Evangeli Ya Marko

6 Yesu a ṱuwa henefho a ya muḓini wa hawe,+ vhafunziwa vhawe vha mu tevhela. 2 Nga Savhatha a thoma u funza sinagogoni, vhanzhi vho mu thetshelesaho vha mangala vha ri: “Uyu munna o wana ngafhi zwenezwi zwithu?+ Ndi ngani o ṋewa honovhu vhuṱali na vhukoni ha u ita yeneyi mishumo ya maanḓa nga zwanḓa zwawe?+ 3 Naa uyu a si muvhaḓi,+ murwa wa Maria,+ ane a vha mukomana wa Yakobo,+ Yosefa, Yudasi na Simoni?+ Avha vhane vha vha vhukati hashu a si khaladzi dzawe?” Vha thoma u khukhulisea nga nṱhani hawe. 4 Yesu a amba navho a ri: “Muporofita a nga huliswa hoṱhe, fhedzi ha huliswi muḓini wa hawe na nga mashaka awe na hayani hawe.”+ 5 Ho ngo ita mishumo ya maanḓa henefho nga nnḓa ha u vhea zwanḓa vhalwadze vha si gathi, a vha fhodza. 6 O mangadzwa ngauri vho vha vhe si na lutendo. A tshimbila u mona na miḓana ya henefho a tshi khou+ funza.

7 A vhidza vhaapostola vha 12, a vha ruma nga vhavhili nga vhavhili,+ a vha ṋea maanḓa a u pandela madimoni.+ 8 A dovha a vha vhudza uri musi vha tshi fara lwendo vha songo ṱuwa na tshithu, vha ṱuwe na lubaḓa fhedzi, vha songo ṱuwa na vhurotho, mukhwama wa zwiḽiwa na tshelede,*+ 9 fhedzi vha ambare thovho,* vha si ṱuwe na zwiṅwe zwiambaro.* 10 A dovha a ri: “Nnḓu ine na dzhena khayo, ni dzule khayo u swika ni tshi ṱuwa.+ 11 Hoṱhe hune na si ṱanganedzwe kana hune na si thetsheleswe, ni fhufhure buse ḽi re milenzheni yaṋu musi ni tshi ṱuwa henefho uri zwi vhe vhuṱanzi khavho.”+ 12 Vha ya vha huwelela uri vhathu vha rembuluwe,+ 13 vha pandela madimoni+ manzhi na u ḓodza vhalwadze vhanzhi mapfura na u vha fhodza.

14 Khosi Herode a pfa nga hazwo, ngauri dzina ḽa Yesu ḽo vha ḽi tshi ḓivhiwa hoṱhe, vhathu vha tshi ri: “Yohane Mulovhedzi o vuswa vhafuni, ndi ngazwo a tshi ita yeneyi mishumo ya maanḓa.”+ 15 Fhedzi vhaṅwe vho vha vha tshi ri: “Ndi Elia.” Vhaṅwe vha tshi ri: “Ndi muporofita u fana na vhaṅwe vhaporofita vha kale.”+ 16 Musi Herode a tshi zwi pfa, a ri: “Ndi Yohane we nda mu tumula ṱhoho, o vuswa.” 17 Herode o vha o ruma vhathu uri vha fare Yohane vha mu valele dzhele a tshi itiswa nga Herodia, mufumakadzi wa Filipo, mukomana wawe. Ngauri Herode o vha o mu vhinga.+ 18 Yohane o vha a tshi dzula a tshi vhudza Herode uri: “A wo ngo tendelwa u vhinga mufumakadzi wa mukomana wau.”+ 19 Herodia o vha o fara Yohane nga mbilu, a tshi ṱoḓa u mu vhulaya, fhedzi a sa koni. 20 Herode o vha a tshi ofha Yohane, ngauri o vha a tshi zwi ḓivha uri ndi munna mukhethwa, o lugaho.+ Herode o vha a tshi mu tsireledza. Tshifhinga tshoṱhe musi a tshi pfa Yohane a tshi amba, o vha a sa ḓivhi uri a ite mini, naho zwo ralo, o bvela phanḓa a tshi takalela u mu thetshelesa.

21 Herodia a wana tshibuli musi Herode a tshi itela tshilalelo vhaḓinḓa vhawe vhahulwane, vhalangammbi na vhaḓivhalea vha Galilea+ nga ḓuvha ḽa Herode ḽa mabebo.+ 22 Ṅwananyana wa Herodia a dzhena a tshina, a takadza Herode na vhe a vha a tshi khou ḽa navho. Khosi ya amba na ṅwananyana ya ri: “Nkhumbele tshine wa tshi ṱoḓa, ndi ḓo u ṋea tshone.” 23 A mu anela a ri: “Tshine wa nkhumbela ndi ḓo u ṋea, naho hu u u fhandulela muvhuso wanga nga vhukati.” 24 A ya a vhudzisa mme awe a ri: “Ndi humbele mini?” Mme awe a ri: “Humbela ṱhoho ya Yohane Mulovhedzi.” 25 A vhuyelela kha khosi nga u ṱavhanya a ri: “Mphe ṱhoho ya Yohane Mulovhedzi i kha ndilo.”+ 26 Naho zwenezwo zwo ṱungufhadza khosi zwihulu, yo vha i sa ṱoḓi u mu dzima zwe a vha o zwi humbela, ngauri yo vha yo ana phanḓa ha vhe ya vha i tshi khou ḽa navho. 27 Khosi ya ruma mulindi uri a ḓise ṱhoho ya Yohane. Onoyo mulindi a ya a tumula ṱhoho ya Yohane dzhele, 28 a i ḓisa i kha ndilo. A i ṋea ṅwananyana, ene a i ṋea mme awe. 29 Musi vhafunziwa vhawe vha tshi zwi pfa, vha ḓa vha dzhia tshitumbu tshawe vha tshi vhulunga vhiḓani.

30 Vhaapostola vha ḓa vha kuvhanganela Yesu, vha mu ṱalutshedza zwoṱhe zwe vha zwi ita na zwe vha zwi funza.+ 31 A amba navho a ri: “Kha ri ye u awelenyana fhethu hu re kule na miḓi.”+ Ngauri ho vha hu na vhathu vhanzhi vha dzhenaho vha tshi bva, vha sa koni u wana tshifhinga tsha u awela na tsha u ḽa. 32 Vha ṱuwa nga tshikepe vha ya fhethu hu re kule na miḓi uri vha vhe kule na vhathu.+ 33 Fhedzi vhathu vha vha vhona vha tshi khou ṱuwa, vhanzhi vha zwi ḓivha, vha gidima nga milenzhe vha tshi bva miḓini yoṱhe vha swika u thoma. 34 Musi a tshi tsa tshikepeni a vhona gogo ḽihulu, a ḽi pfela vhuṱungu+ ngauri ḽo vha ḽi tshi nga nngu dzi si na mulisa.+ A thoma u vha funza zwithu zwinzhi.+

35 Musi ḽi tshi vho kovhela, vhafunziwa vhawe vha ḓa vha amba nae vha ri: “Hafha fhethu ndi kule na miḓi, ḽi khou kovhela.+ 36 Vha litshe vha ṱuwe uri vha kone u ya mivhunduni na miḓanani vha renge zwiḽiwa.”+ 37 Yesu a amba navho a ri: “Inwi vha ṋeeni zwiḽiwa.” Vhone vha ri: “Naa ri ye u renga vhurotho ha dinari* dza 200 ri vha ṋee?”+ 38 Ene a ri: “Iyani u sedza uri ni na ḽofo nngana.” Musi vho no sedza vha ri: “Ri na ḽofo ṱhanu na khovhe mbili.”+ 39 A vhudza vhathu vhoṱhe uri vha dzule hatsini nga zwigwada.+ 40 Kha zwenezwo zwigwada, zwiṅwe zwo vha zwi na vhathu vha 100, zwiṅwe zwi na vha 50. 41 A dzhia dziḽa ḽofo ṱhanu na khovhe mbili, a lavhelesa ṱaḓulu, a zwi fhaṱutshedza.+ Nga murahu, a ṅwatekanya dziḽa ḽofo a dzi ṋea vhafunziwa vhawe uri vha ṋee vhathu, a kovhekanyela vhathu vhoṱhe dziḽa khovhe mbili. 42 Vhoṱhe vha ḽa vha fura, 43 vha kuvhanganya matshakatshaka a vhurotho a ḓadza mimanngi ya 12, hu songo vhalwa na matshakatshaka a khovhe.+ 44 Vho ḽaho vhurotho vho vha vhe vhanna vha 5 000.

45 A ṱavhanya a vhudza vhafunziwa vhawe uri vha ṋamele tshikepe uri vha mu range phanḓa, vha wele seli thungo ha Betsaida, ene a vhudza gogo uri ḽi ṱuwe.+ 46 Musi vhathu vho no ṱuwa, a gonya thavhani u rabela.+ 47 Musi ḽo no kovhela, tshikepe tsho vha tshi vhukati ha lwanzhe, fhedzi Yesu o vha o sala e eṱhe thavhani.+ 48 Nga maḓautsha* a vhona vhafunziwa vha tshi khou kundelwa u langa tshikepe, ngauri ho vha hu na ḓumbu, a ya khavho a tshi khou tshimbila nṱha ha maḓi lwanzheni, fhedzi a nga u a vha fhira. 49 Musi vhafunziwa vhawe vha tshi mu vhona a tshi khou tshimbila nṱha ha maḓi, vha tshuwa vha ri: “Ndi bono!” Vha ṱavha mukosi. 50 Vhoṱhe vha tshi mu vhona vha tshuwa. Nga u ṱavhanya a amba navho a ri: “Ni songo ofha, ndi nṋe.”+ 51 A dzhena tshikepeni, ḓumbu ḽa dzika. Zwenezwo zwa vha mangadza vhukuma, 52 ngauri vho vha vha sa pfesesi zwine vhuṱolo ha vhurotho ha amba zwone, vho vha vha tshi kha ḓi kundelwa u pfesesa maanḓa a Yesu.

53 Musi vha tshi wela seli, vha dzhena shangoni ḽa Genetsareta vha imisa tshikepe tshavho henefho.+ 54 Musi vha tshi tou tsa tshikepeni, vhathu vha mu ḓivha. 55 Vha gidima na dzingu ḽoṱhe, vha isa vhalwadze kha Yesu vhe kha vhulalo havho. 56 Vho vha vha tshi ḓisa vhalwadze makete, kha miḓi na miḓana ye a vha a tshi ya khayo, vha tshi mu humbela uri vha tou kwama zwavho lupendelo lwa tshiambaro tshawe.+ Vhoṱhe vho lu kwamaho vha fhola.