Evangeli Ya Mateo
26 Musi Yesu a tshi fhedza u amba enea mafhungo oṱhe, a amba na vhafunziwa vhawe a ri: 2 “Ni a zwi ḓivha uri ho sala maḓuvha mavhili uri hu swike ḓuvha ḽa Paseka,+ Murwa muthu u ḓo kumedzwa uri a ombelwe kha danda.”+
3 Vhahulwane vha vhotshifhe na vhahulwane vha vhathu vha kuvhangana muṱani wa tshifhe muhulu Kayafa,+ 4 vha langana uri vha itele Yesu vhukwila,+ uri vha mu fare vha mu vhulaye. 5 Naho zwo ralo, vho vha vha tshi ri: “Ri songo mu fara vhuṱamboni uri vhathu vha si vuse bonyongo.”
6 Musi Yesu e Bethania nḓuni ya Simoni we kale a vha e na mapele,+ 7 muṅwe mufumakadzi a ḓa khae o fara mudzio wa alabasita u re na mapfura a nukhelelaho a ḓuraho, a ḓodza Yesu kha ṱhoho musi o dzula a tshi khou ḽa. 8 Musi vhafunziwa vha tshi zwi vhona, vha sinyuwa vha ri: “Ndi ngani a tshi khou tambisa mapfura? 9 O vha a tshi nga vha o rengiswa nga tshelede nnzhi, ya ṋewa vhashai.” 10 Musi Yesu a tshi ṱhogomela zwenezwo, a ri: “Uyu mufumakadzi ni khou mu dinela mini? O nnyitela zwithu zwavhuḓi. 11 Vhashai ni ḓo dzula ni navho,+ fhedzi a ni nga vhi na nṋe misi yoṱhe.+ 12 Musi hoyu mufumakadzi a tshi ḓodza muvhili wanga mapfura, o zwi itela u lugiselela mbulungo yanga.+ 13 Ngoho ndi a ni vhudza uri, hu ḓo ambiwa nga ha zwe onoyu mufumakadzi a zwi ita hoṱhe hune enea mafhungo maḓifha a ḓo ḓivhadzwa hone.”+
14 Muṅwe wa vhaapostola vha 12, ane a pfi Yudasi Iskariote+ a ya kha vhahulwane vha vhotshifhe,+ 15 a ri: “Arali nda mu fheṱa kha inwi, ni ḓo nṋea mini?”+ Vha mu fhulufhedzisa u mu ṋea shekele dza 30 dza siḽiva.+ 16 U bva nga tshenetsho tshifhinga, a dzula a tshi ṱoḓa tshibuli tsha u mu fheṱa.
17 Nga ḓuvha ḽa u thoma ḽa Vhuṱambo ha Vhurotho vhu si na Mbiliso,+ vhafunziwa vha ḓa kha Yesu vha ri: “U ṱoḓa ri tshi u lugiselela ngafhi Paseka?”+ 18 A ri: “Iyani muḓini wa Mugede ni mu vhudze uri, ‘Mufunzi u ri: “Tshifhinga tshanga tsho vhewaho tshi tsini; ndi khou ṱoḓa u pembelela Paseka na vhafunziwa vhanga muḓini wau.”’” 19 Vhafunziwa vha ita zwe Yesu a vha vhudza, vha lugiselela Paseka.
20 Musi ḽo no kovhela,+ a dzula ṱafulani na vhafunziwa vha 12.+ 21 Musi vha tshi khou ḽa, Yesu a ri: “Ngoho ndi a ni vhudza ndi ri, muṅwe waṋu u ḓo mpheṱa.”+ 22 Vhafunziwa vha ṱungufhala zwihulu, vhoṱhe vha mu vhudzisa vha ri: “Murena, kani ndi nṋe?” 23 A fhindula a ri: “Ane a ḓo thotha na nṋe tshigoḓeloni ndi ene ane a ḓo mpheṱa.+ 24 Ndi ngoho uri Murwa muthu u khou ṱuwa, samusi zwo ṅwaliwa nga hae, fhedzi khombo+ kha ane a fheṱa Murwa muthu!+ Zwo vha zwi tshi ḓo vha zwi khwine arali a songo vhuya a bebwa.”+ 25 Yudasi we a vha a tshi ḓo mu fheṱa, a ri: “Rabi, kani ndi nṋe?” Yesu a ri: “Ndi iwe wo zwi ambaho.”
26 Musi vha tshi khou ḽa, Yesu a dzhia vhurotho, a vhu fhaṱutshedza, a vhu ṅwata,+ a vhu ṋea vhafunziwa vhawe, a ri: “Dzhiani ni ḽe. Vhu imela muvhili wanga.”+ 27 A dzhia tshinwelo, a livhuwa, a vha ṋea tshone, a ri: “Inwani ngatsho noṱhe,+ 28 ngauri tshi imela ‘malofha+ anga a mulanga,’+ ane a ḓo shululelwa vhanzhi+ uri vha hangwelwe zwivhi.+ 29 Ndi a ni vhudza uri, a thi tsha ḓo dovha nda nwa waini u swikela ndi tshi nwa waini ntswa na inwi Muvhusoni wa Khotsi anga.”+ 30 Musi vho no renda Mudzimu nga u mu imbela,* vha ya Thavhani ya Miṱwari.+
31 Yesu a amba navho a ri: “Vhusiku honovhu noṱhe ni ḓo nṱutshela ni tshi vhona zwine zwa ḓo itea kha nṋe, ngauri ho ṅwaliwa u pfi: ‘Ndi ḓo rwa mulisa, nngu dza balangana.’+ 32 Musi ndo no vuswa, ndi ḓo ni ranga phanḓa ra ṱangana Galilea.”+ 33 Fhedzi Petro a ri: “Naho vhaṅwe vhoṱhe vha tshi ḓo u ṱutshela vha tshi vhona zwine zwa itea kha iwe, nṋe ndi nga si ḓo vhuya nda u ṱutshela!”+ 34 Yesu a tshi pfa zwenezwo, a ri: “Ngoho ndi a u vhudza ndi ri, vhusiku vhuno, u ḓo nndandula luraru mukukulume u sa athu u lila.”+ 35 Petro a amba nae a ri: “Ndi nga si vhuye nda u landula, naho ha pfi ndi fe na iwe.”+ Na vhaṅwe vhafunziwa vhoṱhe vha amba zwi fanaho.
36 Yesu a ya navho fhethu hune ha pfi Getsemane,+ a amba na vhafunziwa a ri: “Dzulani hafha, nṋe ndi kha ḓi ya u rabela hafhaḽa.”+ 37 A ṱuwa na Petro na vharwa vhavhili vha Sebedeo. A ṱungufhala na u tsikeledzea zwihulu.+ 38 A amba navho a ri: “Ndo ṱungufhala zwihulu lune nda tou nga ndi sa fa. Dzulani hafha, ni dzule no fhaṱuwa na nṋe.”+ 39 A fhirela phanḓanyana, a gwadama, a rabela a ri:+ “Khotsi anga, arali zwi tshi konadzea, tshinwelo+ itshi kha tshi mpfuke. Naho zwo ralo, hu songo itwa zwine nṋe nda zwi funa, fhedzi nga hu itwe zwi funwaho nga iwe.”+
40 A tshi vhuya a wana vhafunziwa vho eḓela, a amba na Petro a ri: “Naa ni tou kundwa u fhaṱuwa na nṋe awara nthihi fhedzi?+ 41 Dzulani no fhaṱuwa,+ ni bvele phanḓa+ ni tshi rabela uri ni si dzhene mulingoni.+ Mbilu i a zwi funa, fhedzi ṋama a i na maanḓa.”+ 42 A ya a rabela lwa vhuvhili, a ri: “Khotsi anga, arali zwi sa konadzei uri tshinwelo itshi tshi pfuke ndi sa tshi nwe, kha hu itwe zwine iwe wa zwi funa.”+ 43 A dovha a vhuya a wana vho eḓela, ngauri maṱo avho o vha a tshi khou lemela nga khofhe. 44 A ṱuwa a vha sia, a ya a rabela lwa vhuraru, a dovha a amba zwi fanaho. 45 A vhuyelela kha vhafunziwa vhawe, a ri: “Ndi ngani no eḓela na u awela nga tshifhinga tsho raliho? Tshifhinga tsho swika tsha uri Murwa muthu a kumedzwe zwanḓani zwa vhaitazwivhi. 46 Vuwani ri ṱuwe. O mpheṱaho o swika.” 47 Musi a tshi kha ḓi amba, ha swika Yudasi, muṅwe wa vha 12, e na vhathu vhanzhi vho faraho mabanga na thonga, vho rumiwa nga vhahulwane vha vhotshifhe na vhahulwane vha vhathu.+
48 O mu fheṱaho o vha o no vha ṋea tshiga, a ri: “Ane nda ḓo mu khisa ndi ene; ni mu fare.” 49 A ya kha Yesu a ri: “Ri a vusa Rabi!” A mu khisa. 50 Fhedzi Yesu a amba nae a ri: “No ḓela mini fhano?”+ Ndi hone vha tshi ḓa vha fara Yesu. 51 Muṅwe wa vha re na Yesu a bvisa banga, a tumula nḓevhe ya mulanda wa tshifhe muhulu.+ 52 Yesu a amba nae a ri: “Vhuyedzedza banga ḽau vhudzuloni haḽo,+ ngauri vhoṱhe vhane vha fara banga vha ḓo fa nga banga.+ 53 Kani u humbula uri ndi nga si kone u humbela Khotsi anga zwino uri a nthumele mmbi dzi fhiraho 12 dza vharuṅwa?+ 54 Arali nda ita nga u ralo, Maṅwalo ane a ri zwi fanela u itea nga yeneyi nḓila a ḓo itea hani?” 55 Nga tshenetsho tshifhinga, Yesu a amba na vhenevho vhathu a ri: “Naa no bva no fara mabanga na thonga zwa tou nga ni khou ḓa u fara ḽivemu? Ndo vha ndi tshi ṱwa thembeleni ḓuvha ḽiṅwe na ḽiṅwe ndi tshi khou funza,+ fhedzi a no ngo mpfara.+ 56 Fhedzi zwenezwi zwoṱhe zwo itea uri hu itee zwo ṅwaliwaho nga vhaporofita.”+ Vhafunziwa vhawe vhoṱhe vha mu ṱutshela vha shavha.+
57 Vhe vha fara Yesu vha ṱuwa nae vha mu isa ha tshifhe muhulu Kayafa,+ henefho ho vha ho kuvhangana vhamaṅwalo na vhahulwane.+ 58 Fhedzi Petro a tevhela nga kule a vhuya a swika muṱani wa tshifhe muhulu, musi o no dzhena henefho, a dzula na vhaḓinḓa uri a vhone zwine zwa ḓo itea.+
59 Nga tshenetsho tshifhinga, vhahulwane vha vhotshifhe na vha Sanihedrini* vho vha vha tshi khou ṱoḓa zwine vha nga pomoka ngazwo Yesu uri vha mu vhulaye.+ 60 Fhedzi vha si wane tshithu, naho ho ḓa ṱhanzi nnzhi dza mazwifhi.+ Nga murahu ha ḓa dziṅwe ṱhanzi mbili, 61 dza ri: “Hoyu munna o ri, ‘Ndi nga thutha thembele ya Mudzimu nda i fhaṱa nga maḓuvha mararu.’”+ 62 Tshifhe muhulu a takuwa a amba nae a ri: “Naa a u fhinduli? Naa a u pfi zwine avha vhathu vha khou u pomoka zwone?”+ 63 Yesu a sokou fhumula.+ Tshifhe muhulu a amba nae a ri: “Ndi a u anisa nga Mudzimu a tshilaho, ri vhudze arali u Kristo Murwa wa Mudzimu.”+ 64 Yesu a amba nae a ri: “Ndi iwe wo zwi ambaho. Ndi a u vhudza uri u bva zwino u ḓo vhona Murwa muthu+ o dzula thungo ya tshanḓa tsha u ḽa tsha Wa maanḓa+ a tshi ḓa e kha makole a ṱaḓulu.”+ 65 Tshifhe muhulu a kherula zwiambaro zwawe a ri: “O sema Mudzimu! Ri kha ḓi ṱoḓa dziṅwe ṱhanzi dza mini? No mu pfa a tshi khou semana. 66 Inwi ni ri mini?” Vha fhindula vha ri: “O tewa nga u fa.”+ 67 Vha mu pfela mare khofheni+ na u mu rwa nga mavili.+ Vhaṅwe vha mu rwa khofheni,+ 68 vha ri: “Porofita iwe Kristo. Wo rwiwa nga nnyi?”
69 Petro o vha o dzula nnḓa muṱani, ha ḓa mushumeli wa mufumakadzi a amba nae a ri: “Na iwe wo vha u na Yesu wa Galilea!”+ 70 Fhedzi a hanedza vhoṱhe vha tshi zwi pfa, a ri: “Zwine wa khou zwi amba a thi zwi ḓivhi.” 71 Musi a tshi khou ya khoroni, muṅwe mufumakadzi a mu vhona, a vhudza vha re henefho a ri: “Hoyu munna o vha e na Yesu wa Nazaretha.”+ 72 A dovha a hanedza a ita na u ana a ri: “Hoyo munna a thi mu ḓivhi!” 73 Nga murahu ha tshifhinganyana, vho imaho henefho vha sendela vha amba na Petro vha ri: “Iwe u muṅwe wavho, na kuambele kwau ku a zwi sumbedza.” 74 A dovha a ana a ri: “Hoyo munna a thi mu ḓivhi!” Nga u ṱavhanya mukukulume wa lila. 75 Petro a humbula zwe Yesu a zwi amba, a tshi ri: “U ḓo nndandula luraru mukukulume u sa athu u lila.”+ A bvela nnḓa a lila lu ṱungufhadzaho.