Kha Vharoma

4 Arali zwo ralo, ndi mini zwe Abrahamu makhulukuku washu a zwi wana? 2 Arali Abrahamu o vhidzwa o lugaho nga nṱhani ha mishumo yawe, o vha a tshi ḓo vha o zuwa, fhedzi hu si phanḓa ha Mudzimu. 3 Luṅwalo lu ri mini? Lu ri: “Abrahamu o vha na lutendo kha Yehova,* a dzhiiwa sa o lugaho.”+ 4 Mushumi a tshi wana malamba a si nga nṱhani ha vhuthu vhuhulu, u khou ṋewa zwo mu fanelaho. 5 Fhedzi Mudzimu u dzhia muthu sa o lugaho musi onoyo muthu a tshi tenda khae, nṱhani ha u ḓitika nga zwine a zwi ita, naho a tshi tshinya.+ 6 Samusi na Davida o amba nga ha muthu o takalaho ane Mudzimu a mu dzhia sa o lugaho, naho hu si nga mishumo yawe, a ri: 7 “Hu takala vhe vha hangwelwa vhutshinyi havho na vhe zwivhi zwavho zwa fukedzwa;* 8 hu takala ane Yehova* a sa ḓo vhuya a humbula zwivhi zwawe.”+

9 Naa hu takala vho fumbaho fhedzi kana na vha songo fumbaho vha a takala?+ Ngauri ri ri: “Lutendo lwa Abrahamu lwo ita uri a dzhiiwe sa o lugaho.”+ 10 Ndi lini he Mudzimu a mu dzhia sa o lugaho? Musi o no fumba kana a sa athu u fumba? Mudzimu o mu dzhia sa o lugaho a sa athu u fumba. 11 Mudzimu o mu vhudza uri a fumbe. Lwonolwu lwo vha lu luswayo+ lwa u sumbedza uri o luga nga nṱhani ha lutendo lwe a vha e nalwo a sa athu u fumba. Abrahamu a vha khotsi a vhoṱhe vha re na lutendo+ naho vha sa athu u fumba. Mudzimu u dzhia vhenevho sa vho lugaho. 12 Abrahamu+ u dovha a vha khotsi a vho fumbaho. A si khotsi a vho fumbaho fhedzi, ndi khotsi a vhane vha tshila u tendelana na zwine a zwi tenda. Khotsi ashu Abrahamu o vha na lwonolwo lutendo a sa athu u fumba.

13 Ngauri musi hu tshi fhulufhedziswa Abrahamu kana vhana* vhawe uri shango ḽi ḓo vha ifa ḽavho,+ ho vha hu si ngauri u tevhedza mulayo, fhedzi ndi ngauri o vha e na lutendo,+ a tshi dzhiiwa sa o lugaho. 14 Arali vhane vha tevhedza mulayo vhe maḽaifa, lutendo a lu tshee na mushumo, na zwe zwa fhulufhedziswa a zwi tsha amba tshithu. 15 Mulayo u ḓisa mbiti,+ fhedzi hune ha si vhe na mulayo, a hu na u pfuka mulayo.+

16 Nga nṱhani ha vhuthu vhuhulu,+ Mudzimu o fhulufhedzisa Abrahamu ngauri o vha e na lutendo. Na vhana* vhawe vhoṱhe+ vhane vha tevhedza Mulayo na vhane vha tevhedza lutendo lwa Abrahamu, ane a vha khotsi ashu roṱhe,+ vho wana zwe zwa fhulufhedziswa. 17 (Samusi ho ṅwaliwa ha pfi: “Ndo ita uri u vhe khotsi a tshaka nnzhi.”)+ Zwe Mudzimu a zwi fhulufhedzisa zwo vha zwi tshi ḓo itea, Abrahamu o vha a tshi tenda Mudzimu, ane a ita uri vho faho vha tshile, a vhidzaho zwi siho zwa nga zwi hone. 18 Naho zwo vha zwi tshi vhonala zwi sa konadzei, Abrahamu o tenda uri u ḓo vha khotsi a tshaka nnzhi. O tenda zwe a vhudzwa zwone hu tshi pfi: “Vhana* vhau vha ḓo vha vhanzhi.”+ 19 O vha a tshi zwi ḓivha uri muvhili wawe u nga wo fa (samusi o vha e na miṅwaha i ṱoḓaho u vha 100),+ na uri Sara o vha a sa bebi.+ Fhedzi o bvela phanḓa e na lutendo lwo khwaṱhaho. 20 Ho ngo vhuya a timatima zwe Mudzimu a zwi fhulufhedzisa ngauri o vha e na lutendo; o bvela phanḓa e na lutendo lwo khwaṱhaho, a renda Mudzimu 21 a tshi tenda uri U ḓo ita zwe A zwi fhulufhedzisa.+ 22 Nga zwenezwo, “o dzhiiwa sa o lugaho.”+

23 Naho zwo ralo, maipfi ane a ri, “o dzhiiwa sa o lugaho” o ṅwaleliwa ene+ 24 na riṋe vhane ra ḓo pfi ro luga, ngauri ri a tenda uri O vusa Yesu Murena washu vhafuni.+ 25 O vhulawa hu tshi itelwa vhutshinyi hashu,+ a vuswa uri ri kone u pfi vho lugaho.+