Daniele

10 Nga ṅwaha wa vhuraru musi hu tshi khou vhusa Khosi Korese+ wa Peresia, Daniele ane a pfi Beḽetsatsara,+ a dzumbululelwa wonoyo mulaedza; wo vha u wa ngoho, u wa nndwa khulu. O pfesesa zwavhuḓi wonoyo mulaedza na zwe a zwi vhona.

2 Nga tshenetsho tshifhinga, nṋe Daniele ndo fhedza vhege tharu ndo ṱungufhala.+ 3 Ndo fhedza vhege tharu ndi sa ḽi zwiḽiwa zwavhuḓi, ndi sa ḽi ṋama kana u nwa waini na mapfura ndi sa ḓoli. 4 Nga ḓuvha ḽa vhu 24 ḽa wonoyo ṅwedzi, musi ndi philiphilini ya mulambo wa Thigirisi,*+ 5 nda lavhelesa nda vhona munna o ambaraho zwiambaro zwa ḽinene,+ o ḓivhofha khundu nga bannda ḽa musuku u bvaho Ufatse. 6 Muvhili wawe wo vha u tshi nga tombo ḽa khirisoḽaithi,+ khofheni a tshi penya sa lupenyo, maṱo awe a tshi nga mulilo, zwanḓa zwawe na milenzhe zwi tshi nga koporo yo pholishiwaho,+ musi a tshi amba ho vha hu tshi nga hu khou amba vhathu vhanzhi. 7 Nṋe Daniele ndo vhona ḽeneḽo bono ndi ndoṱhe; vhanna vhe nda vha ndi navho a vho ngo ḽi vhona.+ Naho zwo ralo, vho tshuwa vha shavha vha dzumbama.

8 Nda sala ndi ndoṱhe, musi ndi tshi vhona ḽeneḽo bono ḽihulu, nda fhelelwa nga maanḓa, tshifhaṱuwo tshanga tsha tshenuluwa, ndi si tsha vha na nungo.+ 9 Nda pfa a tshi amba, nda eḓela henefho fhasi musi a tshi kha ḓi amba.+ 10 Fhedzi tshanḓa tsha nkwama+ tsha ndzinginyisa, nda gwadama ndo farelela fhasi nga zwanḓa nda vuwa. 11 A amba na nṋe a ri:

“Iwe Daniele, munna a funwaho,*+ thetshelesa zwine nda khou ṱoḓa u u vhudza zwone. Takuwa u ime, ngauri ndo rumiwa kha iwe.”

Musi a tshi amba zwenezwo, nda takuwa nda ima ndi tshi khou tetemela.

12 Ndi hone a tshi ri: “Iwe Daniele, u songo ofha.+ Ngauri u bva nga ḓuvha ḽa u thoma ḽe wa vha wo ḓiimisela u pfesesa na u ḓiṱukufhadza phanḓa ha Mudzimu wau, thabelo dzau dzo pfiwa, ndi ngazwo nṋe ndi fhano.+ 13 Fhedzi mukololo+ wa muvhuso wa Peresia o lwa na nṋe lwa maḓuvha a 21. Mikaele*+ muṅwe wa vhakololo vhahulwane* a ḓa a nthusa; ndi henefho na mahosi a Peresia. 14 Ndo ḓa u u thusa uri u pfesese zwine zwa ḓo wela vhathu vhau maḓuvhani a vhufhelo,+ ngauri ndi bono ḽa maḓuvha ane a kha ḓi ḓa.”+

15 Musi a tshi mmbudza zwenezwo, nda kwatamela fhasi, nda fhelelwa nga maipfi. 16 We a vha a tshi nga munna a fara mulomo wanga,+ nda u vula, nda amba nae nda ri: “Murena wanga, ndi khou tetemela nga nṱhani ha bono, a thi tshee na nungo.+ 17 Mushumeli a nga amba hani na murena wawe?+ Zwino a thi tshee na nungo, a thi tsha kona u fema zwavhuḓi.”+

18 We a vha a tshi nga munna, a dovha a mpfara a nkhwaṱhisa.+ 19 Ndi hone a tshi amba na nṋe a ri: “U songo ofha,+ Iwe munna a funwaho.*+ Ngavhe u tshi vha na mulalo.+ U vhe na maanḓa, u khwaṱhe.” A tshi kha ḓi amba na nṋe, nda pfa ndo khwaṱhiswa, nda ri: “Amba murena wanga, ngauri wo nkhwaṱhisa.”

20 A amba na nṋe a ri: “U a ḓivha uri ndi ngani ndo ḓa kha iwe? Zwino ndi khou vhuyelela u lwa na mukololo wa Peresia.+ Musi ndi tshi ṱuwa, hu ḓo ḓa mukololo wa Gerika. 21 Naho zwo ralo, ndi ḓo u vhudza zwo ṅwaliwaho kha maṅwalo a ngoho. A hu na ane a khou ntikedza kha zwenezwi u fana na Mikaele+ mukololo wau.+