Bugu Ya Vhuvhili Ya Koronika

22 Vhadzulapo vha Yerusalema vha vhea Ahasia murwa wawe muṱukusa uri a vhe khosi vhudzuloni hawe ngauri tshigwada tsha mavemu tshe tsha ḓa madenndeni na Vhaarabu tsho vhulaya vhakomana vhawe vhoṱhe.+ Ngauralo, Ahasia murwa wa Yehoramu a thoma u vhusa sa khosi ya Yuda.+ 2 Ahasia o vha e na miṅwaha ya 22 musi a tshi vha khosi, o vhusa Yerusalema ṅwaha muthihi. Mme awe o vha a tshi pfi Athalia+ muḓuhulu* wa Omiri.+

3 Na ene o tevhedza zwe zwa itwa nga vha nnḓu ya Ahaba,+ ngauri mme awe o vha a tshi mu eletshedza uri a ite zwivhi. 4 A bvela phanḓa a tshi ita zwi sa takadzi Yehova, u fana na vha nnḓu ya Ahaba ngauri vho vha vhe vhaeletshedzi vhawe musi khotsi awe o no fa, vha mu tshinya. 5 O tevhela nyeletshedzo yavho, a ṱuwa na Yehoramu murwa wa Khosi Ahaba wa Isiraele uri a ye u lwa na Hasaele khosi+ ya Siria ngei Ramothe-giḽiada,+ henefho ndi he vhapfuli vha misevhe vha huvhadza Yehoramu. 6 A humela Yeseriele+ uri a fhole mbonzhe dze a bviswa dzone ngei Rama musi a tshi lwa na Hasaele khosi ya Siria.+

Ahasia* murwa wa Yehoramu+ khosi ya Yuda a ya Yeseriele u vhona Yehoramu+ murwa wa Ahaba, ngauri o vha o huvhala.*+ 7 Fhedzi ndi Mudzimu we a ita uri Ahasia a fe musi a tshi ya kha Yehoramu; a tshi swika a bva na Yehoramu vha ya u ṱangana na Yehu+ muḓuhulu* wa Nimisi, we Yehova a mu ḓodza uri a fhelise vha nnḓu ya Ahaba.+ 8 Musi Yehu a tshi thoma u haṱula vha nnḓu ya Ahaba, a wana vhakololo vha Yuda na vharwa vha vhakomana vha Ahasia, vhane vha vha vhaḓinḓa vha Ahasia, a vha vhulaya.+ 9 A ṱoḓa Ahasia; vha mu fara he a vha o dzumbama hone ngei Samaria, vha mu isa ha Yehu. Vha mu vhulaya, vha mu vhulunga,+ nge vha ri: “Ndi muḓuhulu wa Yehoshafati, we a ṱoḓa Yehova nga mbilu yawe yoṱhe.”+ Ho vha hu si na na muthihi wa vha nnḓu ya Ahasia we a vha e na maanḓa a u vhusa.

10 Musi Athalia+ mme a Ahasia a tshi vhona uri murwa wawe o fa, a vhulaya vhoṱhe vha muṱa wa vhuhosini* vha nnḓu ya Yuda.+ 11 Naho zwo ralo, Yehoshabathi ṅwananyana wa khosi a dzhia Yehoashi+ murwa wa Ahasia, a mu tswa vhukati ha vharwa vha khosi vhane vha ḓo vhulawa, a mu dzumba kamarani ya nga ngomu na muleli wawe. Yehoshabathi ṅwananyana wa Khosi Yehoramu+ (o vha e mufumakadzi wa tshifhe Yehoyada,+ a dovha a vha khaladzi a Ahasia) a mu dzumba uri Athalia a si mu vhone, uri a si mu vhulaye.+ 12 O dzula nae miṅwaha ya rathi, o dzumbiwa nḓuni ya Mudzimu wa ngoho, musi Athalia a tshi khou vhusa shango ḽoṱhe.