Evangeli Ya Yohane
12 Musi ho sala maḓuvha a rathi uri Paseka i thome, Yesu a swika Bethania, he ha vha hu tshi dzula Lazaro+ we a mu vusa vhafuni. 2 Vha mu lugiselela tshilalelo henefho, Marita ndi ene we a vha a tshi khou vha bikela zwiḽiwa,+ fhedzi Lazaro e muṅwe wa vhane vha khou ḽa na Yesu. 3 Maria a dzhia mudzio u re na mapfura a ṱoḓaho u vha hafu ya ḽithara,* a ḓuraho vhukuma, a nukhelelaho, a songo ṱanganyiswaho na tshithu, o itwaho nga nadi.* A a ḓodza kha milenzhe ya Yesu, a i phumula nga mavhudzi awe. Nnḓu yoṱhe ya nukhelela eneo mapfura.+ 4 Fhedzi Yudasi Iskariote+ muṅwe wa vhafunziwa vhawe, we a vha a tshi ḓo mu fheṱa, a ri: 5 “Ndi ngani enea mapfura a nukhelelaho a songo rengiswa nga dinari* dza 300, dza ṋewa vhashai?” 6 Yudasi ho ngo amba zwenezwi nga nṱhani ha uri o vha e na ndavha na vhashai, ndi nga nṱhani ha uri o vha a tshi tswa. Ho vha hu ene we a vha a tshi ṱhogomela tshelede ya vhafunziwa, o vha a tshi i tswa. 7 Yesu a ri: “Mu litsheni a ite zwenezwi uri a lugiselele ḓuvha ḽa mbulungo yanga.+ 8 Vhashai ni ḓo dzula ni navho,+ fhedzi a ni nga vhi na nṋe misi yoṱhe.”+
9 Nga tshenetsho tshifhinga, gogo ḽihulu ḽa Vhayuda ḽa zwi ḓivha uri u henefho, ḽa ḓa u vhona Yesu na Lazaro, we a mu vusa vhafuni.+ 10 Vhahulwane vha vhotshifhe vha langana uri vha vhulaye na Lazaro, 11 ngauri Vhayuda vhanzhi vho vha vha tshi khou ya henengei, vha tshi khou tenda Yesu nga nṱhani ha Lazaro.+
12 Nga ḓuvha ḽi tevhelaho, vhathu vho ḓaho vhuṱamboni vha pfa uri Yesu u khou ḓa Yerusalema. 13 Vha ka matavhi a mutshevho vha ya vha mu ṱanganedza, vha vhidzelela vha ri: “Mu tshidze! Nga hu fhaṱutshedzwe a ḓaho nga dzina ḽa Yehova,*+ Khosi ya Isiraele!”+ 14 Yesu a wana tshidonngana, a tshi ṋamela,+ samusi zwo ṅwaliwa ha pfi: 15 “U songo ofha iwe ṅwananyana wa Tsioni. Khosi yau i khou ḓa yo ṋamela tshidonngana.”+ 16 Vhafunziwa vhawe vho vha vha sa pfesesi zwenezwi zwithu u thomani. Fhedzi musi Yesu a tshi ṋewa vhugala,+ vha humbula uri zwe vhathu vha zwi itela Yesu zwo vha zwo ṅwaliwa Maṅwaloni Makhethwa.+
17 Vhathu vhe a vha e navho musi a tshi vhidza Lazaro vhiḓani,+ na u mu vusa vhafuni vho bvela phanḓa vha tshi ṱanziela.+ 18 Ndi ngazwo vhathu vho ya vha mu ṱanganedza ngauri vho pfa uri o ita honoho vhuṱolo. 19 Vhafarisei vha amba nga tshavho vha ri: “Naa ni khou zwi vhona uri zwoṱhe zwine na khou ita a zwi khou thusa nga tshithu? Vhonani! Shango ḽoṱhe ḽi khou mu tevhela.”+
20 Ho vha hu na Vhagerika vhukati ha vhenevho vhathu vho ḓaho vhuṱamboni u rabela. 21 Vha ya kha Filipo+ we a vha a tshi bva Betsaida kha ḽa Galilea, vha mu humbela vha ri: “Muṋe washu, ri khou ṱoḓa u vhona Yesu.” 22 Filipo a ya a vhudza Andrea, nga murahu vha ya vha vhudza Yesu.
23 Yesu a ri: “Tshifhinga tsho swika tsha uri Murwa muthu a ṋewe vhugala.+ 24 Ngoho ndi a ni vhudza ndi ri, arali thoro ya goroi ya sa wela mavuni ya sina, i ḓo ḓi dzula i thoro nthihi; fhedzi arali ya sina,+ i aṋwa dziṅwe thoro nnzhi. 25 A funaho vhutshilo hawe u ḓo fa, fhedzi ane a vhenga vhutshilo hawe+ kha ḽino shango u ḓo vhu tsireledza, uri a wane vhutshilo vhu sa fheli.+ 26 Ane a ṱoḓa u ntshumela nga a ntevhele, hune nda ḓo vha ndi hone, na mushumeli wanga u ḓo vha e henefho.+ Ane a ṱoḓa u ntshumela, u ḓo huliswa nga Khotsi. 27 Zwino ndo ṱungufhala,+ huno ndi ḓo ri mini? Khotsi, ntshidze kha tshino tshifhinga.+ Naho zwo ralo, ndi ngazwo ndo ḓa fhano shangoni uri ndi sedzane na honovhu vhuimo. 28 Khotsi, hulisa dzina ḽau.” Ha pfala ipfi+ ḽi tshi bva ṱaḓulu ḽi tshi ri: “Ndo ḽi hulisa, ndi ḓo dovha nda ḽi hulisa.”+
29 Vhathu vho imaho henefho vha tshi zwi pfa, vha ri ndi mubvumo. Vhaṅwe vha ri: “Ndi muruṅwa we a vha a tshi khou amba nae.” 30 Yesu a ri: “Ipfi ḽeneḽi ḽo pfala hu si u itela nṋe, fhedzi hu u itela inwi. 31 Shango ḽeneḽi ḽi ḓo haṱulwa; muvhusi+ waḽo u ḓo pandelwa.+ 32 Musi ndi tshi imiselwa nṱha,+ ndi ḓo kokodza vhathu vhoṱhe.” 33 O vha a tshi khou amba zwenezwi uri a sumbedze nḓila ye a vha a tshi ḓo fa ngayo.+ 34 Vhathu vha ri: “Ro pfa kha Mulayo uri Kristo u ḓo vha hone lwa tshoṱhe;+ fhedzi ndi ngani u tshi ri Murwa muthu u fanela u imiselwa nṱha?+ Murwa muthu ndi nnyi?” 35 Yesu a ri: “Ni ḓo vha na tshedza lwa tshifhinganyana. Tshimbilani hu tshi kha ḓi vha na tshedza, hu sa athu u vha na swiswi; ane a tshimbila swiswini ha ḓivhi hune a khou ya hone.+ 36 Tendani tshedza musi tshi tshi kha ḓi vha hone, uri ni vhe vhana vha tshedza.”+
Yesu o amba zwenezwi, a ṱuwa a ya a dzumbama. 37 Naho vho zwi vhona a tshi ita vhuṱolo vhunzhi, a vho ngo mu tenda, 38 uri hu itee zwo ṅwaliwaho nga muporofita Yesaya a tshi ri: “Yehova,* ndi nnyi we a tenda zwe ra zwi amba?+ Ndi vhonnyi vhe vha sumbedzwa maanḓa* a Yehova?”*+ 39 Zwe zwa ita uri vha si tende ndi ngauri Yesaya o dovha a ri: 40 “O swingisa maṱo avho na u rindidza mbilu dzavho, uri vha si vhone nga maṱo avho na uri mbilu dzavho dzi si zwi pfesese na u rembuluwa uri ndi vha fhodze.”+ 41 Yesaya o amba zwenezwi ngauri o vhona vhugala hawe, a amba nga hae.+ 42 Naho zwo ralo, vharangaphanḓa vhanzhi vho mu tenda,+ fhedzi vho vha vha sa ambi uri vha a mu tenda ngauri vho vha vha tshi ofha Vhafarisei, vha sa ṱoḓi u pandelwa sinagogoni;+ 43 ngauri vho vha vha tshi funa u huliswa nga vhathu u fhira u huliswa nga Mudzimu.+
44 Naho zwo ralo, Yesu a vhidzelela a ri: “Ane a ntenda ha tendi nṋe fhedzi, u tenda na we a nthuma;+ 45 ane a vhona nṋe o vhona na We a nthuma.+ 46 Ndo ḓa fhano shangoni sa tshedza,+ uri vhoṱhe vhane vha ntenda vha si dzule swiswini.+ 47 Ane a pfa zwine nda zwi amba a si zwi ite, a thi nga mu haṱuli; ngauri ndo ḓa u tshidza shango, hu si u ḽi haṱula.+ 48 Hu na ane a ḓo haṱula ane a nnyadza na ane a si thetshelese zwine nda zwi amba. Zwe nda amba ndi zwine zwa ḓo mu haṱula nga ḓuvha ḽa vhufhelo. 49 Ngauri a tho ngo amba zwi bvaho kha nṋe, fhedzi Khotsi we a nthuma o mmbudza zwine nda fanela u zwi amba na u zwi funza.+ 50 Ndi a zwi ḓivha uri mulayo wawe u isa vhutshiloni vhu sa fheli.+ Ndi ngazwo ndi tshi amba zwe Khotsi a mmbudza zwone.”+