Tsefanya
1 Misini ya Yosia+ murwa wa Amoni+ khosi ya Yuda, Yehova o amba na Tsefanya* murwa wa Khushai, murwa wa Gedalia, murwa wa Amaria, murwa wa Hiskia, a ri:
2 “Ndi ḓo fhelisa zwithu zwoṱhe zwi re kha ḽifhasi,” u ralo Yehova.+
3 “Ndi ḓo fhelisa muthu na tshivhanda.
Nda fhelisa zwiṋoni na khovhe,+
Nda fhelisa na vhathu kha ḽifhasi,” u ralo Yehova.
4 “Ndi ḓo imisa tshanḓa tshanga nda lwa na Yuda
Na vhoṱhe vha dzulaho Yerusalema,
Ndi ḓo fhelisa zwithu zwoṱhe zwi re henefha zwi tshimbidzanaho na Baali,+
Nda fhelisa na vhotshifhe vhane vha gwadamela mudzimu wa mazwifhi na vhaṅwe vhotshifhe,+
5 Nda fhelisa na vhane vha gwadamela mavhuthu a ṱaḓulu vhe nṱha ha ṱhanga,+
Na vhane vha gwadamela na u anela Yehova+
Vha dovha vha anela Malikamu;+
6 Na vhane vha litsha u tevhela Yehova+
Na vhane vha si ṱoḓe Yehova kana u vhudzisa nga hae.”+
7 U fhumule u phanḓa ha Yehova Murena Muvhusahoṱhe, ngauri ḓuvha ḽa Yehova ḽi tsini.+
Yehova o lugiselela tshiṱhavhelo; vhe a vha ramba o vha ita vhakhethwa.
8 “Nga ḓuvha ḽa tshiṱhavhelo tsha Yehova ndi ḓo pfisa vharangaphanḓa vhuṱungu,
Vharwa vha khosi+ na vhoṱhe vhane vha ambara zwiambaro zwi bvaho kha maṅwe mashango.
9 Nga ḽeneḽo ḓuvha, ndi ḓo pfisa vhuṱungu vhoṱhe vhane vha ṋamela pulatifomo,*
Vhane vha ḓadza nnḓu ya muṋe wavho nga khakhathi na vhufhura.
10 Nga ḽeneḽo ḓuvha,” u ralo Yehova,
“Hu ḓo pfala mukosi ngei Khoroni ya Khovhe,+
Ha ṱungufhaliwa kha Tshipiḓa Tshiswa tsha muḓi,+
Ha pfala na u kwashekana huhulu ngei zwikwarani.
11 Inwi vhadzulapo vha Makiteshi,* lilani,
Ngauri vharengisi vhoṱhe vho fheliswa;*
Vhoṱhe vhane vha kala siḽiva vho fheliswa.
12 Nga tshenetsho tshifhinga, ndi ḓo tshimbila ndi tshi ṱoḓa ngei Yerusalema ndo fara mbone,
Ndi ḓo vhona mulandu vha si na ndavha, vhane vha ri,
‘Yehova ha nga iti zwivhuya, ha nga iti zwivhi.’+
13 Vha ḓo dzhielwa lupfumo lwavho, nnḓu dzavho dza tshinyadzwa.+
Vha ḓo fhaṱa dzinnḓu, fhedzi a vha nga dzuli khadzo;
Vha ḓo ṱavha minḓirivhe, fhedzi a vha nga nwi waini yayo.+
14 Ḓuvha ḽihulu ḽa Yehova ḽi tsini!+
Ḽi tsini, ḽi khou ḓa nga u ṱavhanya!+
Hu ḓo liliwa lu ṱungufhadzaho nga ḓuvha ḽa Yehova.+
Muhali u ḓo lila e henefho.+
15 Ḽeneḽo ndi ḓuvha ḽa mbiti,+
Ndi ḓuvha ḽa khombo na vhuṱungu,+
Ndi ḓuvha ḽa ḓumbu na u fheliswa,
Ndi ḓuvha ḽa swiswi,+
Ndi ḓuvha ḽa makole na swiswi ḽihulu,+
16 Ndi ḓuvha ḽa u lidza luṋanga na ḽa u ṱavha mukosi wa nndwa,+
Ndi ḓuvha ḽa u lwa na mbondo ndapfu dzi re kha khona na miḓi yo tsireledzwaho nga mbondo.+
17 Ndi ḓo ḓisela vhathu khombo,
Vha ḓo tshimbila u fana na vha sa vhoni,+
Ngauri vho khakhela Yehova.+
18 Siḽiva yavho na musuku wavho zwi nga si vha thuse nga ḓuvha ḽa mbiti dza Yehova;+
Mbiti dzawe dzi tou nga mulilo, dzi fhisa ḽifhasi ḽoṱhe.+
Ngauri u ḓo vhulaya vhoṱhe kha ḽifhasi nga nḓila i ofhisaho.”+