Vhurifhi Ha U Thoma Vhu Yaho Kha Vhakorinta

10 Vhahashu, ndi ṱoḓa ni tshi ḓivha uri vhomakhulukuku washu vhoṱhe vho vha vhe nga fhasi ha gole,+ vhoṱhe vho wela lwanzhe,+ 2 vhoṱhe vho lovhedzwa sa vhatevheli vha Mushe musi vhe nga fhasi ha gole na musi vhe lwanzheni, 3 vhoṱhe vho ḽa zwiḽiwa zwi fanaho zwi bvaho kha Mudzimu,+ 4 vhoṱhe vho nwa maḓi a bvaho kha Mudzimu.+ Ngauri vho vha vha tshi nwa maḓi a bvaho kha tombo ḽe ḽa vha ḽi tshi nga ḽi khou vha tevhela, ḽeneḽo tombo ḽo vha ḽi tshi bva kha Mudzimu, ḽi tshi imela* Kristo.+ 5 Fhedzi Mudzimu ho ngo takalela vhunzhi havho, ndi ngazwo vho vhulawa sogani.+

6 Zwenezwo zwithu ndi tsumbo kha riṋe, uri ri si tame zwithu zwivhi u fana navho.+ 7 Ni songo rabela midzimu ya zwifanyiso, u fana na vhaṅwe vhavho; samusi ho ṅwaliwa u pfi: “Vho ḽa na u nwa, vha ḓiphiṋa.”+ 8 Ri songo ḓifara luvhi nga zwa vhudzekani* u fana na vhaṅwe vhavho, ngauri ho fa vha 23 000 nga ḓuvha ḽithihi.+ 9 Ri songo linga Yehova* u fana na vhaṅwe vhavho vhe vha mu linga,+ vha lumiwa nga ṋowa vha fa.+ 10 Ni songo gungula u fana na vhaṅwe vhavho,+ vhe vha vhulawa nga mutshinyadzi.+ 11 Zwenezwo zwithu zwo itea khavho uri zwi vhe tsumbo, zwo ṅwaliwa uri zwi sevhe riṋe+ vhane ra khou tshila vhufheloni ha ḽino shango.*

12 Nga nṱhani ha zwenezwo, ane a humbula uri o ima a ṱhogomele uri a si we.+ 13 A hu na mulingo une na khou sedzana nawo we vhaṅwe vha si sedzane nawo.+ Fhedzi Mudzimu u a fhulufhedzea, ha nga tendi ni tshi lingwa lune na sa kone u konḓelela,+ musi ni tshi lingwa u ḓo ni vulela nḓila ine na ḓo bva ngayo uri ni kone u konḓelela.+

14 Ngauralo vhafunwa, ni songo rabela* midzimu ya zwifanyiso.+ 15 Samusi ni na ṱhalukanyo; ḓiiteleni phetho arali zwine nda amba hu ngoho. 16 Naa a ri khou vhuyelwa nga malofha a Kristo musi ri tshi nwa tshinwelo tsha u livhuwa tshine ra tshi rabelela?+ Naa a ri khou vhuyelwa nga muvhili wa Kristo musi ri tshi ṅwatekanya vhurotho ra ḽa?+ 17 Hu na ḽofo nthihi, naho ri vhanzhi, ri muvhili muthihi,+ ngauri roṱhe ri khou ḽa yeneyo ḽofo nthihi.

18 Ṱhogomelani zwe zwa itwa nga Vhaisiraele: Musi vha tshi ḽa zwiṱhavhelo zwi ṋekedzwaho aḽeṱareni zwo vha zwi tshi nga vha khou ḽa na Mudzimu.+ 19 Naa ndi khou amba uri: “Midzimu ya zwifanyiso na zwine zwa ṋekedzwa midzimu ya zwifanyiso ndi zwa ndeme”? 20 Hai; ndi khou amba uri zwithu zwine tshaka dza zwi ṋekedza, dzi khou zwi ṋekedza madimoni, hu si Mudzimu.+ A thi ṱoḓi ni tshi ṱanganela na madimoni.+ 21 Ni nga si kone u nwa tshinwelo tsha Yehova* na dovha na nwa tshinwelo tsha madimoni; ni nga si kone u ḽa “ṱafulani ḽa Yehova”*+ na ṱafulani ḽa madimoni. 22 ‘Naa a ri khou sinyusa Yehova’?*+ Kani ri na maanḓa u mu fhira?

23 Zwithu zwoṱhe zwo tendelwa, fhedzi a si zwoṱhe zwi vhuyedzaho. Zwithu zwoṱhe zwo tendelwa, fhedzi a si zwoṱhe zwine zwa fhaṱa.+ 24 Muṅwe na muṅwe nga a ṱoḓe zwi vhuyedzaho muṅwe, hu si zwi vhuyedzaho ene muṋe fhedzi.+

25 Iḽani ṋama ine ya rengiswa makete, ni songo vhudzisa nga nṱhani ha luvalo lwaṋu, 26 ngauri “ḽifhasi ndi ḽa Yehova* na zwoṱhe zwi re khaḽo.”+ 27 Arali no rambiwa nga ane a si vhe mutendi, ni tshi ṱoḓa u ya, ni ḽe zwoṱhe zwine na ṋewa, ni songo vhudzisa nga nṱhani ha luvalo lwaṋu. 28 Fhedzi arali muṅwe muthu a ri, “Heyi ndi ṋama yo ṋekedzwaho midzimu ya zwifanyiso,” ni songo ḽa uri ni si khukhulise luvalo lwawe na lwa vhaṅwe.+ 29 Ndi khou amba nga luvalo lwa muṅwe muthu, hu si lwaṋu. Naho ndi tshi nga ita zwine nda funa, a thi nga zwi iti uri ndi si khukhulise muṅwe.+ 30 Naho nda ḽa ndo livhuwa, naa ndi fanela u ḽa arali zwi tshi ita uri vhaṅwe vha ntsatsaladze?+

31 Nga zwenezwo, musi ni tshi ḽa, ni tshi nwa kana ni tshi ita naho tshi tshini, ni ite zwoṱhe uri ni rendise Mudzimu.+ 32 Ni songo khukhulisa Vhayuda na Vhagerika na tshivhidzo tsha Mudzimu,+ 33 samusi ndi tshi takadza vhathu vhoṱhe nga zwithu zwoṱhe, ndi sa ṱoḓi u ḓivhuyedza,+ fhedzi ndi tshi ṱoḓa u vhuyedza vhanzhi, uri vha tshidzwe.+