Yobo
3 Iwe u dzula wo mu lavhelesa,
Wa mu isa tsengoni.+
4 Naa a re na tshivhi a nga beba a si na tshivhi?+
A zwi konadzei!
5 Arali maḓuvha awe o vhalwa,
Tshivhalo tsha miṅwedzi yawe tshi na iwe;
Wo mu vhetshela mukano uri a si u pfuke.+
6 Lavhelesa thungo uri a awele,
U swika a tshi fhedza mushumo wawe wa ḓuvha, u fana na o tholwaho.+
7 Ngauri na muri u na fhulufhelo.
Arali wa remiwa, u ḓo dovha wa simuwa,
Matavhi awo a ḓo bvela phanḓa a tshi mela.
8 Arali midzi yawo hu kale i mavuni
Tshiguthe tshawo tsha fa mavuni,
9 U ḓo simuwa musi u tshi tou wana maḓi;
Wa vha na matavhi sa muri une wa kha ḓi bva u ṱavhiwa.
10 Fhedzi muthu a fa, zwo fhela;
Musi muthu a tshi fa, u ngafhi?+
11 Maḓi a a xa lwanzheni,
Mulambo u a xa wa oma.
12 Muthu u a eḓela, a si vuwe.+
U swika ḽiṱaḓulu ḽi si tsheeho, a vha nga vuwi,
Kana u vuswa khofheni.+
13 Ngavhe u tshi mmbulunga Vhiḓani,*+
Ngavhe u tshi ndzumba u swika mbiti dzau dzi tshi dzika,
U mmbetshele ḓuvha ḽine wa ḓo nkhumbula ngaḽo!+
14 Arali muthu a fa, naa a nga dovha a tshila?+
Ndi ḓo lindela maḓuvha oṱhe a tshifhinga tshanga tsho vhewaho
U swika ndi tshi vhofhololwa.+
15 U ḓo vhidzelela, nṋe nda aravha.+
U ḓo ṱuvha mushumo wa zwanḓa zwau.
16 Fhedzi zwino u sedza hoṱhe hune nda kanda hone;
U sedza vhuvhi hanga fhedzi.
17 Vhutshinyi hanga wo vhu dzhenisa mukhwamani,
Wo shatela vhukhakhi hanga nga tshishateli.
18 U fana na thavha i tshi wa ya si tsha vha hone
Na tombo ḽi tshi piḓimuwa ḽa bva vhudzuloni haḽo,
19 U fana na musi maḓi a tshi kora matombo
Na mikumbela yao i tshi kumba mavu a kha ḽifhasi,
Wo tshinya fhulufhelo ḽa muthu.
20 U dzula u tshi mu kunda u swika a tshi fa;+
U mu tshinya tshifhaṱuwo tshawe lufuni, wa mu isa vhiḓani.
21 Vhana vhawe vha a huliswa, fhedzi ene ha zwi ḓivhi;
Vha a nyadziwa, fhedzi ene ha zwi ṱhogomeli.+
22 U pfa vhuṱungu muvhilini musi a tshi kha ḓi tshila;
U lila musi a tshi kha ḓi tshila.”