Vhurifhi Ha U Thoma Vhu Yaho Kha Timotheo
3 Haya mafhungo ndi a ngoho: Munna ane a ṱoḓa u vha mulavhelesi,+ o tama mushumo wavhuḓi. 2 Mulavhelesi u fanela u vha a sa solei, e munna a re na mufumakadzi muthihi, a tshi linganyisela, o tsha muhumbuloni,+ o dzudzanyea, a tshi ṱanganedza vhaeni,+ a tshi kona u funza,+ 3 a songo vha e tshidakwa,+ a tshi ita zwa khakhathi, fhedzi u fanela u vha a tshi humbulela,+ a sa iti zwa dzinndwa,+ a sa funi tshelede,+ 4 a vhe a tshi kona u langa vha muṱa wawe nga nḓila yavhuḓi, vhana vhawe vha vhe vhane vha ḓiṱukufhadza, vha sa dzhieli zwithu fhasi+ 5 (arali a sa koni u langa vha muṱa wawe, a nga ṱhogomela hani tshivhidzo tsha Mudzimu?), 6 a songo vha a tshi kha ḓi bva u vha mutendi,+ uri a sa ḓikukumuse, a haṱulwa nga nḓila ye Diabolo a haṱulwa ngayo. 7 Zwiṅwe hafhu, u fanela u vha a tshi ambiwa zwavhuḓi* nga vhane vha si vhe vhatendi,+ uri a si nyadziwe, a wela kha tshikwekwe tsha Diabolo.
8 Na vhashumeli vha fanela u dzhiela zwithu nṱha, vha songo zwifha,* vha songo nwesa waini, vha songo vha vha tshi funa tshelede na u ṱoḓa u ḓivhuyedza,+ 9 vha farelele kha tshiphiri tshikhethwa tshine vha tshi tenda nga luvalo lwo kunaho.+
10 Zwiṅwe hafhu, ni thome ni vha linge, ni vhone arali vha tshi fanelea; arali vha sa solei, vha nga kona u vha vhashumeli.+
11 Na vhafumakadzi vha fanela u dzhiela zwithu nṱha, vha songo tshinya vhaṅwe dzina,+ fhedzi vha fanela u linganyisela na u fhulufhedzea kha zwithu zwoṱhe.+
12 Mushumeli u fanela u vha munna a re na mufumakadzi muthihi, ane a langa vhana na muṱa wawe nga nḓila yavhuḓi. 13 Ngauri vhanna vhane vha shuma zwavhuḓi vha ḓiitela dzina ḽavhuḓi, vha kona u amba vho vhofholowa nga ha u tenda Kristo Yesu.
14 Ndi u ṅwalela zwenezwi zwithu, ndi tshi fhulufhela uri ndi ḓo ḓa kha iwe hu si kale, 15 arali nda lenga, u vhe u tshi ḓivha nḓila ine wa tea u ḓifara ngayo nḓuni ya Mudzimu,+ ine ya vha tshivhidzo tsha Mudzimu a tshilaho, phuphu na thikho ya ngoho. 16 Ndi ngoho uri tshiphiri tshikhethwa tsha u ḓikumedzela kha Mudzimu ndi tsha ndeme vhukuma: ‘Yesu o vha muthu,+ Mudzimu a mu ita o lugaho musi a tshi ita uri a dovhe a vhe na tshivhumbeo tsha muya,+ o ya kha vharuṅwa,+ ha huwelelwa nga hae kha dzitshaka,+ a tendiwa nga vha re shangoni,+ a ṱanganedzwa ṱaḓulu a ṋewa vhugala.’