Kha Vharoma
14 Ṱanganedzani a si na lutendo lwo khwaṱhaho,+ ni songo haṱula nḓila ine a dzhia ngayo zwithu. 2 A re na lutendo lwo khwaṱhaho u ḽa zwoṱhe, a si na lutendo lwo khwaṱhaho u ḽa miroho fhedzi. 3 A ḽaho a songo nyadza a sa ḽi, na a sa ḽi a songo haṱula a ḽaho,+ ngauri Mudzimu o mu ṱanganedza. 4 Iwe u nnyi ane wa haṱula mushumeli wa muṅwe?+ A tshi ima kana a tshi wa u itela muṋe wawe.+ Vhukuma, u ḓo takuswa, ngauri Yehova* u ḓo mu imisa.
5 Muṅwe u dzhia ḽiṅwe ḓuvha ḽi ḽa ndeme u fhira ḽiṅwe;+ muṅwe a dzhia maḓuvha oṱhe a tshi fana;+ muṅwe na muṅwe kha tende kha zwe a dzula o phetha zwone. 6 Ane a dzhia ḓuvha ḽo khethea, u hulisa Yehova.* Na ane a ḽa, u ḽa uri a hulise Yehova,* ngauri a tshi ḽa u livhuwa Mudzimu;+ na ane a litsha u ḽa, u litshela u hulisa Yehova,* na ene a livhuwa Mudzimu.+ 7 A hu na na muthihi kha riṋe ane a ḓitshilela,+ na ane a fa a tshi itela ene muṋe. 8 Ri tshi tshila, ri tshilela u hulisa Yehova,*+ ri tshi fa, ri hulisa Yehova.* Nga zwenezwo, ri tshi tshila na musi ri tshi fa, ri vha Yehova.*+ 9 Ndi ngazwo Kristo o fa, a dovha a tshila uri a vhe Murena wa vho faho na vha tshilaho.+
10 Fhedzi iwe ndi ngani u tshi haṱula wahau?+ Kana ndi ngani u tshi nyadza wahau? Ngauri roṱhe ri ḓo haṱulwa nga Mudzimu.+ 11 Samusi ho ṅwaliwa u pfi: “‘Ndi ana nga vhutshilo hanga,+ vhathu vhoṱhe vha ḓo ngwadamela, vhoṱhe vha tenda uri ndi nṋe Mudzimu,’ u ralo Yehova.”*+ 12 Ngauralo, muṅwe na muṅwe washu u ḓo ḓifhindulela kha Mudzimu.+
13 Nga zwenezwo, ri songo tsha haṱulana,+ kha ri ḓiimisele u sa vhea tshikhukhulisi phanḓa ha wahashu.+ 14 Samusi ndi tshi tevhela Murena Yesu, ndi a zwi ḓivha uri a hu na tshithu tshine tsha vha na tshika nga tshone tshiṋe;+ arali muthu a tshi dzhia tshithu tshi na tshika, khae tshi na tshika. 15 Arali u tshi ṱungufhadza wahau nga zwiḽiwa, a u tsha sumbedza uri u a mu funa.+ U songo tshinya lutendo lwa we Kristo a mu fela nga zwine wa ḽa.+ 16 Ni songo tenda zwivhuya zwine na zwi ita zwi tshi soliwa. 17 Ngauri Muvhusoni wa Mudzimu a hu dzheniwi nga u ḽa na u nwa,+ fhedzi hu dzheniwa nga u luga, mulalo na dakalo ḽi ḓiswaho nga muya mukhethwa. 18 Ane a shumela Kristo nga yeneyi nḓila sa mulanda, u takadza Mudzimu na u ṱanganedzwa nga vhathu.
19 Nga zwenezwo, kha ri ite zwoṱhe zwine zwa ḓisa mulalo+ na zwine zwa ita uri ri khwaṱhisane.+ 20 Litshani u thutha mushumo wa Mudzimu nga nṱhani ha zwiḽiwa.+ Zwithu zwoṱhe zwo kuna, fhedzi zwo khakhea arali muthu a tshi ḽa ngeno a tshi khukhulisa muṅwe.+ 21 Ndi zwavhuḓi u sa ḽa ṋama, u sa nwa waini, kana u sa ita tshithu tshine tsha nga khukhulisa wahau.+ 22 Lutendo lune na vha nalwo kha lu vhe vhukati haṋu na Mudzimu. Ane a si ḓihaṱule nga zwe a ita, u a takala. 23 Arali a tshi timatima, fhedzi a ḽa, o khakha ngauri o ḽa a si na lutendo, zwithu zwoṱhe zwine muthu a ita a si na lutendo ndi tshivhi.