Bugu Ya Vhuvhili Ya Koronika
26 Vhathu vhoṱhe vha Yuda vha dzhia Usia,+ we a vha e na miṅwaha ya 16, vha mu ita khosi vhudzuloni ha khotsi awe Amatsia.+ 2 A kunda muḓi wa Elotha+ a tshi itela Yuda, a u fhaṱulula musi khosi* yo no vhulungwa na vhomakhulukuku wayo.+ 3 Usia+ o vha e na miṅwaha ya 16 musi a tshi vha khosi, o vhusa miṅwaha ya 52 Yerusalema. Mme awe o vha a tshi pfi Yekolia wa Yerusalema.+ 4 O bvela phanḓa a tshi ita zwo lugaho phanḓa ha Yehova, u fana na khotsi awe Amatsia.+ 5 O dzula a tshi ṱoḓa Mudzimu misini ya Sakaria, ndi ene we a mu funza u ofha Mudzimu wa ngoho. Tshifhingani tsha musi a tshi khou ṱoḓa Yehova, Mudzimu wa ngoho o mu fhaṱutshedza.+
6 O bva a ya u lwa na Vhafilisita,+ a wisa mbondo dza Gathi,+ luvhondo lwa Yabine+ na luvhondo lwa Asidodo.+ A fhaṱa miḓi shangoni ḽa Asidodo na shangoni ḽa Vhafilisita. 7 Mudzimu wa ngoho o bvela phanḓa a tshi mu thusa u lwa na Vhafilisita, Vhaarabu+ vha dzulaho Gurubaali na Vhamehumi. 8 Vhaamoni+ vha luvha Usia. Bvumo ḽawe ḽa phaḓalala ḽa swika Egipita, ngauri maanḓa awe o vha e mahulu. 9 Usia a dovha a fhaṱa mutsheṱo+ ngei Yerusalema Khoroni ya Khonani,+ Khoroni ya Govhani+ na Thikho dza Mutsheṱo, a dzi khwaṱhisa. 10 A dovha a fhaṱa mitsheṱo+ sogani na u bwa zwisima zwinzhi (ngauri o vha e na zwifuwo zwinzhi); a dovha a ita zwenezwo na ngei Shefela na ngei mudavhini. O vha e na vhalimi na vhane vha shuma tsimuni dza minḓirivhe ngei dzithavhani na ngei Karamele, ngauri o vha a tshi funa zwa vhulimi.
11 Zwiṅwe hafhu, Usia a vha na mmbi yo ḓiṱamaho u itela u lwa. Vho vha vha tshi bva vha tshi ya dzinndwani, vho dzudzanyea nga zwigwada. Vho vha vha tshi vhalwa na u ṅwaliswa+ nga Yeiele muṅwaleli+ na Maaseya we a vha e muḓinḓa, vha tshi langiwa nga Henania, muṅwe wa vhakololo vha khosi. 12 Tshivhalo tshoṱhe tsha vharangaphanḓa vha miṱa ya vhokhotsi tshe tsha vha tshi tshi langa vhenevha vhahali tsho vha tshi 2 600. 13 Vho vha vha tshi langa mmbi ya vhanna vho ḓiṱamaho vha 307 500 vho lugelaho u lwa, mmbi i re na maanḓa ine ya tikedza khosi i tshi lwa na maswina ayo.+ 14 Usia a ṋea mmbi yawe yoṱhe zwiṱangu, mapfumo,+ magondolo, zwiambaro zwa u ḓitsireledza nndwani,+ vhura na magatho.+ 15 A dovha a ita na mitshini ya nndwa ngei Yerusalema yo dzudzanywaho nga vhanna vha re na vhutsila; yo vha yo vhewa kha mitsheṱo+ na kha khona dza mbondo, yo vha i tshi kona u posa misevhe na matombo mahulu. Bvumo ḽawe ḽo swika kule, ngauri o vha a tshi khou wana thuso khulu, a vha na maanḓa.
16 Naho zwo ralo, musi a tshi tou vha na maanḓa, a thoma u ḓihudza u swika a tshi ḓitshinya, ho ngo fhulufhedzea kha Yehova Mudzimu wawe nge a dzhena thembeleni ya Yehova u itela u fhisa zwioro kha aḽeṱare ya zwioro.+ 17 Tshifhe Asaria na vhaṅwe vhotshifhe vha Yehova vha 80 vha re na tshivhindi vha ṱavhanya vha mu tevhela. 18 Vha kaidza Khosi Usia vha ri: “Usia, a zwo ngo tea uri u fhisele Yehova zwioro!+ Ndi vhotshifhe fhedzi vhane vha fanela u fhisa zwioro, ngauri ndi vhaḓuhulu vha Aroni+ vhe vha itwa uri vha vhe vhakhethwa. Ibva nḓuni khethwa, ngauri a wo ngo fhulufhedzea, u nga si huliswe nga Yehova Mudzimu nga zwe wa ita.”
19 Fhedzi Usia we a vha o fara mudzio wa u fhisela zwioro a sinyuwa;+ musi a tshee o sinyutshela vhotshifhe, o ima tsini na aḽeṱare ya zwioro nḓuni ya Yehova, a bva mapele+ kha phanḓa vhotshifhe vha tshi zwi vhona. 20 Musi Asaria muhulwane wa vhotshifhe na vhaṅwe vhotshifhe vhoṱhe vha tshi mu lavhelesa, vha vhona o bva mapele kha phanḓa! Vha ṱavhanya vha mu bvisela nnḓa, na ene a ṱavhanya a bva, ngauri Yehova o vha o mu rwa.
21 Khosi Usia a vha na mapele u swika a tshi fa, o vha a tshi dzula kha nnḓu i re thungo,+ ngauri o vha a si tsha tendelwa u dzhena nḓuni ya Yehova. Yothamu murwa wawe o vha a tshi langa nnḓu* ya khosi, a tshi haṱula vhathu vha shango.+
22 Mafhungo oṱhe a Usia, u bva mathomoni u swika magumoni, o ṅwaliwa kha mafhungo a muporofita Yesaya+ murwa wa Amotsi. 23 Usia a vhulungwa na vhomakhulukuku wawe mavhiḓani a mahosi, nge vha ri: “U na mapele.” Murwa wawe Yothamu+ a vha khosi vhudzuloni hawe.