Mishumo Ya Vhaapostola
15 Ha ḓa vhaṅwe vhanna vha bvaho Yudea, vha funza vhahavho vha ri: “Arali na sa fumba u ya nga Mulayo wa Mushe,+ ni nga si tshidzwe.” 2 Fhedzi Paulo na Baranaba vha hanedzana na u ṱaṱa khani navho, ha dzudzanywa uri Paulo na Baranaba na vhaṅwe vha ye Yerusalema+ kha vhaapostola na vhahulwane uri vha ye u amba nga ha eneo mafhungo.
3 Musi vho no fhelekedzwa nga tshivhidzo, vhenevho vhanna vha pfuka nga Fenikia na Samaria, vha tshi ṱalutshedza nga vhuḓalo uri vhathu vha dzitshaka vha khou gwadamela Mudzimu,* zwenezwo zwa takadza vhahavho vhoṱhe. 4 Vha tshi swika Yerusalema vha ṱanganedzwa zwavhuḓi nga tshivhidzo, nga vhaapostola na nga vhahulwane, vha vha vhudza zwithu zwinzhi zwe Mudzimu a vha thusa uri vha zwi ite. 5 Fhedzi vhaṅwe vha tshigwada tsha Vhafarisei vho tendaho, vha takuwa vha ri: “Zwo tea uri vha fumbiswe na u vhudzwa uri vha tevhedze Mulayo wa Mushe.”+
6 Vhaapostola na vhahulwane vha kuvhangana u itela u dzudzanya eneo mafhungo. 7 Musi vho no haseledza* lwa tshifhinga tshilapfu, Petro a takuwa a ri: “Vhahashu, ni a zwi ḓivha zwavhuḓi uri ndi kale Mudzimu o nnanga vhukati haṋu uri ndi vhudze dzitshaka mafhungo maḓifha uri dzi tende.+ 8 Mudzimu ane a ḓivha mbilu,+ o sumbedza uri o vha ṱanganedza nga u vha ṋea muya mukhethwa+ u fana na riṋe. 9 O sumbedza uri u vhona riṋe na vhane vha si vhe Vhayuda nga nḓila i fanaho+ nga u vha ṱanzwa mbilu ngauri vha na lutendo.+ 10 Zwino ndi ngani ni tshi linga Mudzimu nga u hwesa vhafunziwa dzhogo+ kha mitsinga ye riṋe na vhomakhulukuku washu ri si kone u i hwala?+ 11 Samusi ri tshi ḓo tshidzwa, ri tenda uri navho vha ḓo tshidzwa+ nga nṱhani ha vhuthu vhuhulu ha Murena Yesu.”+
12 Vhathu vhoṱhe vha fhumula, vha thetshelesa Baranaba na Paulo vha tshi vha vhudza zwithu zwi mangadzaho na vhuṱolo vhunzhi he Mudzimu a vhu ita kha dzitshaka a tshi shumisa vhone. 13 Musi vho no fhedza u amba, Yakobo a ri: “Vhahashu, nthetsheleseni. 14 Samusi ro zwi pfa, Simioni+ o ri vhudza nga ha nḓila ye Mudzimu a humbula ngayo vha dzitshaka, na uri o no thoma u nanga khavho vhane vha ḓo vhidzwa nga dzina ḽawe.+ 15 Zwenezwo zwi tendelana na zwo ambiwaho nga Vhaporofita, samusi ho ṅwaliwa ha pfi: 16 ‘Nga murahu ha zwenezwi zwithu ndi ḓo vhuya nda fhaṱulula nnḓu* ya Davida yo waho; ndi ḓo i fhaṱulula na u i vusulusa, 17 uri vhathu vho salaho vha ṱoḓe Yehova* nga mbilu yavho yoṱhe, khathihi na vhathu vha tshaka dzoṱhe, vhane vha vhidzwa nga dzina ḽanga, u ralo Yehova* ane a khou ita zwenezwi zwithu,+ 18 zwo ḓivhiwaho u bva kale.’+ 19 Nṋe ndi vhona zwi songo tea u dina vhathu vha bvaho kha dzitshaka vhane vha khou rembulutshela kha Mudzimu,+ 20 kha ri vha ṅwalele uri vha iledze zwithu zwo tshikafhadzwaho nga midzimu ya zwifanyiso,+ u ḓifara luvhi nga zwa vhudzekani,*+ u ḽa zwo faho nga u tou tzhipiwa* na malofha.+ 21 U bva zwifhingani zwa kale ho vha hu na vha huwelelaho vha tshi shumisa bugu dza Mushe miḓini yoṱhe, vha tshi dzi vhala sinagogoni nga savhatha iṅwe na iṅwe.”+
22 Vhaapostola, vhahulwane na tshivhidzo tshoṱhe vha ita phetho ya uri vha nange vhanna vhukati havho uri vha ye Antiokia na Paulo na Baranaba. Ho nangiwa Silasi+ na Yudasi ane a pfi Barasaba, vhanna vha rangaho phanḓa vhukati ha vhahavho. 23 Luṅwalo lwe vha vha ruma nalwo lwo vha lu tshi ri:
“Riṋe vhaapostola, vhahulwane na vhahaṋu, ri lumelisa inwi vhahashu vha re Antiokia,+ Siria na Kilikia vhane vha bva kha dzitshaka. 24 Samusi ro zwi pfa uri vhaṅwe vhukati hashu vho ni khakhisa nga zwe vha zwi amba,+ vha tshi lingedza u ni kanganyisa kha zwine na zwi tenda, naho ri songo vha ruma, 25 ro tendelana roṱhe uri ri nange vhanna uri vha ḓe kha inwi na Baranaba na Paulo vhane ra vha funa, 26 vhanna vho vheaho vhutshilo havho khomboni vha tshi itela dzina ḽa Murena washu Yesu Kristo.+ 27 Ri khou rumela Yudasi na Silasi uri vha ni vhudze eneo mafhungo.+ 28 Muya mukhethwa+ wo ri thusa uri ri swikelele phetho ya uri ri si dovhe ra ni hwesa muṅwe muhwalo, nga nnḓa ha hezwi zwithu zwi tevhelaho zwa ndeme: 29 dzulani ni tshi iledza zwithu zwo ṋekedzwaho midzimu ya zwifanyiso,+ malofha,+ u ḽa zwo faho nga u tou tzhipiwa*+ na u ḓifara luvhi nga zwa vhudzekani.*+ Arali na iledza zwenezwo zwithu, ni ḓo bvelela. Ni vhe na mutakalo wavhuḓi!”
30 Musi vhenevho vhanna vha tshi swika Antiokia, vha kuvhanganya vhathu vha vha ṋea vhurifhi. 31 Musi vho no fhedza u vhu vhala, vha takala ngauri ho vha ṱuṱuwedza. 32 Samusi Yudasi na Silasi vho vha vhe vhaporofita, vho amba zwithu zwinzhi u itela u ṱuṱuwedza na u khwaṱhisa vhahavho.+ 33 Musi vho no fhedza tshifhinga vhe henefho, vhahavho vha vha onesa vha ri vha tshimbile zwavhuḓi musi vha tshi humela kha vhe vha vha ruma. 34* —— 35 Paulo na Baranaba vha sala Antiokia vha tshi funza na u ḓivhadza mafhungo maḓifha a ipfi ḽa Yehova* na vhaṅwe vhanzhi.
36 Nga murahu ha maḓuvha a si gathi, Paulo a amba na Baranaba a ri: “Kha ri dovhe ri dalele vhahashu miḓini yoṱhe ye ra vhuya ra ḓivhadza ipfi ḽa Yehova* khayo u itela u vhona uri vho vuwa hani.”+ 37 Baranaba o vha o ḓiimisela uri a ṱuwe na Yohane ane a pfi Marko.+ 38 Fhedzi Paulo ho ngo takalela u ṱuwa nae, ngauri o vha sia ngei Pamfilia a si ye u huwelela navho.+ 39 Zwenezwo zwa ita uri hu vhe na khani khulu, lwe vha vhuya vha fhambana; Baranaba+ a ṱuwa na Marko nga tshikepe vha ya Kipiro. 40 Paulo a nanga Silasi, musi vhatendi ngae vho no rabela uri Yehova* a mu ṱhogomele, a ṱuwa.+ 41 A fhira nga Siria na Kilikia a tshi khwaṱhisa zwivhidzo.