Vhurifhi Ha Yakobo
3 Vhahashu, a si vhoṱhe vhane vha fanela u funza, ngauri ni a zwi ḓivha uri riṋe vhane ra funza ri ḓo haṱulwa nga nḓila i vhavhaho u fhira ya vhaṅwe.+ 2 Ngauri roṱhe ri a khakha lunzhi.+ A sa khakhi musi a tshi amba, ndi muthu o fhelelaho, u kona na u langa muvhili wawe woṱhe. 3 Arali ra vhea tsimbi* milomoni ya bere uri ri dzi lange, ri kona na u langa mivhili yadzo yoṱhe. 4 Lavhelesani na zwikepe: Naho zwi zwihulu, zwi tshi tshimbidzwa nga muya muhulu, zwi langwa nga thanda ṱhukhu dza u zwi tshimbidza uri zwi ye hune mutshimbidzi a ṱoḓa.
5 Na lulimi ndi muraḓo muṱuku wa muvhili, fhedzi lu zuwa zwihulu. Naho mulilo u mutuku, u nga fhisa ḓaka ḽihulu! 6 Na lulimi ndi mulilo.+ Lulimi ndi lwone lwo ḓalaho vhuvhi kha miraḓo yashu yoṱhe ya muvhili, ngauri lu tshikafhadza muvhili woṱhe.+ Lu nga tshinyadza na vhutshilo ha muthu, lu tou nga Gehena* ngauri lu a tshinyadza. 7 Ngauri zwipuka zwoṱhe, zwiṋoni, zwikokovhi na zwi tshilaho lwanzheni, zwi nga fuwiwa, vhathu vho no ḓi zwi fuwa. 8 Fhedzi a hu na ane a nga kona u langa lulimi. A lu langei, lu na khombo, lwo ḓala mulimo.+ 9 Ri shumisa lwone u renda Yehova* Khotsi, fhedzi ra ḓi dovha ra sema ngalwo vhathu vho itwaho nga “tshifanyiso tsha Mudzimu.”+ 10 Kha mulomo muthihi, hu bva phaṱhutshedzo na maṱamba.
Vhahashu, a zwo ngo tea u vha nga yeneyi nḓila.+ 11 Naa tshisimani tshithihi hu nga bva maḓi a ḓifhaho na a dungaho? 12 Vhahashu, naa muhuyu u nga aṋwa ṱhwari kana munḓirivhe wa aṋwa mahuyu?+ Na tshisima tsha maḓi a muṋo a tshi bvi maḓi a ḓifhaho.
13 Ndi nnyi o ṱalifhaho na ane a ṱalukanya vhukati haṋu? Kha zwi sumbedze nga u ḓifara zwavhuḓi na nga mishumo ine ya itwa nga u vuḓa hu bvaho kha vhuṱali. 14 Fhedzi arali ni na vivho ḽihulu+ na u pikisana mbiluni dzaṋu,+ ni songo zuwa nga vhuṱali haṋu. Arali na ita zwenezwo ni ḓo vha ni tshi khou zwifha.+ 15 Hovhu a si vhuṱali vhu bvaho ṱaḓulu; ndi vhuṱali ha ḽino shango,+ ndi ha vhupuka, na ha madimoni. 16 Ngauri hu re na vivho na u pikisana, hu vha na u sa dzudzanyea na zwithu zwoṱhe zwivhi.+
17 Fhedzi tsha u thoma, vhuṱali vhu bvaho ṱaḓulu ho kuna,+ vhu ita uri muthu a vhe na mulalo,+ a humbulele,+ a ḓiimisele u thetshelesa, a khathutshele zwihulu, a ite mishumo mivhuya,+ a si ṱalule+ na uri a si vhe na muhoyo.+ 18 Zwiṅwe hafhu, ane a vha na vhushaka havhuḓi na vhaṅwe u ita uri hu vhe na mulalo,+ zwa ita uri na vhaṅwe vha ite zwo lugaho.+