Bugu Ya U Thoma Ya Dzikhosi
19 Ahaba+ a vhudza Isabele+ zwoṱhe zwe Elia a zwi ita na nḓila ye a vhulaya ngayo vhaporofita vhoṱhe nga banga.+ 2 Nga zwenezwo, Isabele a rumela mulaedza kha Elia, a ri: “Ngavhe midzimu i tshi nnyita zwa uri na zwa uri i dovhe i engedze, arali matshelo nga tshenetshi tshifhinga nda sa u ita u fana na muṅwe na muṅwe wavho!” 3 Elia a tshuwa, a shavha.+ A swika Beresaba,+ une wa vha muḓi wa Yuda,+ a sia muḓinḓa wawe henefho. 4 A tshimbila ḓuvha ḽoṱhe a ya sogani a dzula fhasi ha tshiṱaka. A humbela uri a fe. A ri: “Iwe Yehova dzhia vhutshilo hanga,+ ngauri a thi khwine u fhira vhomakhulukuku wanga.”
5 A eḓela henefho fhasi ha tshiṱaka, a farwa nga khofhe. Muruṅwa a ṱavhanya a mu kwama+ a amba nae a ri: “Vuwa u ḽe.”+ 6 Musi a tshi lavhelesa, a vhona ḽofo yo gotshiwaho kha matombo na mudzio wa maḓi zwi henefho tsini na ṱhoho yawe. A ḽa na u nwa, a dovha a eḓela. 7 Nga murahu muruṅwa wa Yehova a dovha a ḓa khae lwa vhuvhili a mu kwama, a ri: “Vuwa u ḽe ngauri lwendo lu kha ḓi vha lulapfu.” 8 A vuwa a ḽa na u nwa, zwenezwo zwiḽiwa zwa ita uri a vhe na nungo, a tshimbila maḓuvha a 40 na vhusiku ha 40 a vhuya a swika Horebe, thavhani ya Mudzimu wa ngoho.+
9 A dzhena bakoni,+ a eḓela henefho; Yehova a amba nae a ri: “Elia, u khou ṱoḓa mini fhano?” 10 A fhindula a ri: “Ndo shumela Yehova Mudzimu wa mavhuthu nga u fhisea;+ vhathu vha Isiraele vho ṱutshela mulanga wau,+ vho thutha aḽeṱare dzau, vho vhulaya vhaporofita vhau nga banga,+ ndo sala ndi ndoṱhe. Na nṋe vha ṱoḓa u mmbulaya.”+ 11 Fhedzi a ri: “Bvela nnḓa u ime kha thavha phanḓa ha Yehova.” Yehova o vha a tshi khou fhira+ nga henefho hu na ḓumbu ḽihulu ḽi tshi khou fhandula dzithavha na u kwasha matombo mahulu phanḓa ha Yehova,+ fhedzi Yehova o vha e siho kha ḽeneḽo ḓumbu. Musi ḓumbu ḽi tshi dzika ha vha na mudzinginyo,+ fhedzi Yehova o vha e siho kha wonoyo mudzinginyo. 12 Mudzinginyo wa tevhelwa nga mulilo,+ fhedzi Yehova o vha e siho kha mulilo. Musi mulilo wo no dzima ha pfala ipfi ḽi tshi ambela fhasi.+ 13 Musi Elia a tshi tou ḽi pfa, a tibedza tshifhaṱuwo tshawe nga tshiambaro+ a bvela nnḓa a ima mulomoni wa bako. Ipfi ḽa mu vhudzisa ḽa ri: “Elia, u khou ṱoḓa mini fhano?” 14 A fhindula a ri: “Ndo shumela Yehova Mudzimu wa mavhuthu nga u fhisea; vhathu vha Isiraele vho ṱutshela mulanga wau,+ vho thutha aḽeṱare dzau, vho vhulaya vhaporofita vhau nga banga, ndo sala ndi ndoṱhe. Na nṋe vha ṱoḓa u mmbulaya.”+
15 Yehova a amba nae a ri: “Humela murahu u ye sogani ḽa Damaseko. Musi u tshi swika, u ḓodze Hasaele+ uri a vhe khosi ya Siria. 16 U fanela u ḓodza Yehu+ muḓuhulu wa Nimisi uri a vhe khosi ya Isiraele, u ḓodze na Elisha* murwa wa Shafati wa ngei Abele-mehola uri a vhe muporofita vhudzuloni hau.+ 17 Ane a ponyoka banga ḽa Hasaele,+ u ḓo vhulawa nga Yehu;+ ane a ponyoka banga ḽa Yehu, u ḓo vhulawa nga Elisha.+ 18 Ndi kha ḓi vha na vhathu vha 7 000 kha ḽa Isiraele,+ vhe vha si gwadamele Baali+ kana u mu khisa.”+
19 A ya henengei a wana Elisha murwa wa Shafati a tshi khou lima nga mboho dza zwipano zwa 12 dzi phanḓa hawe, ene o ima tsini na tshipano tsha vhu 12. Elia a ya khae a mu ambadza tshiambaro tshawe.+ 20 A sia mboho a tevhela Elia, a ri: “Ndi khou humbela uri u ntendele ndi ye u khisa khotsi anga na mme anga. Ndi hone ndi tshi ḓo u tevhela.” Elia a fhindula a ri: “Tshimbila, a thi u haneli.” 21 Ngauralo, a huma a dzhia mboho mbili a dzi ita tshiṱhavhelo, a shumisa dzhogo u vholomisa ṋama ya dzenedzo mboho a i ṋea vhathu vha ḽa. Nga murahu ha zwenezwo, a tevhela Elia a thoma u mu shumela.+