerusalema vha kuvhanganela Yesu.+ 2 Vha vhona vhaṅwe vhafunziwa vhawe vha tshi khou ḽa nga zwanḓa zwi re na tshika, zwi songo ṱambaho.* 3 (Ngauri Vhafarisei na Vhayuda vhoṱhe a vha ḽi vha songo thoma vha ṱamba zwanḓa zwavho u swika kha lukuḓavhavha, vha tevhedza sialala ḽa vhomakhulukuku wavho, 4 musi vha tshi bva makete, a vha ḽi vha songo thoma vha ṱamba. Vha tevhela na maṅwe masialala manzhi a ngaho u ṱanzwa zwinwelo, nkho na midzio ya koporo.)+ 5 Vhenevha Vhafarisei na vhamaṅwalo vha mu vhudzisa vha ri: “Ndi ngani vhafunziwa vhau vha sa tevhedzi sialala ḽa vhomakhulukuku washu, vha tshi ḽa vha songo ṱamba zwanḓa?”+ 6 A vha fhindula a ri: “Inwi vha re na muhoyo, Yesaya o porofita zwone nga ha inwi, samusi zwo ṅwaliwa ha pfi, ‘Havha vhathu vha nkhulisa nga milomo yavho, ngeno mbilu dzavho dzi kule na nṋe.+ 7 U ngwadamela havho ndi ha mahandana, ngauri vha funza milayo ya vhathu.’+ 8 Ni pfuka mulayo wa Mudzimu na tevhedza sialala ḽa vhathu.”+
9 A dovha a ri: “Ni nyadza mulayo wa Mudzimu u itela u tevhedza sialala ḽaṋu.+ 10 Ngauri Mushe o ri, ‘Hulisa khotsi au na mme au,’+ a dovha a ri, ‘A semaho khotsi awe kana mme awe nga a vhulawe.’+ 11 Fhedzi inwi ni ri, ‘Ane a amba na khotsi awe kana mme awe a ri: “Zwe nda vha ndi tshi nga u thusa ngazwo ndi korobani (ndi tshifhiwa tshine tsha tea u ṋewa Mudzimu),”’ 12 a ni tsha tendela onoyo muthu a tshi itela khotsi awe kana mme awe tshithu na tshithihi.+ 13 No ita uri ipfi ḽa Mudzimu ḽi si vhe ḽa ndeme nga nṱhani ha masialala aṋu e na a fhirisela kha vhaṅwe.+ Ni ita zwithu zwinzhi zwi fanaho na zwenezwi.”+ 14 A dovha a vhidza gogo a amba naḽo a ri: “Thetshelesani noṱhe, ni ṱalukanye.+ 15 Muthu u tshikafhadziwa nga zwine zwa bva khae, hu si nga zwine zwa dzhena khae.”+ 16* ——
17 A sia vhathu nnḓa a dzhena nḓuni, vhafunziwa vhawe vha thoma u mu vhudzisa nga ha tshenetsho tshifanyiso.+ 18 Yesu a amba navho a ri: “Naa na inwi a ni pfesesi u fana navho? Naa a ni zwi ḓivhi uri muthu ha tshikafhadziwi nga zwi dzhenaho khae? 19 Ngauri a zwi yi mbiluni, zwi ya thumbuni zwa kona u bva.” A vha vhudza uri zwiḽiwa zwoṱhe zwo kuna. 20 A dovha a ri: “Muthu u tshikafhadziwa nga zwine zwa bva khae.+ 21 Ngauri mbiluni ya muthu+ ndi hone hune ha bva mihumbulo mivhi: u ḓifara luvhi nga zwa vhudzekani,* vhuvhava, u vhulaya, 22 vhupombwe, tseḓa, vhuvhi, vhufhura, u ita tshivhi u sa shoni,* vivho, maṱamba, u ḓikukumusa na vhutsilu. 23 Zwenezwi zwivhi zwoṱhe zwi bva kha muthu, ndi zwone zwine zwa mu tshikafhadza.”
24 A ṱuwa henefho a ya madzinguni a Tiro na Sidoni.+ A tshi swika a dzhena nḓuni, o vha a sa ṱoḓi uri vhathu vha zwi ḓivhe uri o swika, fhedzi vhathu vha zwi ḓivha. 25 Musi mufumakadzi a re na ṅwananyana a re na dimoni a tshi pfa nga ha Yesu, a ḓa nga u ṱavhanya a gwadama milenzheni yawe.+ 26 Onoyo mufumakadzi o vha e Mugerika, wa lushaka lwa* Sirofenike; o vha a tshi khou mu humbela lunzhi-lunzhi uri a pandele dimoni ḽi re kha ṅwananyana wawe. 27 Fhedzi Yesu a amba nae a ri: “Litsha vhana vha ḽe vha fure u thoma, ngauri zwo khakhea u dzhia zwiḽiwa zwa vhana zwa ṋewa zwibwanana.”+ 28 Mufumakadzi a mu fhindula a ri: “Ndi zwone muṋe wanga, fhedzi na zwibwanana zwi re fhasi ha ṱafula zwi a ḽa matshakatshaka o wiswaho nga vhana.” 29 Yesu a amba nae a ri: “Nga nṱhani ha zwe wa amba, tshimbila; dimoni ḽo bva kha ṅwananyana wau.”+ 30 Musi onoyo mufumakadzi a tshi swika hayani, a wana ṅwananyana wawe o eḓela, dimoni ḽo bva khae.+
31 Musi Yesu a tshi ṱuwa dzinguni ḽa Tiro, a tshi ya tsini na Lwanzhe lwa Galilea, o fhira nga Sidoni na dzinguni ḽa Dikapoli.*+ 32 Vha mu ḓisela munna o dzingaho nḓevhe a sa koni u amba zwavhuḓi,+ vha mu humbela uri a mu vhee zwanḓa. 33 Yesu a mu vhidzela thungo, a dzhenisa minwe yawe nḓevheni dza onoyo munna, a pfa mare, a mu kwama lulimi.+ 34 A lavhelesa ṱaḓulu, a femuluwa a amba nae a ri: “Efata,” zwine zwa amba uri, “Vulea.” 35 Ngauralo, nḓevhe dzawe dza vulea,+ a thoma u amba zwavhuḓi. 36 Tshifhinga tshoṱhe a tshi vha laya uri vha si vhudze muthu,+ vhone vho vha vha tshi tou ṋaṋa u zwi amba.+ 37 Ngauri zwo vha zwo vha mangadza zwihulu,+ vha ri: “Zwoṱhe zwe a zwi ita ndi zwavhuḓi. U ita uri vho dzingaho nḓevhe vha pfe, vha sa koni u amba vha ambe.”+