Kha Vhafilipi

1 Paulo na Timotheo, vhalanda vha Kristo Yesu, vha ṅwalela vhakhethwa vhoṱhe vha re na vhuthihi na Kristo Yesu vha re Filipi,+ na vhalavhelesi na vhashumeli,+ vha ri:

2 Ngavhe Mudzimu Khotsi ashu na Murena washu Yesu Kristo, vha tshi ni sumbedza vhuthu vhuhulu na u ita uri ni vhe na mulalo.

3 Ndi livhuwa Mudzimu wanga tshifhinga tshoṱhe ndi tshi ni humbula 4 kha zwoṱhe zwine nda ni humbelela. Ndi dzula ndi tshi ni humbelela noṱhe ndo takala,+ 5 ngauri no ḓivhadza mafhungo maḓifha u bva nga ḓuvha ḽe na a ṱanganedza u swika zwino. 6 Ndi fhulufhela uri Mudzimu u ḓo ni thusa u fhedza+ mushumo wavhuḓi we a u thoma vhukati haṋu u swika nga ḓuvha ḽa Kristo Yesu.+ 7 Zwo tea uri ndi humbule zwenezwi nga ha inwi noṱhe, samusi ni mbiluni yanga, inwi vhe na ntikedza musi ndo vhofhiwa nga ngeḓane+ na musi ndi tshi imelela mafhungo maḓifha nga lwa mulayo.+ Nga nṱhani ha zwenezwi, nṋe na inwi ri a vhuyelwa nga vhuthu vhuhulu ha Mudzimu.

8 Mudzimu u a zwi ḓivha uri ndo ni ṱuvha noṱhe nga maanḓa, ngauri ndi a ni funa vhunga na Kristo Yesu a tshi ni funa. 9 Ndi dzula ndi tshi rabela uri lufuno lwaṋu lu engedzee,+ ni na nḓivho yo teaho,+ ni tshi ṱalukanya nga vhuḓalo+ zwine Mudzimu a zwi funa; 10 uri ni kone u ḓivha zwine zwa vha zwa ndeme vhukuma,+ ni vhe vho kunaho, ni sa khukhulisi vhaṅwe+ u swika nga ḓuvha ḽa Kristo; 11 uri ni ite mishumo minzhi yo lugaho, ni tshi thuswa nga Yesu Kristo,+ uri Mudzimu a huliswe na u rendwa.

12 Vhahashu, ndi ṱoḓa ni tshi ḓivha uri zwo iteaho kha nṋe zwo ita uri mafhungo maḓifha a ḓivhadzwe, 13 ngauri u vhofhiwa hanga nga ngeḓane+ ndi tshi itela Kristo zwi vho ḓivhiwa+ nga Vhalindi vhoṱhe vha Khosi-khulu ya Roma na nga vhathu vhoṱhe. 14 Vhahashu vhanzhi Murenani vho no vha na tshivhindi ngauri ndo vhofhiwa nga ngeḓane, a vha tsha ofha u ḓivhadza ipfi ḽa Mudzimu.

15 Ndi ngoho uri vhaṅwe vha khou huwelela nga ha Kristo vha tshi itiswa nga vivho na khani, fhedzi vhaṅwe vha zwi ita zwi tshi bva mbiluni. 16 Vhane vha zwi ita zwi tshi bva mbiluni vha khou ḓivhadza Kristo nga lufuno, ngauri vha a zwi ḓivha uri ndo nangwa uri ndi imelele mafhungo maḓifha;+ 17 fhedzi vhane vha huwelela nga vivho na khani, vha itiswa nga dziphambano, a vha zwi iti zwi tshi bva mbiluni, ngauri vho ḓiimisela u mvusela khakhathi musi ndo vhofhiwa nga ngeḓane. 18 Ha itea mini? Vhathu vha pfa mulaedza nga ha Kristo hu sa londwi uri wo huwelelwa zwi tshi bva mbiluni kana zwi sa bvi mbiluni, zwenezwo zwi a ntakadza. Ndi ḓo dzula ndo takala, 19 ngauri ndi a ḓivha uri ndi ḓo tshidzwa ngauri ni khou nkhumbelela,+ ndi khou thuswa nga muya mukhethwa une Yesu Kristo a ri ṋea.+ 20 Ndi na vhungoho, ndi fhulufhela uri a thi nga shoni, fhedzi ndi ḓo amba ndi sa ofhi, nda hulisa Kristo,* u fana na kale, hu sa londwi uri ndi a tshila kana ndi a fa.+

21 Arali ndi tshi tshila ndi tshilela Kristo,+ nda fa ndi a vhuyelwa.+ 22 Arali ndi tshi kha ḓi tshila fhano shangoni,* ndi ḓo kona u shumela Kristo nga ho engedzeaho. Fhedzi a thi nga ambi zwine nda ḓo zwi nanga. 23 A thi ḓivhi uri ndi nange mini kha izwi zwivhili, ngauri ndi tama uri ndi ṱuwe ndi ye kha Kristo,+ ndi zwone zwine nda vhona zwi khwine nga maanḓa.+ 24 Fhedzi ndi zwa ndeme uri ndi dzule ndi tshi tshila kha ḽino shango ndi tshi itela inwi. 25 Ndi na vhungoho ha uri a thi nga ṱavhanyi ndo fa, ndi ḓo dzula na inwi noṱhe uri ni ite mvelaphanḓa na u takala nga nṱhani ha zwine na zwi tenda, 26 uri musi ndi tshi vhuya, ni takale zwihulu ngauri ni tevhela Kristo Yesu.

27 Ni tshimbile nga nḓila yavhuḓi i tshimbidzanaho na mafhungo maḓifha nga ha Kristo,+ uri naho nda ḓa u ni vhona kana ndi si ḓe, ndi pfe uri no ima no khwaṱha, ni tshi humbula zwithihi,+ ni tshi lwela u tenda mafhungo maḓifha nga vhuthihi, 28 ni sa tshuwiswi nga vhane vha ni hanedza. Zwenezwi zwi sumbedza uri vha ḓo fheliswa,+ fhedzi inwi na tshidzwa;+ zwenezwi zwi bva kha Mudzimu. 29 Ngauri no huliswa uri ni tende Kristo na u tambudzelwa ene.+ 30 Samusi ni nndwani ye na mmbona ndi tshi i lwa,+ ine nda kha ḓi i lwa.