Daniele
1 Nga ṅwaha wa vhuraru hu tshi khou vhusa Khosi Yehoyakimi+ wa Yuda, Khosi Nebukadanetsara wa Babele o ḓa a tanga muḓi wa Yerusalema.+ 2 Yehova a kumedzela Khosi Yehoyakimi wa Yuda zwanḓani zwa khosi ya Babele,+ u katela na dziṅwe thundu dza nnḓu* ya Mudzimu wa ngoho, ya dzi isa nḓuni* ya mudzimu wayo shangoni ḽa Shinari.*+ Ya vhea dzenedzo thundu mbulungeloni ya mudzimu wayo.+
3 Khosi ya laedza Asipenasi muḓinḓa wayo muhulwane uri a ḓise vhaṅwe Vhaisiraele,* u katela na vhaḓivhalea na vha vhuhosini.+ 4 Vho vha vha tshi fanela u vha vhe vhaswa* vha songo holefhalaho, vho nakaho, vho ṱalifhaho, vha re na nḓivho na ṱhalukanyo,+ vha tshi nga kona u shuma pfamoni ya khosi. O vha a tshi tea u vha gudisa u ṅwala na u amba luambo lwa Vhakaladea. 5 Zwiṅwe hafhu, khosi yo vha i tshi vha ṋea zwiḽiwa ḓuvha ḽiṅwe na ḽiṅwe zwi bvaho khayo na waini ye ya vha i tshi i nwa. Vho vha vha tshi fanela u gudiswa* lwa miṅwaha miraru, musi yeneyo miṅwaha yo no fhela, vho vha vha tshi tea u shumela khosi.
6 Vhaṅwe vhavho vho vha vhe vha lushaka* lwa Yuda: ho vha hu Daniele,*+ Henania,* Misaele* na Asaria.*+ 7 Muḓinḓa muhulwane o vha ira madzina;* Daniele o vha a tshi pfi Beḽetsatsara,+ Henania a tshi pfi Shadaraka, Misaele a tshi pfi Mishaka, Asaria a tshi pfi Abedenego.+
8 Fhedzi Daniele o vha o ḓiimisela u sa ḓitshikafhadza nga zwiḽiwa zwa khosi kana nga waini ye ya vha i tshi i nwa. A humbela muḓinḓa muhulwane uri a mu tendele uri a si ḓitshikafhadze nga zwenezwo zwithu. 9 Mudzimu wa ngoho a ita uri muḓinḓa muhulwane a sumbedze Daniele vhuthu na khathutshelo.+ 10 Fhedzi muḓinḓa muhulwane a amba na Daniele a ri: “Ndi khou ofha thovhela muṋe wanga, we a ri ni ṋewe zwenezwi zwiḽiwa na waini. Hu ḓo itea mini arali a vhona ni songo naka u fana na vhaṅwe vhaswa?* Ni ḓo ita uri ndi vhe na mulandu phanḓa ha khosi.” 11 Fhedzi Daniele a amba na muṱhogomeli we a vha o vhewa nga muḓinḓa muhulwane uri a ṱhogomele Daniele, Henania, Misaele na Asaria, a ri: 12 “Linga vhashumeli vhau lwa maḓuvha a fumi nga u ri litsha ri tshi ḽa miroho na u nwa maḓi; 13 u kone u vhambedza nḓila ine riṋe na vhaswa* vhane vha ḽa zwiḽiwa zwa khosi ra vha ngayo, u haṱule vhashumeli vhau u ya nga zwine wa zwi vhona.”
14 A tenda khumbelo yavho, a vha linga lwa maḓuvha a fumi. 15 Musi maḓuvha a fumi a tshi fhela, vha wanala vho naka, vhe na mutakalo wavhuḓi u fhira vhaswa* vhoṱhe vhe vha ḽa zwiḽiwa zwa khosi. 16 Muṱhogomeli o vha a si tsha vha ṋea zwiḽiwa na waini zwi bvaho ha khosi, o vha a tshi vha ṋea miroho. 17 Mudzimu wa ngoho o ṋea vhenevha vhaswa* vhaṋa vhuṱali, nḓivho na ṱhalukanyo ya maṅwalo oṱhe; Daniele o ṋewa vhukoni ha u pfesesa mabono oṱhe na miḽoro.+
18 Musi tshifhinga tsha uri vha ḓiswe ha khosi tshi tshi swika,+ muḓinḓa muhulwane o vha ḓisa phanḓa ha Nebukadanetsara. 19 Musi khosi i tshi amba na tshenetsho tshigwada tsha vhaswa, a hu na we a wanala a tshi nga Daniele, Henania, Misaele na Asaria;+ vho bvela phanḓa vha tshi shumela khosi. 20 Kha mafhungo oṱhe a ṱoḓaho vhuṱali na ṱhalukanyo e khosi ya vha i tshi vha vhudzisa one, yo wana vha tshi fhira nga kule vhotshifhe vhoṱhe vha manditi na mingome+ muvhusoni wayo woṱhe. 21 Daniele a dzula henefho u swika nga ṅwaha wa u thoma wa muvhuso wa Khosi Korese.+