Ekisoda

40 Yehova a amba na Mushe a ri: 2 “Nga ḓuvha ḽa u thoma nga ṅwedzi wa u thoma u imise dennde ḽikhethwa* ḽa muṱangano.+ 3 Khaḽo u dzhenise mbulungelo ya mulanga,*+ u vale Mbulungelo nga khetheni.+ 4 U dzhenise na ṱafula,+ u dzudzanye zwine zwa dzula khayo na u dzhenisa tshiṱomambone+ na u funga mbone+ dzatsho. 5 U vhee na aḽeṱare ya musuku ya zwi⁠oro+ phanḓa ha mbulungelo ya mulanga,* u kapee labi* ḽa u vala muṋango wa dennde ḽikhethwa.+

6 “U vhee aḽeṱare ya tshifhiwa tsha u fhiswa+ phanḓa ha muṋango wa dennde ḽikhethwa ḽa muṱangano, 7 u vhee sambelo vhukati ha dennde ḽa muṱangano na aḽeṱare, u shele maḓi khaḽo.+ 8 U ite muṱa+ u mona nayo, u vhee labi*+ muṋangoni wa muṱa. 9 U dovhe u dzhie na mapfura a u ḓodza+ u ḓodze dennde ḽikhethwa na zwoṱhe zwi re khaḽo,+ u ḽi ite ḽikhethwa na thundu dzaḽo dzoṱhe, ndi hone ḽi tshi ḓo vha ḽikhethwa. 10 U ḓodze aḽeṱare ya tshifhiwa tsha u fhiswa na thundu dzayo dzoṱhe, u ite uri aḽeṱare i vhe khethwa, ndi hone i tshi ḓo vha aḽeṱare khethwa-khethwa.+ 11 Nga murahu ha zwenezwo, u ḓodze sambelo na milenzhe yaḽo u ḽi ite ḽikhethwa.

12 “U ḓise Aroni na vharwa vhawe tsini na muṋango wa dennde ḽa muṱangano, u vha ṱanzwe nga maḓi.+ 13 U ambadze Aroni zwi⁠ambaro zwikhethwa,+ u mu ḓodze+ u mu ite mukhethwa, a shume sa tshifhe wanga. 14 Nga murahu u vhidze vharwa vhawe u vha ambadze zwi⁠ambaro.+ 15 U vha ḓodze u ya nga nḓila ye wa ḓodza ngayo khotsi avho,+ vha ḓo ntshumela sa vhotshifhe, ngauri vho ḓodzwa, mushumo wa vhotshifhe u ḓo vha wavho lini na lini, u bva kha muṅwe murafho u ya kha muṅwe murafho.”+

16 Mushe a ita zwoṱhe zwe Yehova a mu laya.+ A ita nga u ralo.

17 Nga zwenezwo, nga ṅwedzi wa u thoma nga ṅwaha wa vhuvhili nga ḓuvha ḽa u thoma ḽa ṅwedzi, dennde ḽikhethwa ḽa imiswa.+ 18 Musi Mushe a tshi imisa dennde ḽikhethwa, a vhea milenzhe+ yaḽo fhasi, a imisa fureme dza mabulannga,+ a dzhenisa na mbalelo+ a imisa na phuphu dzaḽo. 19 Ngauralo, a kapea malabi+ nṱha ha dennde ḽikhethwa a ḽi tibedza ngao,+ sa zwe Yehova a laya Mushe.

20 Nga murahu a dzhia mbaba dza matombo dza Vhuṱanzi+ a dzi vhea nga ngomu ha Mbulungelo+ a dzhenisa na dzithanda+ kha Mbulungelo a tiba Mbulungelo+ nga mutibo.+ 21 A dzhenisa Mbulungelo nga ngomu ha dennde ḽikhethwa, a vhea khetheni+ ḽa u vala mbulungelo ya mulanga,*+ sa zwe Yehova a laya Mushe.

22 A dovha a vhea na ṱafula+ thungo ya devhula ha dennde ḽikhethwa ḽa muṱangano nga nnḓa ha khetheni, 23 a ṱhopha vhurotho+ khaḽo phanḓa ha Yehova, sa zwe Yehova a laya Mushe.

24 A vhea tshiṱomambone+ thungo ya tshipembe ha dennde ḽikhethwa ḽa muṱangano phanḓa ha ṱafula. 25 A funga mbone+ phanḓa ha Yehova, sa zwe Yehova a laya Mushe.

26 A dovha a vhea aḽeṱare+ ya musuku denndeni ḽa muṱangano phanḓa ha khetheni, 27 u itela u dubisa zwioro+ zwi nukhelelaho khayo,+ sa zwe Yehova a laya Mushe.

28 Mafheleloni a vala muṋango wa dennde ḽikhethwa nga labi.*+

29 A vhea aḽeṱare ya tshifhiwa tsha u fhiswa+ muṋangoni wa dennde ḽikhethwa ḽa muṱangano, uri a ṋekedze tshifhiwa tsha u fhiswa+ na tshifhiwa tsha thoro, sa zwe Yehova a laya Mushe.

30 Nga murahu ha zwenezwo, a vhea sambelo vhukati ha dennde ḽa muṱangano na aḽeṱare a shela maḓi a u ṱamba khaḽo.+ 31 Mushe na Aroni na vharwa vhawe vha ṱamba zwanḓa zwavho na milenzhe yavho henefho. 32 Tshifhinga tshoṱhe musi vha tshi dzhena denndeni ḽa muṱangano kana vha tshi ya aḽeṱareni vho vha vha tshi ṱamba,+ sa zwe Yehova a laya Mushe.

33 Mafheleloni a ita muṱa+ u mona na dennde ḽikhethwa na aḽeṱare a vhea labi* muṋangoni wa muṱa.+

Ngauralo, Mushe a fhedza mushumo. 34 Gole ḽa tiba dennde ḽikhethwa ḽa muṱangano, vhugala ha Yehova ha ḽi ḓadza.+ 35 Mushe ho ngo kona u dzhena denndeni ḽikhethwa ḽa muṱangano ngauri ḽo vha ḽo tibedzwa nga gole, vhugala ha Yehova ho ḽi ḓadza.+

36 Musi gole ḽi tshi takuwa kha dennde ḽikhethwa Vhaisiraele vho vha vha tshi takuwa kha lwendo lwavho lwoṱhe.+ 37 Naho zwo ralo, arali gole ḽi sa takuwi, vho vha vha sa tshimbili u vhuya u swika ḽi tshi takuwa.+ 38 Ho vha hu tshi vha na gole ḽa Yehova nga masiari, nga madekwana hu tshi vha na mulilo, zwo vha zwi tshi vhonwa nga vhoṱhe vha nnḓu ya Isiraele tshifhingani tsha lwendo lwavho lwoṱhe.+