Yesaya
32 Khosi+ i ḓo vhusa uri hu vhe na zwivhuya,+
Vhakololo vha ḓo vhusa uri hu vhe na khaṱhulo yo teaho.
2 Muṅwe na muṅwe wavho u ḓo nga vhudzumbamo musi hu na muya,
Vha ḓo vha fhethu ha u dzumbama* musi hu na mvula khulu,
Vha ḓo fana na milambwana shangoni ḽi si na maḓi,+
Vha ḓo fana na murunzi wa tombo ḽihulu shangoni ḽo omaho.
3 Maṱo a vhane vha vhona ha tsha ḓo valea,
Na nḓevhe dza vhane vha pfa dzi ḓo thetshelesa.
4 Mbilu dza vhane vha ṱavhanyedza u ita zwithu dzi ḓo elekanya nga ha nḓivho,
Na ndimi dza vhane vha kakamela dzi ḓo amba zwavhuḓi nga nḓila i pfalaho.+
5 A si na ṱhalukanyo ha tsha ḓo pfi u na mafunda,
Muthu a sa fhulufhedzei ha tsha ḓo pfi o luga;
6 Ngauri a si na ṱhalukanyo u ḓo amba zwithu zwi sa pfali,
Mbilu yawe i ḓo vhamba maano mavhi,+
U itela u tikedza vhugunei* na u amba zwithu zwi sa ḓivhalei nga ha Yehova,
Uri a re na nḓala a si fhiwe zwa u ḽa
Na uri a re na ḓora a si fhiwe zwa u nwa.
7 Maano a muthu a sa fhulufhedzei ndi mavhi;+
U ṱuṱuwedza vhuḓifari vhu shonisaho
Uri a tshinyadze muthu ane a khou tambula nga u mu zwifhela,+
Naho mushai a tshi amba zwo lugaho.
8 Muthu a re na mafunda u ṱoḓa u ita zwithu nga mafunda,
U bvela phanḓa a tshi ṋea nga mafunda.
9 “Inwi vhafumakadzi vha ḓifhulufhelesaho, takuwani ni thetshelese ipfi ḽanga!
Inwi vhananyana vha sa vhilaeli nga tshithu,+ thetshelesani zwine nda amba!
10 Hu tshi tou fhela ṅwaha, inwi vhane na sa vhilaele nga tshithu ni ḓo tetemela,
Ngauri hu ḓo vha hu songo kaṋiwa mitshelo musi khaṋo ya nḓirivhe i tshi fhela.+
11 Inwi vhafumakadzi vha ḓifhulufhelesaho, tshuwani!
Inwi vha sa vhilaeli nga tshithu, tetemelani!
Bvulani ni sale ni fhedzi,
Ni vhofhe madzanganda kha khundu.+
12 Ni rwe khana dzaṋu ni kha zwililo
Ni tshi lilela masimu ane na a funa na minḓirivhe i aṋwaho.
13 Ngauri mavu a vhathu vhanga a ḓo mela mipfa;
I ḓo mela nḓuni dzoṱhe dza vho takalaho,
Muḓini wa vho takalaho.+
14 Mutsheṱo wo khwaṱhaho wo sala u shubi;
Muḓi u re na phosho wo sala u shubi.+
Ofele+ na tshiingamo zwo no vha shubi lwa tshoṱhe,
Donngi dzi ḓo ḓiphiṋa henefho,
Hu ḓo vha pfulo ya masambi,+
15 U swika ri tshi shululelwa muya u bvaho ṱaḓulu,+
Na soga ḽi tshi vha tsimu ya mitshelo,
Na tsimu ya mitshelo i tshi fana na ḓaka.+
16 Ndi hone sogani hu tshi ḓo vha na khaṱhulo yo teaho,
Tsimuni ya mitshelo ha vha na zwivhuya.+
17 Zwivhuya zwa ngoho zwi ḓo bveledza mulalo,+
Mitshelo ya zwivhuya zwa ngoho i ḓo vha mulalo na u tsireledzea lini na lini.+
18 Vhathu vhanga vha ḓo dzula fhethu hu re na mulalo,
Fhethu ho tsireledzeaho ha u awela hu re na mulalo.+
19 Fhedzi tshifhango tshi ḓo vunḓekanya ḓaka,
Na muḓi wa phusukanywa tshoṱhe.
20 Hu takala inwi vhane na zwala mbeu tsini na maḓi,
Vhane vha vulela mboho na donngi.”+