Kha Vhagalata
4 Arali muḽaifa a tshi kha ḓi vha ṅwana, u fana na mulanda, naho e muṋe wa zwithu zwoṱhe, 2 ngauri hu na vhane vha ṱhogomela ene na nnḓu yawe u swika tshifhinga tsho vhewaho nga khotsi awe tshi tshi swika. 3 Na riṋe musi ri tshi kha ḓi vha vhana ro vha ri tshi humbula na u ita zwithu u fana na vha ḽino shango.+ 4 Musi tshifhinga tsho vhewaho tshi tshi swika, Mudzimu o ruma Murwa wawe we a bebwa nga mufumakadzi,+ a tevhedza mulayo,+ 5 uri a rengulule vhane vha tevhedza mulayo,+ uri Mudzimu a ri dzhie sa vharwa vhawe.+
6 Ngauri ni vharwa, Mudzimu o rumela muya+ wa Murwa wawe mbiluni dzashu,+ wonoyo muya u a vhidzelela, wa ri: “Aba,* Khotsi!”+ 7 A ni tsha vha vhalanda, ni vharwa; arali ni vharwa, Mudzimu o ni ita maḽaifa.+
8 Musi ni sa athu u ḓivha Mudzimu, no vha ni tshi langiwa nga midzimu ya mazwifhi. 9 Zwino ni vho ḓivha Mudzimu kana ni vho ḓivhiwa nga Mudzimu, ndi ngani ni tshi ṱoḓa u vhuyelela+ kha zwithu zwi si na mushumo zwa ḽino shango uri zwi ni lange?+ 10 Ni pembelela maḓuvha, miṅwedzi,+ dzikhalaṅwaha na miṅwaha. 11 Ndi vhilaela uri zwe nda zwi ita u itela u ni thusa ndo zwi itela mahala.
12 Vhahashu, ndo vha ndi tshi nga inwi,+ fhedzi ndo rembuluwa. Ndi humbela uri ni shanduke samusi na nṋe ndo shanduka. A no ngo nkhakhela. 13 Fhedzi ni a zwi ḓivha uri ndo ni ḓivhadza mafhungo maḓifha lwa u tou thoma, nge nda vha ndi tshi khou lwala. 14 Naho vhulwadze hanga ho vha muhwalo kha inwi, a no ngo nnyadza kana u nnengwa;* fhedzi no mpfara sa muruṅwa wa Mudzimu kana sa Kristo Yesu. 15 Ndi ngani ni songo tsha takala? Ngauri ndi a ni vhudza uri kale no vha ni tshi ṱoḓa u nongola maṱo aṋu na nṋea one,+ arali zwo vha zwi tshi ḓo nthusa. 16 Kani ndo no vha swina ḽaṋu ngauri ndi ni vhudza ngoho? 17 Vhenevha vhanna vha khou ita zwoṱhe zwine vha kona uri vha ni fhure, hu si uri vha ni vhuyedze; fhedzi vha khou ṱoḓa uri ni vha tevhele ni vhe kule na nṋe. 18 Ndi zwavhuḓi arali muthu a tshi khou ni kunga uri a ni vhuyedze, zwi songo vha zwa musi ndi hone fhedzi. 19 Vhananga,+ ni kha ḓi mpfisa vhuṱungu vhu fanaho na ha mufumakadzi a tshi khou beba. Ndi ḓo pfa honovhu vhuṱungu u swika ni tshi sumbedza zwine Kristo a vha zwone. 20 Ndi tama arali ndo vha ndi na inwi zwino uri ndi ambe na inwi zwavhuḓi, ngauri a thi ḓivhi uri ndi ite mini nga inwi.
21 Inwi vhane na ṱoḓa u tevhedza mulayo, naa a ni ḓivhi zwine Mulayo wa zwi amba? 22 Naa a wo ngo amba uri Abrahamu o vha e na vharwa vhavhili? Muṅwe o bebwa nga phuli,+ muṅwe a bebwa nga mufumakadzi o vhofholowaho.*+ 23 Ṅwana wa phuli o bebwa u fana na vhaṅwe vhana,+ ngeno ṅwana wa mufumakadzi o vhofholowaho* o bebwa nge a tou fhulufhedziswa+ nga Mudzimu. 24 Zwenezwi zwithu zwi imela zwine zwa ḓo itea tshifhingani tshi ḓaho; ngauri vhenevha vhafumakadzi vha imela milanga mivhili, muṅwe wo itwa Thavhani ya Sinai,+ vhoṱhe vha re nga fhasi ha wonoyu mulanga ndi phuli; wonoyu mulanga u fana na Hagara. 25 Hagara u imela Sinai,+ thavha i re Arabia, ṋamusi vhuimo hawe vhu fana na ha Yerusalema, ane a vha vhupulini na vhana vhawe. 26 Fhedzi Yerusalema wa ṱaḓulu o vhofholowa, ndi mme ashu.
27 Ngauri ho ṅwaliwa u pfi: “Takala iwe mufumakadzi a sa bebi; fhululedza naho u sa athu u pfa vhuṱungu ha u beba; ngauri vhana vha mufumakadzi a sa bebi vho ḓala u fhira vha mufumakadzi a re na munna.”+ 28 Vhahashu, ni vhana vho fhulufhedziswaho u fana na Isaka.+ 29 Ngauri we a bebwa u fana na vhaṅwe vhana o tovhola we a bebwa nga nṱhani ha muya mukhethwa,+ na ṋamusi zwi tshee zwo tou ralo.+ 30 Fhedzi luṅwalo lu ri mini? Lu ri: “Pandela hoyu mufumakadzi wa phuli na murwa wawe, ngauri murwa wawe ha nga ḓo vha muḽaifa na murwa wa mufumakadzi o vhofholowaho.”*+ 31 Vhahashu, a ri vhana vha phuli, fhedzi ri vhana vha mufumakadzi o vhofholowaho.*