Daniele

4 “Hoyu ndi mulaedza une Khosi Nebukadanetsara a khou u rumela vhathu vha kha ḽifhasi ḽoṱhe vha tshaka na nyambo dzo fhambanaho, u ri: Ngavhe mulalo waṋu u tshi vha munzhi! 2 Ndi takalela u ḓivhadza zwiga na zwithu zwi mangadzaho zwe Mudzimu Wa-Ṱaḓulu-ṱaḓulu a nnyitela zwone. 3 Zwiga zwawe ndi zwihulu na zwimangadzo zwawe ndi zwa maanḓa! Muvhuso wawe ndi wa tshoṱhe, u vhusa mirafho na mirafho.+

4 “Nṋe Nebukadanetsara ndo vha ndo takala nḓuni yanga, zwithu zwi tshi khou ntshimbilela pfamoni yanga. 5 Ndo ḽora muḽoro we wa ita uri ndi tshuwe. Ndo tshuwiswa nga zwifanyiso na mabono musi ndo eḓela.+ 6 Nda vhidza vhanna vhoṱhe vho ṱalifhaho vha Babele uri vha nṱalutshedze zwine muḽoro wa amba zwone.+

7 “Nga tshenetsho tshifhinga, ha ḓa vhotshifhe vha manditi, mingome, Vhakaladea* na vhaḓivhi vha ṋaledzi.+ Musi ndi tshi vha vhudza zwe nda ḽora, vho kundelwa u nṱalutshedza uri zwi amba mini.+ 8 Ha fhedzisela ho ḓa Daniele, ane a vhidzwa Beḽetsatsara+ ane dzina ḽawe ḽa hulisa mudzimu wanga+ na ane a vha na maanḓa a midzimu mikhethwa,+ nda mu vhudza zwe nda ḽora, nda ri:

9 “‘Iwe Beḽetsatsara muhulwane wa vhotshifhe vha manditi,+ ndi a zwi ḓivha uri u na maanḓa a midzimu mikhethwa+ na uri a hu na tshiphiri tshine u si kone u tshi dzumbulula.+ Nṱalutshedze uri mabono e nda a ḽora a amba mini.

10 “‘Kha mabono e nda a vhona musi ndo eḓela, ndo vhona muri+ u vhukati ha ḽifhasi, wo vha u mulapfu-lapfu.+ 11 Wonoyo muri wa ḓi lapfa u tshi ya, wa khwaṱha, ṱhodzi yawo ya swika ṱaḓulu, wa vhonala ḽifhasini ḽoṱhe. 12 Maṱari awo o vha e avhuḓi, u na mitshelo minzhi, u na zwiḽiwa zwinzhi zwine zwa eḓana vhoṱhe. Zwivhanda zwo vha zwi tshi dzula murunzini wawo, zwiṋoni zwi tshi dzula matavhini awo, zwivhumbiwa zwoṱhe zwi tshi ḽa khawo.

13 “‘Musi ndi tshi khou vhona eneo mabono ndo eḓela, nda vhona muḓinḓa mukhethwa a tshi tsa a tshi bva ṱaḓulu.+ 14 Onoyo muḓinḓa a vhidzelela a ri: “Rema muri na matavhi awo,+ u zuze* maṱari awo, u balanganye na mitshelo yawo! Zwivhanda nga zwi shavhe fhasi hawo na zwiṋoni zwi shavhe matavhini awo. 15 U sie tshiguthe tshawo tshi vhukati ha ḓaka, u tshi vhofhe nga tsimbi yo ṱanganyiswaho na koporo. Tshi ṋukadzwe nga ṅwando, tshi dzule na zwivhanda zwine zwa ḽa hatsi.+ 16 Mbilu yatsho i si tsha vha ya muthu, i vhe ya tshivhanda, tshi fhedze zwifhinga zwa sumbe.+ 17 Zwenezwi zwo ambiwa nga vhaḓinḓa,+ ndi khaṱhulo ya vhakhethwa, uri vhathu vha ḓivhe uri Wa-Ṱaḓulu-ṱaḓulu ndi Muvhusi wa mivhuso ya vhathu+ na uri u ṋea vhuhosi ane a funa, u vhu ṋea na wa vhuimo ha fhasi-fhasi.”

18 “‘Hezwi ndi zwe nṋe Khosi Nebukadanetsara nda ḽora; zwino iwe Beḽetsatsara mmbudze zwine muḽoro wa amba zwone, ngauri vhanna vhoṱhe vho ṱalifhaho vha re muvhusoni wanga vho kundelwa u nṱalutshedza zwine wa amba zwone.+ Fhedzi iwe u nga kona u nṱalutshedza ngauri u na maanḓa a midzimu mikhethwa.’

19 “Nga tshenetsho tshifhinga, Daniele we a vha a tshi pfi Beḽetsatsara,+ o tshuwa lwa tshifhinganyana nga nṱhani ha zwe a vha a tshi khou humbula.

“Khosi ya ri, ‘Iwe Beḽetsatsara, u songo tshuwiswa nga muḽoro na nga zwine wa amba zwone.’

“Beḽetsatsara a fhindula a ri, ‘Iwe thovhela, ngavhe muḽoro uyu u tshi ambela kha vhane vha u vhenga, na ṱhalutshedzo yawo i tshi ambela kha maswina au.

20 “‘Muri we wa u vhona u tshi ḓi lapfa u tshi ya wa khwaṱha, we ṱhodzi yawo ya swika ṱaḓulu, wa vhonala ḽifhasini ḽoṱhe,+ 21 u na maṱari avhuḓi, mitshelo minzhi na zwiḽiwa zwinzhi zwine zwa eḓana vhoṱhe, we zwivhanda zwa vha zwi tshi dzula murunzini wawo, na we zwiṋoni zwa vha zwi tshi dzula matavhini awo,+ 22 ndi iwe thovhela, ngauri vhuhulu hau na maanḓa au na vhugala hau zwo vha zwihulu zwa swika ṱaḓulu,+ wa vhusa ḽifhasi ḽoṱhe.+

23 “‘Khosi yo vhona muḓinḓa mukhethwa+ a tshi tsa a tshi bva ṱaḓulu, onoyo muḓinḓa a ri: “Rema muri u u tshinyadze, fhedzi u sie tshiguthe tshawo tshi vhukati ha ḓaka, u tshi vhofhe nga tsimbi yo ṱanganyiswaho na koporo. Tshi ṋukadzwe nga ṅwando, tshi dzule na zwivhanda zwine zwa ḽa hatsi u swika tshi tshi fhedza zwifhinga zwa sumbe.”+ 24 Iwe thovhela, hezwi ndi zwine muḽoro wa amba zwone; ndi zwe Wa-Ṱaḓulu-ṱaḓulu a ri zwi ḓo itea kha thovhela muṋe wanga. 25 U ḓo pandelwa vhathuni, wa dzula na zwivhanda, u ḓo ḽa hatsi sa kholomo; u ḓo ṋukadzwa nga ṅwando+ wa fhedza zwifhinga zwa sumbe+ u swika u tshi ḓivha uri Wa-Ṱaḓulu-ṱaḓulu ndi Muvhusi wa mivhuso ya vhathu na uri u ṋea vhuhosi ane a funa.+

26 “‘Ngauri ho pfi hu sale tshiguthe tshawo,+ muvhuso wau u ḓo dovha wa vha wau, musi u tshi vho ḓivha uri ndi Mudzimu ane a khou vhusa e ngei ṱaḓulu. 27 Iwe thovhela, ngavhe u tshi ṱanganedza nyeletshedzo yanga. U litshe zwivhi zwau, u ite zwo lugaho, na u litsha u haṱula nga nḓila i songo teaho, u khathutshele vhashai. Khamusi zwi ḓo u tshimbilela wa vha na mulalo.’”+

28 Zwenezwi zwoṱhe zwo itea kha Khosi Nebukadanetsara.

29 Musi ho no fhela miṅwedzi ya 12, khosi yo vha i tshi khou tshimbila nṱha ha ṱhanga ya pfamo ya Babele. 30 Khosi yo vha i tshi khou ri: “Naa uyu a si muḓi Muhulu wa Babele we nṋe nda u fhaṱela nnḓu yanga ya vhuhosi nga nungo dzanga na maanḓa anga ndi tshi itela u sumbedza vhugala hanga na vhuhulu hanga?”

31 Musi i tshi kha ḓi amba, ha pfala ipfi ḽi tshi bva ṱaḓulu, ḽa ri: “Zwine zwa ḓo itea kha iwe Khosi Nebukadanetsara ndi hezwi, ‘Wo dzhielwa muvhuso,+ 32 u ḓo pandelwa vhathuni. U ḓo dzula na zwivhanda, wa ḽa hatsi sa kholomo, wa fhedza zwifhinga zwa sumbe u swika u tshi ḓivha uri Wa-Ṱaḓulu-ṱaḓulu ndi Muvhusi wa mivhuso ya vhathu na uri u ṋea vhuhosi ane a funa.’”+

33 Zwe zwa vha zwo ambiwa zwa itea kha Nebukadanetsara nga tshenetsho tshifhinga. A pandelwa vhathuni, a thoma u ḽa hatsi sa kholomo, a ṋukadzwa nga ṅwando u swika mavhudzi awe a tshi lapfa a nga mithenga ya goni, ṋala dzawe dza nga dza tshiṋoni.+

34 “Musi tshenetsho tshifhinga tsho no fhela,+ nṋe Nebukadanetsara nda sedza ṱaḓulu, nda dovha nda kona u ṱalukanya; nda renda Wa-Ṱaḓulu-ṱaḓulu, nda renda na u ṋea vhugala Ane a tshila lini na lini, ngauri muvhuso wawe ndi wa tshoṱhe, u vhusa mirafho na mirafho.+ 35 Vhathu vhoṱhe vha re kha ḽifhasi a vha tshithu, u ita zwine a funa nga mmbi yawe ya ṱaḓulu na nga vhathu vha re kha ḽifhasi. A hu na ane a nga mu thivhela+ kana ane a nga mu vhudzisa a ri, ‘Wo ita mini?’+

36 “Nga tshenetsho tshifhinga ndo kona u dovha nda ṱalukanya, nda dovha nda wana muvhuso wanga, vhugala hanga na lunako lwanga.+ Vhaḓinḓa vhanga vhahulwane na vhaḓivhalea vha nṱoḓa, nda dovha nda vha khosi, nda huliswa u fhira na u thomani.

37 “Zwino nṋe Nebukadanetsara ndi renda, u hulisa na u ṋea vhugala Khosi ya ṱaḓulu,+ ngauri mishumo yawe yoṱhe ndi ya ngoho na nḓila dzawe dzo luga+ na uri u ṱukufhadza vha ḓihudzaho.”+