Bugu Ya Vhuvhili Ya Koronika
35 Yosia a itela Yehova Paseka+ ngei Yerusalema, vha ṱhavha tshiṱhavhelo tsha Paseka+ nga ḓuvha ḽa vhu 14 ḽa ṅwedzi wa u thoma.+ 2 A vhea vhotshifhe mishumoni yavho, a vha ṱuṱuwedza uri vha ite mishumo yavho nḓuni ya Yehova.+ 3 A amba na Vhalevi, vha funzaho Vhaisiraele vhoṱhe,+ vha re vhakhethwa kha Yehova a ri: “Vheani Mbulungelo khethwa nḓuni ye ya fhaṱwa nga Salomo murwa wa Khosi Davida wa Isiraele;+ a ni tsha ḓo i hwala nga mahaḓa aṋu.+ Zwino shumelani Yehova Mudzimu waṋu na vhathu vhawe vha Isiraele. 4 Ḓilugiseleni u ya nga miṱa ya vhokhotsi aṋu u ya nga zwigwada zwaṋu, ni tshi tevhela zwo ṅwaliwaho nga Khosi Davida+ wa Isiraele na nga murwa wawe Salomo.+ 5 Imani fhethu hukhethwa ni zwigwada u ya nga miṱa ya vhokhotsi aṋu ni tshi itela vhahaṋu na vhaṅwe vhathu vhoṱhe, ni na tshigwada tsha miṱa ya vhokhotsi tsha Vhalevi. 6 Ṱhavhani tshiṱhavhelo tsha Paseka,+ ni ite uri ni vhe vhakhethwa, ni lugiselele vhahaṋu uri vha tevhedze zwe Yehova a zwi amba a tshi shumisa Mushe.”
7 Yosia a ṋea vhathu masambi, ngwana dza nduna na zwibokoṱo, uri zwi vhe zwiṱhavhelo zwa Paseka zwa vhoṱhe vha re hone, zwoṱhe zwo ṱangana zwo vha zwi 30 000, u katela na kholomo dza 3 000. Zwenezwo zwo vha zwi tshi bva kha masambi a khosi.+ 8 Vhakololo vhawe vha dovha vha bvisa muṋeelo wa tshifhiwa tsha u ḓifunela vha tshi itela vhathu, vhotshifhe na Vhalevi. Hilikia,+ Sakaria na Yehiele vharangaphanḓa vha nnḓu ya Mudzimu wa ngoho, vho ṋea vhotshifhe zwiṱhavhelo zwa Paseka zwa 2 600 na kholomo dza 300. 9 Konanya na vharathu vhawe Shemaya na Nethaniele na Hasabia, Yeiele na Yosabada vharangaphanḓa vha Vhalevi vho ṋea Vhalevi zwiṱhavhelo zwa Paseka zwa 5 000 na kholomo dza 500.
10 Mushumo wa dzudzanywa, vhotshifhe vha ima fhethu havho na Vhalevi nga zwigwada+ zwavho sa zwe khosi ya vha laya. 11 Vha ṱhavha zwiṱhavhelo zwa Paseka,+ vhotshifhe vha shasha malofha e vha a wana khavho,+ musi Vhalevi vha tshi khou sutula mikumba kha zwifuwo.+ 12 Vha dovha vha lugisa zwifhiwa zwa u fhiswa uri vha zwi ṋee vhoṱhe vha re zwigwada u ya nga miṱa ya vhokhotsi, uri vha zwi ṋekedze Yehova sa zwe zwa ṅwaliwa buguni ya Mushe; vha ita zwi fanaho na kha kholomo. 13 Vha bika* tshifhiwa tsha Paseka nga mulilo u ya nga maitele ayo;+ vha bika zwifhiwa zwikhethwa nga zwibodo, mabodo na dzipani, vha ṱavhanya vha zwi ḓisa kha vhathu vhoṱhe. 14 Vha ḓilugiselela na u lugiselela vhotshifhe ngauri vhotshifhe, vhaḓuhulu vha Aroni, vho vha vha tshi khou ṋekedza zwiṱhavhelo zwa u fhiswa na zwipiḓa zwa mapfura u swika ḽi tshi kovhela, Vhalevi vha ḓilugiselela na u lugiselela vhotshifhe, vhaḓuhulu vha Aroni.
15 Vhaimbi, vharwa vha Asafu,+ vho vha vho ima fhethu havho he vha laiwa uri vha ime hone nga Davida,+ Asafu,+ Hemani na Yeduthuni+ muvhoni wa khosi; na vhalindakhoro vho vha vho ima khoroni dzo fhambanaho.+ Ho vha hu si na tshiitisi tsha uri vha ṱutshele mishumo yavho, ngauri vhahavho vha Vhalevi vho vha vho vha lugiselela. 16 Mishumo yoṱhe ya nḓuni ya Yehova yo vha yo lugiselelwa nga ḽeneḽo ḓuvha uri hu itwe Paseka+ na u ṋekedza zwifhiwa zwa u fhiswa aḽeṱareni ya Yehova, u ya nga zwe khosi Yosia a laya.+
17 Vhaisiraele vha re hone vha ita Paseka nga tshenetsho tshifhinga na Vhuṱambo ha Vhurotho vhu si na Mbiliso lwa maḓuvha a sumbe.+ 18 Ho vha hu sa athu u vhuya ha itwa Paseka ine ya nga yeneyo kha ḽa Isiraele u bva misini ya muporofita Samuele; a hu na maṅwe mahosi a Isiraele e a ita Paseka i fanaho na yo itwaho nga Yosia,+ vhotshifhe, Vhalevi, Vhayuda vhoṱhe na Vhaisiraele vha re henefho na vhadzulapo vha Yerusalema. 19 Yeneyo Paseka yo itwa nga ṅwaha wa vhu 18 hu tshi khou vhusa Yosia.
20 Nga murahu, Yosia o no fhedza u lugiselela thembele,* Khosi Nexo+ wa Egipita a ḓa u lwa na Karakemisi tsini na Mulambo wa Yufuratha. Yosia a ya u lwa nae.+ 21 Ngauralo, Nexo a rumela vhaḓinḓa khae a ri: “Ndi na mafhungo-ḓe na iwe khosi ya Yuda? Ṋamusi a thi khou ḓa u lwa na iwe, fhedzi ndi khou lwa na luṅwe lushaka, Mudzimu o ri ndi ṱavhanye. Litsha u lwa na Mudzimu ane a vha na nṋe, a sa ḓo u fhelisa.” 22 Naho zwo ralo, Yosia a si mu litshe, a ambara zwiṅwe zwiambaro uri a si ḓivhiwe,+ uri a lwe nae, a si thetshelese zwe Nexo a amba, zwi tshi bva kha Mudzimu. Nga zwenezwo, a ḓa a lwa Muedzini wa Megido.+
23 Vhapfuli vha pfula Khosi Yosia nga misevhe, khosi ya amba na vhashumeli vhayo ya ri: “Mbviseni fhano, ngauri ndo huvhala nga maanḓa.” 24 Vhashumeli vhawe vha mu tsitsa kha gariki, vha mu ṋamedza kha gariki yawe ya vhuvhili ya nndwa vha mu isa Yerusalema. A fa nga u ralo, a vhulungwa vhiḓani ḽa vhomakhulukuku wawe,+ vhathu vhoṱhe vha Yuda na vha Yerusalema vha lilela Yosia. 25 Yeremia+ o imbela Yosia luimbo, na vhaimbi vhoṱhe vha vhanna na vha vhafumakadzi+ vha kha ḓi lilela Yosia nga nyimbo dza zwililo* u swika na ṋamusi; ha itwa phetho ya uri dzi imbiwe Isiraele, dzo ṅwaliwa buguni ya zwililo.
26 Mafhungo oṱhe a Yosia na mishumo yawe ya lufuno lu sa shanduki, a tshi tevhedza zwo ṅwaliwaho Mulayoni wa Yehova, 27 zwe a ita, u bva mathomoni u swika magumoni, zwo ṅwaliwa Buguni ya Mahosi a Isiraele na a Yuda.+