Vhurifhi Ha Vhuvhili Vhu Yaho Kha Vhakorinta
10 Nṋe Paulo, ane a dzhielwa fhasi musi ndi na inwi,+ fhedzi ndi siho ha pfi ndi a konḓisa,+ ndi amba na inwi nga vhulenda na nga vhuthu ndi tshi edzisa Kristo.+ 2 Ndi fhulufhela uri musi ndi tshi ḓa, vhane vha vhona u nga ri livhiswa nga vhathu vha ḓo vha vho no shanduka, uri ndi si vha kaidze. 3 Naho ri tshi tshila u fana na vhaṅwe vhathu, a ri lwi u fana na vhathu vha shango. 4 Ngauri zwiṱhavhane zwashu zwa nndwa a si zwa vhathu,+ ro ṋewa nga Mudzimu;+ zwi na maanḓa a u wisa zwithu zwo khwaṱhaho sa mutsheṱo. 5 Ngauri ri khou hanedza mihumbulo ya mazwifhi na zwithithisi zwoṱhe zwine zwa thivhela vhathu u ḓivha Mudzimu,+ na u kunda mihumbulo yoṱhe uri i thetshelese Kristo; 6 na u ḓiimisela u pfisa vhuṱungu vhoṱhe vhane vha si thetshelese,+ u swikela ni tshi thetshelesa nga ho fhelelaho.
7 Ni haṱula zwithu u ya nga zwine na zwi vhona. Ane a amba a sa timatimi uri u wa Kristo, a humbule uri na riṋe ri vha Kristo. 8 Murena o ri ṋea maanḓa a u ni khwaṱhisa lutendoni, hu si a u ni wisa.+ Ndi nga si shone naho nda nga zuwanyana nga ha maanḓa e ra ṋewa one. 9 Fhedzi a thi ṱoḓi uri zwi nge ndi khou lingedza u ni tshuwisa nga marifhi anga. 10 Ngauri vha ri: “Marifhi awe a na tshileme na maanḓa, fhedzi musi e na riṋe u a nyadzea na zwine a amba a zwi vhuyedzi.” 11 Vhenevho vhane vha ralo, nga vha ḓivhe uri ri ḓo ita zwe ra amba kha marifhi musi ri tshi ḓa.+ 12 A ri lingedzi u ḓifanyisa na vhane vha ḓithemendela kana u ḓivhambedza navho.+ Vha ḓihaṱula u ya nga zwine vha vhona zwo luga, vha sumbedza uri a vha pfesesi.+
13 Ri nga si zuwe nga ha zwe ri si zwi ite, fhedzi ri ḓo zuwa nga mushumo we Mudzimu a ri ṋea wone. O ri ruma na kha inwi.+ 14 Musi ri tshi ḓa kha inwi, a ro ngo ita mushumo we Mudzimu a si ri ṋee wone. Ro vha vha u thoma u ni ḓivhadza mafhungo maḓifha a Kristo.+ 15 Ri khou zuwa nga ha zwine ra khou zwi ita, hu si nga ha zwine zwa khou itwa nga vhaṅwe vhathu. Ri fhulufhela uri musi lutendo lwaṋu lu tshi engedzea, na mushumo we ra u ita u ḓo bvela phanḓa u tshi engedzea hune ra huwelela hone. Ri ḓo kona u ita zwo engedzeaho, 16 ngauri ri ṱoḓa u ḓivhadza mafhungo maḓifha kha maṅwe mashango a re kule na inwi, uri ri sa zuwe nga ha mushumo we wa itwa nga vhaṅwe vhathu. 17 “Ane a zuwa, nga a zuwe nga Yehova.”*+ 18 Ngauri Yehova* u themendela ane a mu takalela,+ hu si ane a ḓithemendela.+