Yobo
4 Elifasi+ wa Muthemani a fhindula a ri:
2 “Arali muṅwe muthu a lingedza u amba na iwe, naa u ḓo mu fhelela mbilu?
Ndi nnyi ane a nga kona u ḓifara uri a si ambe?
3 Ndi ngoho uri wo khakhulula vhanzhi,
Wo vha u tshi khwaṱhisa zwanḓa zwi si na nungo.
4 Maipfi au o vha a tshi vusa o khukhuliswaho,
Wo vha u tshi khwaṱhisa magona a vho netaho.
5 Fhedzi zwino zwo itea kha iwe, wo hanganea;
Musi zwi tshi kwama iwe, u a tsikeledzea.
6 Naa u ofha hau Mudzimu a zwi iti uri u mu fhulufhele?
Naa u fhulufhedzea+ hau a zwi u ṋei fhulufhelo?
7 Nga khumbelo, humbula uri: Naa muthu a si na mulandu o no vhuya a fa?
Ndi lini he muthu o lugaho a fheliswa?
8 Zwe nda zwi vhona ndi zwa uri vhane vha lima* zwi re na khombo
Na vhane vha zwala khakhathi vha kaṋa zwenezwo.
9 Nga mufemo wa Mudzimu vha a fa,
Nga mbiti dzawe vha a fhela vhoṱhe.
10 Ndau i nga vhomba, ha pfala na tshikumo tsha ndawana,
Na maṋo a ndau* dzi re na maanḓa a a kulea.
11 Ndau i a fa arali i si na tshine ya ḽa,
Na ndawana dzi a balangana.
12 Ndo vhudzwa fhungo tshiphirini,
Nḓevheni yanga ndo pfa ndi tshi hevhedzwa.
13 Ndo tshuwiswa nga mabono a vhusiku,
Musi vhathu vho farwa nga khofhe khulu,
14 Nda tetemela nga maanḓa,
Marambo anga oṱhe a tetemela.
15 Tshivhumbiwa tsha muya tsha fhira phanḓa hanga;
Mavhudzi a muvhili wanga a ima.
16 Tshenetsho tshivhumbiwa tsha ima tshi sa dzinginyei,
Fhedzi ndi si ḓivhe uri ndi tshithu-ḓe.
Nda vhona tshivhumbeo phanḓa hanga;
Ha dzika, nda pfa ipfi ḽi tshi ri:
17 ‘Naa muthu a nga vha o lugaho u fhira Mudzimu?
Naa muthu a nga kuna u fhira Musiki wawe?’
18 Ha fhulufheli vhashumeli vhawe,
Na vharuṅwa* vhawe u vha vhona mulandu.
19 Ni vhona u nga a nga fhulufhela vhane vha dzula nḓuni dza vumba,
Dzine mutheo wadzo wa vha kha buse,+
Vhane vha kwaṱulwa vhunga tshikhokhonono?*
20 Vha kwaṱulwa u bva nga matsheloni u swika ḽi tshi kovhela;
Vha ḓo fa lwa tshoṱhe, hu si vhe na ane a zwi ṱhogomela.
21 Naa a vha fani na dennde ḽo bviswaho thambo?
Vha fa vha si na vhuṱali.