Kha Vhahevheru
7 Ngauri onoyo Melkizedeke, khosi ya Salema, tshifhe wa Mudzimu Wa-Ṱaḓulu-ṱaḓulu, o ṱanganedza Abrahamu musi a tshi bva u vhulaya mahosi, a mu fhaṱutshedza,+ 2 Abrahamu a mu ṋea* tshafumi kha zwoṱhe. Dzina ḽa Melkizedeke ḽi amba uri “Khosi ya U Luga.” Melkizedeke u dovha a vha khosi ya Salema, zwine zwa amba uri “Khosi ya Mulalo.” 3 Khotsi awe na mme awe na lushaka lune a bva khalwo a zwi ḓivhei, a hu ḓivhei na ḓuvha ḽe a bebwa na u fa ngaḽo, fhedzi u dzula e tshifhe u ya nga hu sa fheli ngauri o itwa uri a fane na Murwa wa Mudzimu.+
4 Onoyo munna o vha e wa ndeme vhukuma lwe na Abrahamu ṱhoho ya muṱa,* a mu ṋea tshafumi kha zwa khwine-khwine zwe a thuba.+ 5 Ndi ngoho uri Mulayo u amba uri vhane vha bva kha vharwa vha Levi,+ vho nangiwaho uri vha vhe vhotshifhe, vha tea u kuvhanganya tshafumi kha vhathu,+ naho vhe vhahavho, vhe vhaḓuhulu vha Abrahamu. 6 Fhedzi onoyo munna we a vha a sa bvi kha lushaka lwavho o ṱanganedza tshafumi tshi bvaho kha Abrahamu, a fhaṱutshedza we a vha o fhulufhedziswa.+ 7 A hu na ane a nga hanedza uri ane a fhaṱutshedza u fhira ane a fhaṱutshedzwa. 8 Vhalevi vho wanaho tshafumi vha a fa, fhedzi Melkizedeke o wana tshafumi. Maṅwalo o khwaṱhisedza uri u a tshila.+ 9 Hu nga ambiwa uri na Levi we a wana tshafumi, na ene o bvisa tshafumi nga Abrahamu, 10 ngauri o vha a tshi kha ḓi vha kha* makhulukuku wawe Abrahamu musi a tshi ṱangana na Melkizedeke.+
11 Arali mushumo wa vhotshifhe vha Vhalevi wo vha u tshi ḓo ita uri vhathu vha si vhe na tshivhi,+ (ngauri zwo vha zwi tshi katelwa kha Mulayo we wa vha wo ṋewa vhathu), ho vha hu si tsha ḓo ṱoḓea muṅwe tshifhe we ha ambiwa uri u ḓo vhewa nga maitele a Melkizedeke,+ hu si nga maitele a Aroni. 12 Arali ha shandulwa mushumo wa vhotshifhe, na Mulayo u tea u shandulwa.+ 13 Ngauri munna we zwenezwi zwithu zwa ambiwa nga hae ndi wa luṅwe lushaka, lu si na ane a shuma kha aḽeṱare.+ 14 Zwi tou vha khagala uri Murena washu u bva Yuda,+ fhedzi Mushe ho ngo amba tshithu nga ha vhotshifhe vha bvaho kha lwonolwo lushaka.
15 Zwenezwi zwi vhonala zwavhuḓi musi hu tshi vha na muṅwe tshifhe+ ane a fana na Melkizedeke,+ 16 we a vha tshifhe ngauri u na maanḓa ane a ita uri a vhe na vhutshilo vhu sa fheli,+ hu si nga lushaka lune muthu a bva khalwo sa zwine zwa ṱoḓiwa nga Mulayo. 17 Ngauri ho khwaṱhisedzwa nga hae ha pfi: “U tshifhe wa lini na lini nga maitele a Melkizedeke.”+
18 Milayo ya kale yo fheliswa ngauri a i tshee na maanḓa, a i tsha vhuyedza.+ 19 Ngauri Mulayo a wo ngo khunyeledza zwoṱhe zwe Mudzimu a vha a tshi zwi ṱoḓa,+ fhedzi Mudzimu o ri fhulufhedzisa zwa khwine,+ zwine zwa ri sendedza tsini nae.+ 20 Zwiṅwe hafhu, zwenezwi zwo itwa ho thoma ha aniwa 21 (ngauri hu na vhathu vho vhaho vho vhotshifhe hu songo itwa muano, fhedzi onoyu o vha tshifhe nge ha itwa muano nga Mudzimu we a mu vhudza uri: “Nṋe Yehova* ndo ana, a thi nga shanduli muhumbulo,* ‘U tshifhe wa lini na lini’”),+ 22 Yesu o khwaṱhisedza mulanga wa khwine.+ 23 Zwiṅwe hafhu, vhotshifhe a vho ngo kona u bvela phanḓa na mushumo wavho+ ngauri vho vha vha tshi fa, ndi ngazwo vho dzhielwa vhudzulo nga vhaṅwe uri mushumo u bvele phanḓa, 24 fhedzi a hu na ane a nga dzhiela Yesu vhudzulo sa tshifhe ngauri u tshila nga hu sa fheli.+ 25 Ndi ngazwo a tshi kona u tshidza tshoṱhe vhane vha sendela tsini na Mudzimu nga ene, ngauri u dzula a tshi tshila uri a vha pfumelele.+
26 Zwo tea uri ri vhe na onoyo tshifhe muhulu o huliswaho u fhira ḽiṱaḓulu,* ane a fhulufhedzea, a si na mulandu, a songo tshikafhadzwaho+ na a sa fani na vhaitazwivhi.+ 27 Ha fani na vhaṅwe vhotshifhe vhahulu ngauri a zwi ṱoḓei uri a ṋekedze zwiṱhavhelo ḓuvha ḽiṅwe na ḽiṅwe,+ a tshi itela ene muṋe na vhaṅwe vhathu,+ ngauri o ita zwenezwi luthihi nahone lwa tshoṱhe musi a tshi ḓiṋekedzela.+ 28 Ngauri Mulayo u vhea vhanna vha shayaho nungo uri vha vhe vhotshifhe vhahulu,+ fhedzi muano+ we wa itwa nga murahu ha Mulayo, u vhea Murwa, we a itwa o fhelelaho+ nga hu sa fheli.