Vhahaṱuli
14 Simisoni a tsela Thimine, henefho Thimine a vhona musidzana wa Mufilisita. 2 A tshi vhuya a amba na khotsi awe na mme awe a ri: “Ndo vhona musidzana wa Mufilisita ngei Thimine, ndi khou ṱoḓa uri ni mmalele ene.” 3 Fhedzi khotsi awe na mme awe vha ri: “Naa u nga si wane mufumakadzi vhukati ha mashaka au na vhukati ha vhathu vha hashu vhoṱhe?+ Naa u fanela u vhinga mufumakadzi kha Vhafilisita vha songo fumbaho?” Naho zwo ralo, Simisoni a fhindula khotsi awe a ri: “Mmalele ene ngauri ndi ene ane nda mu funa.” 4 Khotsi awe na mme awe vho vha vha sa zwi ḓivhi uri zwenezwi zwi khou bva kha Yehova, ngauri Simisoni o vha a tshi khou ṱoḓa tshibuli tsha u lwa na Vhafilisita, samusi Vhafilisita vho vha vha tshi khou vhusa Vhaisiraele nga tshenetsho tshifhinga.+
5 Simisoni a tsela Thimine e na khotsi awe na mme awe. Musi a tshi swika masimuni a minḓirivhe a Thimine, a vhona ndau i tshi khou ḓa khae i tshi khou vhomba. 6 Muya wa Yehova wa mu ṋea maanḓa,+ a i fhandula nga vhukati, vhunga muthu a tshi fhandukanya tshibudzana nga zwanḓa zwawe. Fhedzi ho ngo vhudza khotsi awe kana mme awe zwe a ita. 7 A ṱuwa a ya a amba na onoyo musidzana, onoyo musidzana o vha a tshi kha ḓi takadza Simisoni.+
8 Nga murahu musi a tshi khou vhuyelela uri a dzhie onoyo musidzana a mu ise hayani,+ a pambuwa nḓilani u itela u sedza mutumbu wa ndau, henefho kha mutumbu wa ndau ho vha hu na guma ḽa ṋotshi na mutoli. 9 A u bvisa nga zwanḓa zwawe, a u ḽa musi a tshi khou tshimbila. A tshi swika ha vhabebi vhawe, a vha ṋea muṅwe mutoli uri vha ḽe. Fhedzi ho ngo vha vhudza uri o bvisa wonoyo mutoli kha mutumbu wa ndau.
10 Khotsi awe a ya ha onoyo musidzana, Simisoni a ita tshimima henefho ngauri vhaṱhannga vho vha vha tshi anzela u ita nga u ralo. 11 Musi vha tshi mu vhona, vha mu ḓisela pheletshedzi dza vhaṱhannga dza 30 uri dzi dzule nae. 12 Simisoni a amba navho a ri: “Litshani ndi ni vhudze thai. Arali na ḓivha uri ndi mini hu sa athu u fhela maḓuvha a sumbe a tshimima, ndi ḓo ni ṋea malabi a ḽinene a 30 na zwiambaro zwa 30. 13 Fhedzi arali na sa kona u i ḓivha, ni nṋee malabi a ḽinene a 30 na zwiambaro zwa 30.” Vha ri: “Ri vhudze thai yau, ri ṱoḓa u i pfa.” 14 A amba navho a ri:
“Thaii, tshiḽiwa tsho bva kha ine ya ḽa,
Muḓifho wo bva kha ya maanḓa.”+
Ha fhela maḓuvha mararu vha sa koni u ḓivha uri yeneyi thai ndi mini. 15 Nga ḓuvha ḽa vhuṋa vha amba na mufumakadzi wa Simisoni vha ri: “Fhura munna wau+ uri a ri vhudze uri yeneyi thai ndi mini. Wa sa ita nga u ralo, ri ḓo fhisa iwe na nnḓu ya khotsi au. Naa wo ri vhidzela fhano u itela u ri dzhiela thundu dzashu?” 16 Mufumakadzi wa Simisoni a mu lilela a ri: “U a mmbenga, a u mpfuni.+ Wo vhudza vhathu vha hashu thai, fhedzi a wo ngo mmbudza uri ndi mini.” Simisoni a amba nae a ri: “Naa ndi u bulele yone ngeno ndi songo bulela vhabebi vhanga?” 17 Fhedzi a dzula a tshi mu lilela ha vhuya ha fhela maḓuvha a sumbe a tshimima. A fhedzisela o mu vhudza uri yeneyo thai ndi mini nga ḓuvha ḽa vhusumbe ngauri o vha a tshi khou mu kombetshedza. Nga murahu, mufumakadzi wawe a ya a vhudza vhathu vha hawe uri yeneyo thai ndi mini.+ 18 Nga ḓuvha ḽa vhusumbe musi a sa athu u dzhena kamarani ya nga ngomu vhanna vha muḓi wonoyo vha amba na Simisoni vha ri:
“Ndi mini tshine tsha ḓifha u fhira mutoli,
Ndi mini tshine tsha vha na maanḓa u fhira ndau?”+
A vha fhindula a ri:
“Arali ni vhe ni songo lima nga ṋamana yanga,+
No vha ni tshi ḓo vha ni songo ḓivha thai yanga.”
19 Muya wa Yehova wa ḓa khae,+ a tsela Asikaloni+ a vhulaya vhanna vha 30, a dzhia zwiambaro zwavho a zwi ṋea vhe vha ḓivha uri thai yawe ndi mini.+ O vha o sinyuwa musi a tshi vhuyelela nḓuni ya khotsi awe.
20 Mufumakadzi wa Simisoni+ a ṋewa muṅwe wa pheletshedzi dzawe dze a vha o dzula nadzo.+