Kha Vhakolosa

1 Nṋe Paulo, muapostola wa Kristo Yesu nge Mudzimu a zwi funa, ndi na wahashu Timotheo,+ 2 ri ṅwalela vhakhethwa vhoṱhe na vhahashu vha fhulufhedzeaho vha re na vhuthihi na Kristo, vha re ngei Kolosa ri ri:

Ngavhe Mudzimu Khotsi ashu a tshi ni sumbedza vhuthu vhuhulu na u ita uri ni vhe na mulalo.

3 Ri livhuwa Mudzimu ane a vha Khotsi a Murena washu Yesu Kristo tshifhinga tshoṱhe ri tshi ni rabelela, 4 ngauri ro pfa uri ni tenda Kristo Yesu na uri ni funa vhakhethwa vhoṱhe, 5 ngauri no lindela phaṱhutshedzo dze na vhetshelwa ngei ṱaḓulu.+ No pfa nga ha dzenedzi phaṱhutshedzo musi ni tshi funzwa ngoho ine ya vha mafhungo maḓifha. 6 Eneo mafhungo maḓifha e a swika kha inwi a khou aṋwa mitshelo na u phaḓalala shangoni ḽoṱhe,+ na kha inwi a khou ita zwi fanaho, u bva nga ḓuvha ḽe na pfa na u ḓivha ngoho nga ha vhuthu vhuhulu ha Mudzimu. 7 No guda zwenezwi kha wahashu a funwaho Epafra,+ ane a vha mulanda u fana na riṋe, a shumelaho Kristo nga u fhulufhedzea a tshi itela riṋe. 8 O ri vhudza na nga ha lufuno lune na vha nalwo ni tshi thuswa nga muya wa Mudzimu.

9 Ndi ngazwo u bva nga ḓuvha ḽe ra zwi pfa, ri songo litsha u ni rabelela+ na u humbela uri ni ḓadzwe nga nḓivho yo teaho+ ya zwine a zwi funa nga vhuṱali hoṱhe na u zwi pfesesa ni tshi thuswa nga muya mukhethwa,+ 10 uri ni tshile nga nḓila i rendisaho Yehova,* uri ni kone u mu takadza nga vhuḓalo, ni ite mishumo mivhuya na u engedza nḓivho yo teaho nga ha Mudzimu.+ 11 Ri rabelela na uri Mudzimu a ni khwaṱhise a tshi shumisa maanḓa awe mahulu,+ uri ni konḓelele nga vhuḓalo ni sa fheli mbilu, no takala, 12 ni tshi livhuwa Khotsi we a ita uri ni kone u wana zwe a zwi fhulufhedzisa vhakhethwa+ vha re tshedzani.

13 O ri bvisa swiswini,*+ a ri isa muvhusoni wa Murwa wawe ane a mu funa, 14 ndi ene we a mu shumisa u ri rengulula vhupulini, zwine zwa vha u hangwelwa zwivhi zwashu.+ 15 Ndi ene tshifanyiso tsha Mudzimu a sa vhonali,+ tanzhe ḽa zwoṱhe zwo sikwaho;+ 16 ngauri ho shumiswa ene u sika zwoṱhe zwi re ṱaḓulu na kha ḽifhasi, zwithu zwi vhonalaho, zwi sa vhonali,+ vhavhusi, vhalangi, mivhuso na vha re na maanḓa. Zwenezwi zwoṱhe zwo vha hone hu tshi shumiswa ene,+ zwo sikelwa ene. 17 Zwiṅwe hafhu, o vha hone zwiṅwe zwithu zwoṱhe zwi sa athu u vha hone,+ zwiṅwe zwithu zwoṱhe zwo vha hone hu tshi shumiswa ene, 18 ndi ene ṱhoho ya muvhili, une wa vha tshivhidzo.+ Ndi ene wa u thoma, tanzhe ḽa vho vuswaho vhafuni,+ uri a vhe wa u thoma kha zwithu zwoṱhe; 19 ngauri Mudzimu o vha a tshi takalela uri a vhe o fhelelaho kha zwithu zwoṱhe,+ 20 na uri a ḓipfumedzanye na zwiṅwe zwithu zwoṱhe a tshi shumisa ene,+ hu sa londwi uri ndi zwa kha ḽifhasi kana ndi zwa ṱaḓulu. O ḓipfumedzanya a tshi shumisa malofha+ a Kristo o shululwaho kha danda.*

21 Kale no vha ni maswina a Mudzimu, ni kule nae, ngauri no vha ni tshi humbula zwithu zwivhi, 22 zwino o ni pfumedzanya nae nga muvhili wa onoyo we a fa, uri ni vhe vhakhethwa na vha sa solei na vha si na mulandu phanḓa hawe,+ 23 tenda na dzula ni na lutendo,+ no khwaṱha,+ ni sa dzinginyei,+ ni sa litshi fhulufhelo ḽa mafhungo maḓifha e na a pfa, e a ḓivhadzwa vhathu vhoṱhe shangoni ḽoṱhe.+ Nṋe Paulo ndo vhewa uri ndi a huwelele.+

24 Zwino ndi a takala musi ndi tshi tambudzelwa inwi.+ Ndo ḓiimisela u bvela phanḓa ndi tshi tambudzelwa muvhili wa Kristo+ une wa vha tshivhidzo.+ 25 Ndi shumela vhathu vha Mudzimu ngauri o mmbea uri ndi ite wonoyu mushumo,+ uri ni vhuyelwe. Ndi ngazwo ndi tshi huwelela ipfi ḽa Mudzimu nga hune nda nga kona ngaho, 26 uri ndi huwelele tshiphiri tshikhethwa,+ tshe tsha vha tshi sa ḓivhiwi nga shango*+ na nga mirafho yo fhiraho. Fhedzi zwino tsho dzumbululelwa vhakhethwa vhawe.+ 27 Mudzimu o takalela u vha ḓivhadza vhuhulu ha vhugala ha tshenetshi tshiphiri tshikhethwa+ vhukati ha dzitshaka, tshine tsha vha Kristo ane a vha na vhuthihi na inwi, zwine zwa amba uri ni na fhulufhelo ḽa u ṋewa vhugala nae.+ 28 Ri khou ḓivhadza nga ha Kristo, ri tshi ṱuṱuwedza na u funza vhoṱhe nga vhuṱali hoṱhe, uri vha mu ḓivhe, uri ri thuse vhoṱhe vha re na vhuthihi nae uri vha vhe na lutendo lwo khwaṱhaho, ri vha kumedzele kha Mudzimu.+ 29 Ndi ngazwo ndi tshi khou shuma vhukuma, ndi khou lwa vhukuma ndi tshi thuswa nga maanḓa ane a nṋea one.+