Vhahaṱuli

4 Vhaisiraele vha dovha vha ita zwi sa takadzi Yehova musi Ehudu o no fa.+ 2 Yehova a vha kumedzela zwanḓani zwa Yabini khosi ya Kanana,+ we a vha a tshi vhusa Hatsoro. Mulangammbi wawe muhulwane o vha e Sisera, a dzulaho Harosethe+ wa dzitshaka.* 3 Vhaisiraele vha lilela Yehova,+ ngauri Yabini o vha e na gariki dza nndwa dza 900 dzi re na mabanga kha malinga,+ o tsikeledza Vhaisiraele+ zwihulu lwa miṅwaha ya 20.

4 Muporofita Debora,+ mufumakadzi wa Lapidothe, o vha a tshi khou haṱula Isiraele nga tshenetsho tshifhinga. 5 O vha a tshi anzela u dzula fhasi ha muri wa mutshevho wa Debora vhukati ha Rama+ na Bethele+ dzinguni ḽa thavhani dza Efuraimi; Vhaisiraele vho vha vha tshi ḓa khae a tshi vha haṱulela mafhungo avho. 6 A ruma muthu a ya a vhidza Baraka+ murwa wa Abinoamu ngei Kedese-nafutali+ a amba nae a ri: “Naa Yehova Mudzimu wa Isiraele ho ngo ṋea ndaela? ‘Gonya Thavhani ya Thaboro, u dzhie vhanna vha 10 000 vha Nafutali na vha Sebuloni u ṱuwe navho. 7 Ndi ḓo ni ḓisela Sisera, mulangammbi wa Yabini uri a lwe na iwe mulambwanani* wa Kishoni+ e na gariki dzawe dza nndwa na maswole awe, ndi ḓo mu kumedzela zwanḓani zwau.’”+

8 Baraka a amba nae a ri: “Ndi ḓo ya arali ra ṱuwa roṱhe; fhedzi arali ra sa ṱuwa roṱhe, a thi nga yi.” 9 Debora a mu fhindula a ri: “Ndi ḓo ṱuwa na iwe. Naho zwo ralo, zwine wa khou yela zwone a zwi nga iti uri u khoḓwe, ngauri Yehova u ḓo kumedzela Sisera zwanḓani zwa mufumakadzi.”+ Debora a takuwa a ṱuwa na Baraka vha ya Kedese.+ 10 Baraka a vhidza Sebuloni na Nafutali+ uri vha kuvhangane Kedese, a tevhelwa nga vhanna vha 10 000. Na Debora a ṱuwa nae.

11 Hebere wa Mukeni o vha o ḓifhambanya na Vhakeni,+ vhaḓuhulu vha Hobaba, makhulu* wa Mushe,+ o vha o atha dennde ḽawe tsini na muri muhulu ngei Tsaananimi, hune ha vha Kedese.

12 Sisera a vhudzwa uri Baraka murwa wa Abinoamu o gonya Thavhani ya Thaboro.+ 13 Nga u ṱavhanya Sisera a kuvhanganya gariki dzawe dzoṱhe dza nndwa dza 900 dzi re na mabanga kha malinga. A kuvhanganya na maswole oṱhe e a vha e nae u bva Harosethe wa dzitshaka, vha ya mulambwanani* wa Kishoni.+ 14 Debora a amba na Baraka a ri: “Takuwa, ngauri ṋamusi Yehova u ḓo kumedzela Sisera zwanḓani zwau. Naa Yehova ho ngo u ranga phanḓa?” Baraka a tsa Thavhani ya Thaboro e na vhanna vha 10 000 vha tshi khou mu tevhela. 15 Yehova a kanganyisa Sisera na gariki dzawe dzoṱhe dza nndwa na maswole oṱhe+ phanḓa ha Baraka. Sisera a tsa kha gariki yawe a shavha nga milenzhe. 16 Baraka a pandamedza gariki dza nndwa na mmbi u swika Harosethe wa dzitshaka. Mmbi yoṱhe ya Sisera ya vhulawa nga banga. Hu si sale na muthihi.+

17 Fhedzi Sisera a shavha nga milenzhe a ya denndeni ḽa Yaele+ mufumakadzi wa Hebere+ wa Mukeni, ngauri Yabini+ khosi ya Hatsoro o vha a tshi konana na muṱa wa Hebere wa Mukeni. 18 Yaele a ḓa a mu ṱanganedza a amba nae a ri: “Dzhena muṋe wanga, iḓa ngeno. U songo ofha.” Ngauralo, a dzhena denndeni ḽawe, a mu fukedza nguvho. 19 Sisera a amba nae a ri: “Ndi humbela uri u nṋee maḓinyana a u nwa, ndi na ḓora.” A vula tshikumbu tsha mukumba tsha mafhi a mu ṋea a nwa,+ nga murahu a dovha a mu fukedza. 20 Sisera a amba nae a ri: “Ima muṋangoni wa dennde, arali muthu a ḓa a u vhudzisa a ri: ‘Naa hu na munna fhano?’ U fhindule u ri: ‘Hai!’”

21 Fhedzi Yaele mufumakadzi wa Hebere a dzhia tsimbi ya u ṱoma dennde na hamula. Musi Sisera o neta o farwa nga khofhe khulu, a mu dodela, a ombela tsimbi ya u ṱoma dennde kha khumba-khumbane* yawe, ya phuletshedza ya dzhena mavuni, a fa.+

22 Baraka a swika henefho a tshi khou ṱoḓa Sisera, Yaele a bvela nnḓa u itela u mu ṱanganedza, a ri: “Iḓa ngeno ndi u sumbedze munna ane wa khou mu ṱoḓa.” Ngauralo, Baraka a dzhena nae, a vhona Sisera o fa, e na tsimbi ya u ṱoma dennde kha khumba-khumbane* yawe.

23 Nga ḽeneḽo ḓuvha Mudzimu o ita uri Vhaisiraele vha kunde Yabini khosi ya Kanana.+ 24 Vhaisiraele vha vha na ma⁠anḓa kha Yabini khosi ya Kanana,+ u swika vha tshi vhulaya Yabini khosi ya Kanana.+