Ruṱe
1 Ha vha na nḓala kha ḽeneḽo shango musi hu tshi vhusa vhahaṱuli.+ Nga zwenezwo, muṅwe munna a pfuluwa Betlehema+ ngei Yuda uri a vhe mutsinda shangoni* ḽa Moaba,+ ene khathihi na mufumakadzi wawe na vharwa vhawe vhavhili. 2 Onoyo munna o vha a tshi pfi Elimeleke,* mufumakadzi wawe o vha a tshi pfi Naomi,* o vha e na vharwa vhavhili, vho vha vha tshi pfi Mahaloni* na Kiliyoni.* Vho vha vhe Vhaefurata vha Betlehema ngei Yuda. Mafheleloni vha swika kha ḽa Moaba vha dzula henefho.
3 Nga murahu ha tshifhinga, Elimeleke munna wa Naomi a fa, Naomi a sala na vharwa vhawe vhavhili. 4 Nga murahu vha vhinga vhafumakadzi vha vha Moaba; muṅwe o vha a tshi pfi Oripa, muṅwe a tshi pfi Ruṱe.+ Vho dzula henefho miṅwaha i ṱoḓaho u vha fumi. 5 Nga zwenezwo, vharwa vhawe vhavhili, Mahaloni na Kiliyoni na vhone vha fa, Naomi a sala e si na vharwa na munna. 6 A pfuluwa Moaba e na vhomazwale vhawe, ngauri o zwi pfa e ngei Moaba uri Yehova u khou ṱhogomela vhathu vhawe nga u vha ṋea zwiḽiwa.*
7 A pfuluwa fhethu he a vha a tshi khou dzula hone na vhomazwale vhawe vhavhili. Musi vha tshi khou tshimbila vhe nḓilani ya u humela shangoni ḽa Yuda, 8 Naomi a amba na vhomazwale vhawe vhavhili a ri: “Humani, muṅwe na muṅwe a ye hayani ha mme awe. Ngavhe Yehova a tshi ni sumbedza lufuno lu sa shanduki,+ samusi no lu sumbedza nṋe na vhanna vhaṋu. 9 Ngavhe Yehova a tshi ṋea muṅwe na muṅwe waṋu vhuawelo nḓuni ya munna wawe.”+ A vha khisa, vha vusa tshililo tshihulu. 10 Vha bvela phanḓa vha tshi ri: “Aiwa, fhedzi ri ḓo ṱuwa na iwe kha vhathu vha hau.” 11 Fhedzi Naomi a ri: “Humani, vhananyana vhanga. Ndi ngani ni tshi fanela u ṱuwa na nṋe? Naa ndi nga kha ḓi kona u beba vhana vhane vha ḓo vha vhanna vhaṋu?+ 12 Humani vhananyana vhanga, ngauri ndo no kegula nga maanḓa lune ndi nga si vhingwe. Naho ndo vha ndi tshi nga fhulufhela uri ndi nga wana munna ṋamusi, nda kona u beba vhana, 13 naa no vha ni tshi nga kona u vha lindela u swika vha tshi aluwa? Naa no vha ni tshi nga hana u dovha na vhingwa nga nṱhani havho? Aiwa, vhananyana vhanga, ndi a ni pfela vhuṱungu nga maanḓa, ngauri Yehova o ntshandukela.”+
14 Vha dovha vha lila, nga murahu Oripa a khisa mazwale wawe a ṱuwa. Fhedzi Ruṱe a sala na Naomi. 15 Naomi a ri: “Oripa u khou humela kha vhathu vha hawe na kha midzimu ya hawe. Na iwe huma nae.”
16 Fhedzi Ruṱe a ri: “U songo nkombetshedza uri ndi u ṱutshele, ndi hume ndi u sie; ngauri hune wa ya na nṋe ndi ḓo ya, hune wa ḓo eḓela hone na nṋe ndi ḓo eḓela hone. Vhathu vha hau vha ḓo vha vhathu vhanga na Mudzimu wau u ḓo vha Mudzimu wanga.+ 17 Hune wa fa na nṋe ndi ḓo fela hone, henefho ndi hune nda ḓo vhulungwa hone. Ngavhe Yehova a tshi mpfisa vhuṱungu arali nda tendela naho tshi tshini nga nnḓa ha lufu tshi tshi ri fhandekanya.”
18 Musi Naomi a tshi vhona uri Ruṱe o ḓiimisela u ṱuwa nae, a si tsha amba nae nga ha eneo mafhungo. 19 Vhuvhili havho vha bvela phanḓa na lwendo vha vhuya vha swika Betlehema.+ Musi vha tshi tou swika Betlehema, muḓi woṱhe wa vha kanuka. Vhafumakadzi vho vha vha tshi ri: “Naa uyu ndi Naomi?” 20 Ene o vha a tshi fhindula vhenevho vhafumakadzi a ri: “Ni songo mmbidza Naomi.* Ni mmbidze Mara,* ngauri Ramaanḓaoṱhe o mpfisa vhuṱungu.+ 21 Ndo vha ndi na zwoṱhe musi ndi tshi ṱuwa, fhedzi Yehova o ita uri ndi vhuye ndi si na tshithu. Ndi ngani ni tshi fanela u mmbidza Naomi, ngeno hu Yehova Ramaanḓaoṱhe we a ntshonisa a nḓisela khombo?”+
22 Ndi hone u vhuya ha Naomi a tshi bva kha ḽa Moaba+ khathihi na mazwale wawe Ruṱe wa Mumoaba. Vho swika Betlehema musi hu tshi vho thoma u kaṋiwa baḽi.+