Muhuweleli

9 Ndo elekanya nga ha zwenezwo zwoṱhe, nda phetha nga ḽa uri vhavhuya na vho ṱalifhaho, u katela na mishumo yavho, zwi zwanḓani zwa Mudzimu wa ngoho.+ Vhathu a vha ḓivhi lufuno na vengo zwe zwa vha hone vha sa athu u bebwa. 2 Vhavhuya na vhavhi+ vha na magumo ane a fana,+ vhavhuḓi na vho kunaho na vhane vha vha na tshika, vhane vha ṋekedza zwiṱhavhelo na vha sa ṋekedzi zwiṱhavhelo. Wavhuḓi u a fana na muitazwivhi; ane a ita muano u fana na ane a ofha u ita muano. 3 Kha zwine zwa bvelela fhano fhasi ha ḓuvha zwine zwa tsikeledza ndi hezwi: Ngauri vhoṱhe vha na magumo ane a fana,+ zwi ita uri mbilu dzavho dzi ḓale vhuvhi na tshipengo, vha fhedza nga u fa!

4 Hu na fhulufhelo kha ane a khou tshila, ngauri mmbwa i tshilaho i fhira ndau yo faho.+ 5 Ngauri vha tshilaho vha a ḓivha uri vha ḓo fa,+ fhedzi vho faho a vha ḓivhi tshithu,+ a vha tsha wana malamba, ngauri vho hangwiwa.+ 6 Zwiṅwe hafhu, lufuno lwavho na vengo ḽavho na vivho ḽavho zwo no ḓi fhela, a vha tshee na mukovhe kha zwine zwa itwa fhano fhasi ha ḓuvha.+

7 Tshimbila u ye u ḽe zwiḽiwa zwau u takale, u nwe waini yau mbilu yo takala,+ ngauri Mudzimu wa ngoho u takalela mishumo yau.+ 8 Ngavhe zwiambaro zwau zwi tshi dzula zwo tshena,* u songo litsha u ḓola mapfura kha ṱhoho yau.+ 9 Ḓiphiṋe nga vhutshilo na mufumakadzi+ wau ane wa mu funa maḓuvhani au oṱhe a vhutshilo hau ha mahandana, ngauri zwenezwo ndi mukovhe wau vhutshiloni na u shuma hau nga maanḓa u tshi ḓinetisa fhano fhasi ha ḓuvha.+ 10 Zwoṱhe zwine tshanḓa tshau tsha zwi kona, zwi ite nga maanḓa au oṱhe, ngauri ngei Vhiḓani* hune wa ya hone, a hu na mushumo, a hu lukiwi maano, a hu na nḓivho kana vhuṱali.+

11 Ndo dovha nda vhona tshiṅwe tshithu fhano fhasi ha ḓuvha, a si wa luvhilo ane a dzulela u kunda kha mbambe, kana a si wa maanḓa ane a kunda nndwani,+ a si wa vhuṱali ane a dzulela u vha na zwiḽiwa, a si wa vhuṱali ane a dzulela u wana lupfumo,+ a si vha re na nḓivho vhane vha dzulela u bvelela,+ ngauri tshifhinga na zwiitea zwi songo lavhelelwaho zwi wela vhoṱhe. 12 Ngauri muthu ha ḓivhi tshifhinga tshawe.+ Vhunga khovhe i tshi fashwa nga mambule na zwiṋoni zwi tshi fashwa nga tshikwekwe, na vhana vha vhathu vha a fashwa nga tshifhinga tsha khombo, musi i tshi vha wela nga u ṱavhanya.

13 Ndo dovha nda vhona hezwi nga ha vhuṱali fhano fhasi ha ḓuvha, zwa ntakadza: 14 Ho vha hu na muḓi muṱuku we wa vha u si na vhathu vhanzhi; khosi i re na maanḓa ya ḓa ya u tanga ya fhaṱa mitsheṱo ya u tangela ngomu. 15 Khawo ho wanala munna wa mushai o ṱalifhaho, o tshidza wonoyo muḓi nga vhuṱali hawe. Fhedzi a hu na na muthihi ane a humbula onoyo munna wa mushai.+ 16 Nda humbula uri: ‘Vhuṱali vhu khwine u fhira maanḓa;+ fhedzi vhuṱali ha mushai vhu a nyadziwa na zwine a amba a zwi thetsheleswi.’+

17 Khwine ndi u thetshelesa maipfi o dzikaho a wa vhuṱali nṱhani ha u thetshelesa u zhamba ha ane a vhusa matsilu.

18 Vhuṱali vhu khwine u fhira zwiṱhavhane zwa nndwa, fhedzi muitazwivhi muthihi a nga tshinya zwithu zwinzhi zwavhuḓi.+