Genesi

21 Yehova a humbula Sara samusi o vha o amba, Yehova a itela Sara zwe a mu fhulufhedzisa.+ 2 Sara a vhifha muvhilini,+ a bebela Abrahamu we a vha o no vha mukalaha murwa nga tshifhinga tsho vhewaho tshe Mudzimu a mu fhulufhedzisa tshone.+ 3 Abrahamu a ira murwa wawe we a bebelwa nga Sara dzina ḽa Isaka.+ 4 Abrahamu a fumbisa Isaka murwa wawe musi e na maḓuvha a malo, u ya nga he Mudzimu a mu laedza ngaho.+ 5 Abrahamu o vha e na miṅwaha ya 100 musi Isaka murwa wawe a tshi bebwa. 6 Sara a ri: “Mudzimu o ita uri ndi see; ane a zwi pfa u ḓo sea na nṋe.”* 7 A dovha a ri: “Ndi nnyi we a vha a tshi nga amba na Abrahamu a ri: ‘Sara u ḓo mamisa ṅwana’? Naho zwo ralo, ndo mu bebela murwa musi o no kalaha.”

8 Onoyo ṅwana a aluwa, a litshiswa u mama, Abrahamu a ita tshimima tshihulu nga ḽeneḽo ḓuvha ḽe Isaka a litshiswa ngaḽo u mama. 9 Fhedzi Sara o vha a tshi dzulela u vhona murwa wa Hagara+ wa Muegipita we a mu bebela Abrahamu, a tshi khou goḓa Isaka.+ 10 Sara a amba na Abrahamu a ri: “Pandela hoyu mufumakadzi wa phuli na murwa wawe, ngauri murwa wawe ha nga ḓo vha muḽaifa na murwa wanga Isaka!”+ 11 Fhedzi zwe a zwi amba nga ha murwa wawe zwo ita uri Abrahamu a ṱungufhale zwihulu.+ 12 Mudzimu a amba na Abrahamu a ri: “U songo ṱungufhadzwa nga zwine Sara a zwi amba nga ha ṅwana wau na mufumakadzi wau wa phuli. Mu thetshelese, ngauri vhana* vhau vha ḓo bva kha Isaka.+ 13 Murwa wa mufumakadzi wa phuli+ na ene ndi ḓo ita uri khae hu bve lushaka+ ngauri na ene ndi ṅwana* wau.”

14 Ngauralo, Abrahamu a vuwa nga matsheloni-tsheloni a dzhia vhurotho na tshikumbu tsha mukumba tsha maḓi a zwi ṋea Hagara. A mu hwesa kha shaḓa, a mu ṱuwisa na ṅwana wawe.+ A ṱuwa a tendeleka sogani ḽa Beresaba.+ 15 Mafheleloni maḓi a re tshikumbuni tsha mukumba a fhela, a vhea ṅwana wawe fhasi ha tshiṅwe tshiṱaka. 16 A ya a dzula e eṱhe, fhethu hune hu tshi pfulwa musevhe wa swika, ngauri o ri: “A thi ṱoḓi u vhona ṅwananga a tshi fa.” Ngauralo, a dzula kulenyana a thoma u lila.

17 Nga zwenezwo, Mudzimu a pfa tshililo tsha mutukana,+ muruṅwa wa Mudzimu a vhidzelela Hagara e ṱaḓulu+ a ri: “Mulandu ndi mini Hagara? U songo ofha ngauri Mudzimu o pfa tshililo tsha mutukana henefho hune a vha hone. 18 Takuwa, u takule ṅwana wau ngauri ndi ḓo mu ita lushaka luhulu.”+ 19 Mudzimu a bonyolosa maṱo awe a vhona tshisima tsha maḓi; a ya a ḓadza tshikumbu tsha mukumba nga maḓi, a ṋea mutukana uri a nwe. 20 Mudzimu o vha e na onoyo mutukana+ musi a tshi khou aluwa. A dzula sogani a vha muzwimi. 21 A dzula sogani ḽa Pharani,+ mme awe a mu vhingela mufumakadzi a bvaho shangoni ḽa Egipita.

22 Nga tshenetsho tshifhinga, Abimeleke na Phikolo mulangammbi wawe muhulwane, vha amba na Abrahamu vha ri: “Mudzimu u na iwe kha zwoṱhe zwine wa zwi ita.+ 23 Zwino nnyanele nga Mudzimu uri a u nga ḓo mphura, nṋe na vhana vhanga na vhaḓuhulu vhanga na uri u ḓo ntsumbedza lufuno lu sa shanduki samusi na nṋe ndo u sumbedza lufuno lu sa shanduki shangoni ḽine wa khou dzula khaḽo.”+ 24 Abrahamu a ri: “Ndi a ana.”

25 Naho zwo ralo, Abrahamu a gungulela Abimeleke nga nṱhani ha tshisima tshe vhashumeli vha Abimeleke vha mu dzhiela tshone.+ 26 Abimeleke a fhindula a ri: “A thi ḓivhi uri ndi nnyi we a ita zwenezwi; na iwe a wo ngo mmbudza nga hazwo, ndi hone ndi tshi khou thoma u zwi pfa ṋamusi.” 27 Ndi hone Abrahamu a tshi dzhia nngu na kholomo a zwi ṋea Abimeleke, vhuvhili havho vha vhofha mulanga. 28 Musi Abrahamu a tshi bvisa ngwana dza tsadzi dza sumbe kha sambi ḽawe, 29 Abimeleke a amba na Abrahamu a ri: “Ndi ngani wo khethela thungo dzenedzo ngwana dza tsadzi dza sumbe?” 30 Ngauralo, Abrahamu a ri: “Ṱanganedza ngwana dza tsadzi dza sumbe dzi bvaho kha nṋe uri zwi vhe vhuṱanzi ha uri ndi nṋe ndo bwaho hetshi tshisima.” 31 Ndi ngazwo o vhidza henefho fhethu uri ndi Beresaba*+ ngauri ndi henefho he vhuvhili havho vha anelana. 32 Vha vhofha mulanga+ henefho Beresaba, nga murahu Abimeleke na Phikolo mulangammbi wawe muhulwane, vha humela shangoni ḽa Vhafilisita.+ 33 Nga murahu ha zwenezwo, Abrahamu a ṱavha muri wa mutamarisiki* henefho Beresaba, a renda dzina ḽa Yehova,+ Mudzimu wa lini na lini.+ 34 Abrahamu a dzula* shangoni ḽa Vhafilisita tshifhinga tshilapfu.+