Vhurifhi Ha U Thoma Vhu Yaho Kha Vhakorinta
15 Vhahashu, ndi khou ni humbudza mafhungo maḓifha e nda ni ḓivhadza one,+ e na a ṱanganedza na u dzula no khwaṱha khao. 2 Ni ḓo tshidzwa arali ni tshi farelela no khwaṱha kha mafhungo maḓifha e nda ni ḓivhadza one, arali na sa ita nga u ralo, u tenda haṋu hu ḓo vha ha mahandana.
3 Ndo ni vhudza zwithu zwa ndeme zwe nda zwi guda, uri Kristo o fela zwivhi zwashu u ya nga Maṅwalo;+ 4 o vhulungwa,+ a vuswa+ nga ḓuvha ḽa vhuraru+ u ya nga Maṅwalo;+ 5 a ḓivhonadza kha Kefa,*+ nga murahu a ḓivhonadza kha vhaapostola vha 12.+ 6 Nga murahu ha zwenezwo, a ḓivhonadza kha vhahashu vha fhiraho 500,+ vhane vhunzhi havho vha kha ḓi vha na riṋe, vhaṅwe vho no fa. 7 Nga murahu a ḓivhonadza kha Yakobo,+ a kona u ḓivhonadza kha vhaapostola vhoṱhe.+ 8 Mafheleloni a ḓivhonadza kha nṋe+ we nda vha ndi tshi nga ṅwana o bebwaho tshifhinga tshi sa athu u swika.
9 Ngauri ndi muṱuku kha vhaapostola, a thi fanelei u vhidzwa muapostola, ngauri ndo tovhola tshivhidzo tsha Mudzimu.+ 10 Ndi kona u ita wonoyu mushumo nga nṱhani ha vhuthu vhuhulu ha Mudzimu. Honoho vhuthu hawe vhuhulu he a ntsumbedza hone ho vha vhu si mahandana, ngauri ndo shuma u fhira vhoṱhe; fhedzi a tho ngo zwi ita nga maanḓa anga, ndo zwi kona ngauri Mudzimu o ntsumbedza vhuthu vhuhulu. 11 Hu sa londwi uri ndi nṋe kana ndi vhaṅwe vhaapostola vhane vha huwelela, ri amba nga mulaedza muthihi we na u tenda.
12 Arali hu tshi huwelelwa uri Kristo o vuswa vhafuni,+ ndi ngani vhaṅwe vhaṋu vha tshi amba uri vhafu a vha nga vuswi? 13 Arali vhafu vha sa ḓo vuswa, na Kristo ho ngo vuswa. 14 Arali Kristo a songo vuswa, u huwelela hashu ndi ha fhedzi, na lutendo lwaṋu ndi lwa fhedzi. 15 Zwiṅwe hafhu, arali vhafu vha sa ḓo vuswa, na Mudzimu ho ngo vusa Kristo, zwine zwa amba uri ri khou zwifhela Mudzimu+ musi ri tshi amba uri o vusa Kristo.+ 16 Arali vhafu vha sa ḓo vuswa, na Kristo ho ngo vuswa. 17 Zwiṅwe hafhu, arali Kristo a songo vuswa, lutendo lwaṋu ndi lwa fhedzi; ni kha ḓi vha na zwivhi.+ 18 Zwi amba uri na vhe vha fa vhe na vhuthihi na Kristo vho fa lwa tshoṱhe.+ 19 Arali ro fhulufhela Kristo kha vhuno vhutshilo fhedzi, ri ṱungufhadza u fhira vhathu vhoṱhe.
20 Ngoho ndi ya uri Kristo o vuswa vhafuni, ndi ene wa u thoma u vuswa.+ 21 Samusi lufu lwo vha hone nga muthu,+ na u vuswa ha vhafu ho vha hone nga muthu.+ 22 Samusi roṱhe ri tshi fa nga nṱhani ha Adamu,+ roṱhe ri ḓo vuswa nga nṱhani ha Kristo.+ 23 Fhedzi muṅwe na muṅwe u ḓo vuswa nga heyi nḓila: Kristo ndi ene wa u thoma,+ ha tevhela vha re vha Kristo vhane vha ḓo vuswa tshifhingani tsha u vha hone hawe.+ 24 Mafheleloni u ḓo humisela Muvhuso kha Mudzimu, ane a vha Khotsi awe. Zwenezwi zwi ḓo itea musi o no fhelisa mivhuso yoṱhe na vhavhusi.+ 25 Ngauri u fanela u vhusa sa khosi u swika Mudzimu a tshi vhea maswina oṱhe fhasi ha milenzhe yawe.+ 26 Lufu ndi swina ḽa u fhedza ḽine a ḓo ḽi fhelisa.+ 27 Ngauri Mudzimu “o vhea zwithu zwoṱhe nga fhasi ha milenzhe yawe.”+ Fhedzi musi a tshi amba uri ‘zwithu zwoṱhe zwi fhasi ha milenzhe yawe,’+ zwi tou vha khagala uri a zwi kateli We a vhea zwithu zwoṱhe khae.+ 28 Musi zwithu zwoṱhe zwo no vhewa nga fhasi ha milenzhe yawe, Murwa u ḓo ḓiṱukufhadza nga fhasi ha We a vhea zwithu zwoṱhe nga fhasi hawe,+ uri Mudzimu a vhe zwithu zwoṱhe kha vhoṱhe.+
29 Arali vhafu vha sa ḓo vuswa, hu ḓo itea mini kha vhane vha lovhedzwa uri vha fe?+ Ndi ngani vha tshi lovhedzwa uri vha fe? 30 Ndi ngani ri tshi dzula ri khomboni tshifhinga tshoṱhe?+ 31 Vhahashu, ḓuvha ḽiṅwe na ḽiṅwe ndi vha ndo livhana na lufu. Ndi ḓihudza nga inwi vhafunziwa vha Kristo Yesu Murena washu. 32 Arali ndo lwa na zwivhanda ngei Efesa+ u fana na vhaṅwe vhathu, ndi vhuyelwa nga mini? Arali vhafu vha sa ḓo vuswa, “kha ri ḽe ri nwe, ngauri matshelo ri ḓo fa.”+ 33 Ni songo fhurwa. Khonani mmbi dzi tshinya vhuḓifari havhuḓi.+ 34 Dzivhuluwani ni ite zwo lugaho, ni songo dzula ni tshi ita tshivhi, ngauri vhaṅwe a vha ḓivhi Mudzimu. Ndi khou ni vhudza zwenezwi uri ni shone.
35 Naho zwo ralo, muṅwe u ḓo ri: “Vhafu vha ḓo vuswa nga nḓila-ḓe? Vha ḓo vuswa vhe na muvhili wa mufuda-ḓe?”+ 36 Tsilu ndi iwe! Zwine wa zwala zwi thoma zwa fa zwa kona u tshila. 37 A ni zwali tshimela, fhedzi ni zwala mbeu ya goroi kana ya muṅwe mufuda; 38 fhedzi Mudzimu u ita uri i mele nga hune a funa ngaho. Mbeu iṅwe na iṅwe i tshi mela a i fani na iṅwe. 39 Ṋama dzoṱhe a dzi fani, hu na ya vhathu, ya kholomo, ya zwiṋoni na ya khovhe. 40 Zwi re ṱaḓulu zwi na mivhili+ i sa fani na ya zwi re kha ḽifhasi.+ Lunako lwa zwi re ṱaḓulu a lu fani na lwa zwi re kha ḽifhasi. 41 Ḓuvha, ṅwedzi na ṋaledzi zwo naka nga nḓila yazwo.+ Na ṋaledzi a dzo ngo naka u fana.
42 Zwo tou ralo na nga u vuswa ha vhafu. Hu zwalwa muvhili une wa sina, ha vuswa u sa sini.+ 43 Hu zwalwa muvhili u nyadzeaho, ha vuswa wo nakaho.+ Hu zwalwa u si na nungo, ha vuswa u re na maanḓa.+ 44 Hu zwalwa muvhili wa ṋama, ha vuswa wa muya. Arali hu na muvhili wa ṋama, hu na wa muya. 45 Ho ṅwaliwa u pfi: “Adamu muthu wa u thoma o vha muthu a tshilaho.”+ Adamu wa u fhedza a vha muthu a ṋeaho vhutshilo.+ 46 Naho zwo ralo, a hu thomi zwa muya. Hu thoma zwa ṋama, ha tevhela zwa muya. 47 Muthu wa u thoma u bva kha ḽifhasi, o itwa nga mavu;+ muthu wa vhuvhili u bva ṱaḓulu.+ 48 Vho itwaho nga mavu vha fana na o itwaho nga mavu; vha ṱaḓulu vha fana na a bvaho ṱaḓulu.+ 49 Samusi ri tshi fana na o itwaho nga mavu,+ ri ḓo fana na wa ṱaḓulu.+
50 Ndi a ni vhudza vhahashu uri ṋama na malofha zwi nga si dzhene Muvhusoni wa Mudzimu, na zwine zwa sina zwi nga si vhe zwi sa sini. 51 Ndi ni vhudza tshiphiri tshikhethwa: Ri nga si fe roṱhe, fhedzi roṱhe ri ḓo shandukiswa,+ 52 nga tshifhinganyana, nga u poidza ha ḽiṱo, musi hu tshi lila phalaphala ya u fhedza. Ngauri phalaphala i ḓo lila,+ vhafu vha ḓo vuswa vha si tsha sina, riṋe ra shandukiswa. 53 Ngauri zwine zwa sina a zwi tsha ḓo sina,+ zwine zwa fa a zwi tsha ḓo fa.+ 54 Musi zwine zwa sina zwi si tsha sina, zwine zwa fa zwi si tsha fa, hu ḓo itea zwo ṅwaliwaho hu tshi pfi: “Lufu lwo milwa tshoṱhe.”+ 55 “Lufu, a wo ngo kunda ngauri a u tshee na maanḓa a u tambudza vhathu.”+ 56 Tshivhi tshi na maanḓa a u vhulaya,+ Mulayo u ita uri tshivhi tshi vhe na maanḓa.+ 57 Fhedzi ri livhuwa Mudzimu, ngauri u ri thusa u kunda lufu a tshi shumisa Murena washu Yesu Kristo!+
58 Vhahashu vhane nda vha funa, ivhani no khwaṱhaho,+ ni sa dzinginyei, ni dzule ni tshi ita zwinzhi+ mushumoni wa Murena, ni tshi ḓivha uri mushumo waṋu a si wa fhedzi+ Murenani.