Numeri

3 Heyi yo vha i miṱa* ya Aroni na Mushe nga tshifhinga tshee Yehova a amba na Mushe ngei Thavhani ya Sinai.+ 2 Madzina a vharwa vha Aroni ndi haya: wa tanzhe o vha e Nadaba, ha tevhela Abihu,+ Eliasara+ na Ithamara.+ 3 Eneo o vha e madzina a vharwa vha Aroni, vhotshifhe vho ḓodzwaho vhe vha vhewa uri vha vhe vhotshifhe.+ 4 Naho zwo ralo, Nadaba na Abihu vho fa phanḓa ha Yehova musi vha tshi ṋekedza Yehova+ mulilo u songo tendelwaho sogani ḽa Sinai, vho vha vha si na vhana. Fhedzi Eliasara+ na Ithamara+ vha bvela phanḓa vha tshi shuma sa vhotshifhe khathihi na khotsi avho Aroni.

5 Yehova a amba na Mushe a ri: 6 “Ḓisa vha lushaka lwa Levi,+ u vha imise phanḓa ha tshifhe Aroni uri vha mu shumele.+ 7 Vha mu itele mishumo i tshimbidzanaho na dennde ḽikhethwa* ḽa muṱangano, vha i itele na tshitshavha tshoṱhe. 8 Vha ṱhogomele zwishumiswa+ zwoṱhe zwi re denndeni ḽikhethwa ḽa muṱangano na u itela Vhaisiraele mishumo i tshimbidzanaho na ḽeneḽo dennde ḽikhethwa.+ 9 U kumedze Vhalevi kha Aroni na vharwa vhawe. Ndi vhone vhe vha kumedzwa khavho vha tshi bva kha Vhaisiraele.+ 10 U nange Aroni na vharwa vhawe uri vha shume mushumo wavho wa vhotshifhe,+ muthu naho e ufhio ane a si fanelee* ane a sendela tsini a vhulawe.”+

11 Yehova a bvela phanḓa a tshi amba na Mushe a ri: 12 “Nṋe ndi ḓo nanga Vhalevi kha Vhaisiraele vhudzuloni ha matanzhe oṱhe a Vhaisiraele,+ Vhalevi vha ḓo vha vhanga. 13 Tanzhe ḽiṅwe na ḽiṅwe ndi ḽanga.+ Nga ḓuvha ḽe nda vhulaya matanzhe oṱhe a shangoni ḽa Egipita+ ndo ḓinangela tanzhe ḽiṅwe na ḽiṅwe ḽa Isiraele u bva kha ḽa muthu u swika kha ḽa tshifuwo.+ Oṱhe a ḓo vha anga. Ndi nṋe Yehova.”

14 Yehova o dovha a amba na Mushe e ngei sogani ḽa Sinai+ a ri: 15 “Ṅwalisa vharwa vha Levi u ya nga miṱa ya vhokhotsi avho. U ṅwalise muṅwe na muṅwe wa tshinnani wa ṅwedzi muthihi u ya nṱha.”+ 16 Mushe a vha ṅwalisa sa zwe a laedzwa nga Yehova. 17 Madzina a vharwa vha Levi ndi haya: Gerisoni, Kehati na Merari.+

18 Madzina a vharwa vha Gerisoni u ya nga miṱa yavho ndi haya: Libini na Shimei.+

19 Vharwa vha Kehati u ya nga miṱa yavho vho vha vhe Amuramu, Isara, Heburoni na Usiele.+

20 Vharwa vha Merari u ya nga miṱa yavho vho vha vhe Mahali+ na Mushi.+

Yo vha i yone miṱa ya Vhalevi u ya nga miṱa ya vhokhotsi avho.

21 Kha Gerisoni ho bva muṱa wa Vhalibini+ na muṱa wa Vhashimei. Yo vha i yone miṱa ya Vhagerisoni. 22 Vhanna vhoṱhe vho ṅwaliswaho vho vha vhe 7 500,+ u bva kha vhatukana vha re na ṅwedzi muthihi u ya nṱha. 23 Miṱa ya Vhagerisoni yo vha yo atha madennde murahu ha dennde ḽikhethwa*+ thungo ya vhukovhela. 24 Murangaphanḓa wa nnḓu ya khotsi a Vhagerisoni o vha e Eliasafu murwa wa Laele. 25 Vhuḓifhinduleli ha vharwa vha Gerisoni+ denndeni ḽikhethwa ḽa muṱangano,+ ho vha hu u ṱhogomela dennde ḽone ḽine, ṱhanga yaḽo,+ labi*+ ḽa u vala muṋangoni waḽo, 26 makhetheni+ o nembelelaho muṱani, khetheni ḽa u vala+ muṋango wa muṱa wa dennde ḽikhethwa, aḽeṱare, thambo dza dennde na mishumo yoṱhe i tshimbidzanaho na zwenezwo.

27 Kha Kehati ho bva muṱa wa Vhaamuramu, muṱa wa Vhaisara, muṱa wa Vhaheburoni, na muṱa wa Vhausiele. Yeneyi yo vha i miṱa ya Vhakehati.+ 28 Vhanna vhoṱhe vho ṅwalisaho vho vha vhe 8 600, u bva kha vhatukana vha re na ṅwedzi muthihi u ya nṱha; vho vha vhe na vhuḓifhinduleli ha u ṱhogomela fhethu hukhethwa.+ 29 Miṱa ya vharwa vha Kehati yo vha yo atha madennde thungo ya tshipembe ha dennde ḽikhethwa.+ 30 Murangaphanḓa wa nnḓu ya vhokhotsi a Vhakehati o vha e Elitsafani murwa wa Usiele.+ 31 Vhuḓifhinduleli havho ho vha hu ha u ṱhogomela Mbulungelo,+ ṱafula,+ tshiṱomambone,+ dziaḽeṱare,+ thundu+ dzine dza shumiswa fhethu hukhethwa, labi*+ na mishumo yoṱhe i tshimbidzanaho na zwenezwo.+

32 Murangaphanḓa wa Vhalevi o vha e Eliasara+ murwa wa tshifhe Aroni, we a vha a tshi lavhelesa vha ṱhogomelaho fhethu hukhethwa.

33 Kha Merari ho bva muṱa wa Vhamahali na muṱa wa Vhamushi. Yeneyo yo vha i miṱa ya Merari.+ 34 Vhanna vhoṱhe vho ṅwalisaho vho vha vhe 6 200,+ u bva kha vhatukana vha re na ṅwedzi muthihi u ya nṱha. 35 Murangaphanḓa wa miṱa ya vhokhotsi a Merari o vha e Tsuriele murwa wa Abihaili. Vho vha vho atha madennde thungo ya devhula ha dennde ḽikhethwa.+ 36 Vharwa vha Merari vho vha vhe na vhuḓifhinduleli ha u ṱhogomela fureme+ dza dennde ḽikhethwa, mbalelo dzaḽo,+ phuphu dzaḽo,+ thikho dzaḽo, thundu dzaḽo dzoṱhe+ na mishumo yoṱhe i tshimbidzanaho na zwenezwo,+ 37 phuphu dze dza vha dzo mona na muṱa, milenzhe yadzo,+ tsimbi dzadzo dza u ṱoma dennde na thambo dzadzo.

38 Vhe vha atha madennde phanḓa ha dennde ḽikhethwa ḽa muṱangano thungo ya vhubvaḓuvha, vho vha vhe Mushe na Aroni na vharwa vhavho. Vhuḓifhinduleli havho ho vha hu u ṱhogomela nnḓu khethwa, sa vhuḓifhinduleli havho ha u shumela Vhaisiraele. Ane a si fanelee* ane a sendela tsini o vha a tshi ḓo vhulawa.+

39 Vhanna vhoṱhe vha Vhalevi u bva kha vhatukana vha re na ṅwedzi muthihi u ya nṱha, vhe Mushe na Aroni vha vha ṅwalisa u ya nga miṱa yavho sa zwe vha laedzwa nga Yehova, vho vha vhe 22 000.

40 Yehova a amba na Mushe a ri: “Ṅwalisa vhanna vhoṱhe vha matanzhe a Vhaisiraele, u bva kha vhatukana vha re na ṅwedzi muthihi u ya nṱha,+ u a vhale, u ite mutevhe wa madzina ao. 41 U nnangele Vhalevi vhudzuloni ha matanzhe oṱhe a Vhaisiraele,+ zwifuwo zwa Vhalevi vhudzuloni ha matanzhe oṱhe a zwifuwo zwa Vhaisiraele.+ Ndi nṋe Yehova.” 42 Mushe a ṅwalisa matanzhe oṱhe a Isiraele sa zwe Yehova a mu laedza. 43 Tshivhalo tsha vhanna vhoṱhe vha matanzhe vhe vha ṅwaliswa u ya nga madzina avho u bva kha vhatukana vha re na ṅwedzi muthihi u ya nṱha, tsho vha tshi 22 273.

44 Yehova a bvela phanḓa a tshi amba na Mushe a ri: 45 “Dzhia Vhalevi vhudzuloni ha matanzhe oṱhe a Isiraele, u dzhie na zwifuwo zwa Vhalevi vhudzuloni ha zwifuwo zwavho, Vhalevi vha tea u vha vhanga. Ndi nṋe Yehova. 46 Sa mutengo wa u rengulula+ matanzhe a 273 a Vhaisiraele ane a fhira tshivhalo tsha Vhalevi,+ 47 u kuvhanganye shekele* ṱhanu kha tanzhe ḽiṅwe na ḽiṅwe,+ u ya nga nḓila ine ha kalwa ngayo tshileme tsha shekele fhethu hukhethwa. Shekele nthihi ndi gera* dza 20.+ 48 U ṋee Aroni na vharwa vhawe tshelede ya u rengulula vhe vha fhira tshivhalo tshavho.” 49 Mushe a dzhia tshelede ya u rengulula matanzhe a Vhaisiraele e a salela kha e a rengululwa nga Vhalevi. 50 A kuvhanganya yeneyo tshelede kha matanzhe a Vhaisiraele, ine ya vha shekele dza 1 365, u ya nga nḓila ine ha kalwa ngayo tshileme tsha shekele fhethu hukhethwa. 51 Mushe a ṋea Aroni na vharwa vhawe tshelede ya tshirengululi u ya nga zwe Yehova a amba, sa zwe Yehova a laedza Mushe.