Daniele

6 Dario o vhona zwo tea uri a vhee magota a 120 muvhusoni wawe woṱhe.+ 2 Khosi Dario a vhea vhaḓinḓa vhahulwane vhararu uri vha lavhelese mushumo wa magota+ uri a si xelelwe. Daniele+ o vha e muṅwe wa vhenevho vhararu. 3 Ngauri Daniele o vha o ṱalifha nga maanḓa,+ a tshi fhira vhaṅwe vhaḓinḓa vhahulwane na magota, khosi i tshi ṱoḓa uri a vhe ene muhulwane kha muvhuso woṱhe.

4 Nga tshenetsho tshifhinga vhaḓinḓa vhahulwane na magota vho lingedza u wana zwine vha nga vhona Daniele mulandu ngazwo kha mushumo une a u ita, fhedzi vho wana e si na mulandu a tshi fhulufhedzea, ngauri o vha a tshi fhulufhedzea kha zwoṱhe. 5 Vhenevho vhanna vha ri: “Ri nga si wane tshithu na tshithihi tsha u pomoka Daniele, nga nnḓa ha musi ro wana tshine tsha nga lwisana na mulayo wa Mudzimu wawe.”+

6 Vhenevha vhaḓinḓa vhahulwane na magota vha ya vhe tshigwada kha khosi, vha amba nayo vha ri: “Ngavhe thovhela Dario a tshi tshila tshoṱhe. 7 Vhaḓinḓa vhoṱhe vha musanda, vhaḓinḓa, magota, vhaḓinḓa vhahulwane vha musanda na vhavhusi vho ambedzana uri hu vhe na mulayo wa musanda une wa thivhela muthu uri a si rabele muṅwe mudzimu kana muthu lwa maḓuvha a 30 nga nnḓa ha u rabela iwe thovhela, ane a si tevhedze wonoyo mulayo u ḓo poswa dindini ḽa ndau.+ 8 Iwe thovhela, vhea wonoyu mulayo u u saine,+ uri u si shandulwe, ngauri mulayo wa Vhameda na Vhaperesia a u shandulwi.”+

9 Khosi Dario a saina wonoyo mulayo.

10 Musi Daniele o no pfa uri ho sainiwa wonoyo mulayo, a ya nḓuni yawe ye ya vha i na mafasiṱere o vuleaho o lavhelesaho Yerusalema.+ A gwadama, a rabela, a renda Mudzimu luraru nga ḓuvha sa zwe a vha a tshi zwi ita musi hu sa athu u vhewa wonoyo mulayo. 11 Nga tshenetsho tshifhinga vhenevho vhanna vha dzhena, vha wana Daniele a tshi khou rabela na u humbela u khathutshelwa nga Mudzimu wawe.

12 Nga zwenezwo vha ya kha khosi, vha i humbudza nga ha wonoyo mulayo wa musanda, vha ri: “Naa a wo ngo saina mulayo wa uri hu songo vha na muthu ane a rabela muṅwe mudzimu kana muthu lwa maḓuvha a 30 nga nnḓa ha u rabela iwe thovhela na uri ane a si tevhedze wonoyo mulayo a poswe dindini ḽa ndau?” Khosi ya fhindula ya ri: “Wonoyo mulayo wo vhewa u ya nga mulayo wa Vhameda na Vhaperesia u sa shandulwi.”+ 13 Vha ṱavhanya vha fhindula khosi vha ri: “Daniele muṅwe wa mathubwa a bvaho Yuda,+ ho ngo ṱhonifha iwe thovhela kana u tevhedza mulayo we wa u saina, nṱhani hazwo u khou rabela luraru nga ḓuvha.”+ 14 Musi khosi i tshi tou pfa zwenezwo, ya tsikeledzea nga maanḓa, ya lingedza u humbula nḓila ine ya nga tshidza ngayo Daniele; ya lingedza nga nḓila dzoṱhe u ita zwenezwi u swika ḓuvha ḽi tshi kovhela. 15 Vhenevho vhanna vha fhedzisela vho ya kha khosi, vha ri: “Iwe thovhela, humbula uri mulayo wa Vhameda na Vhaperesia wo vhewaho nga khosi a u shandulwi.”+

16 Khosi ya ri hu ḓiswe Daniele a poswe dindini ḽa ndau.+ Khosi ya amba na Daniele ya ri: “Mudzimu wau ane wa mu shumela misi yoṱhe u ḓo u tshidza.” 17 Ha ḓiswa tombo ḽa u vala dindi, khosi ya ita luswayo khaḽo nga rinngi yayo ya u swaya na nga rinngi ya vhaḓivhalea vhayo, uri hu si vhe na tshithihi tshine tsha shandulwa nga ha mafhungo a Daniele.

18 Khosi ya vhuyelela pfamoni yayo. Ya fhedza vhusiku hoṱhe i tshi khou ḓidzima zwiḽiwa na u hana u mvumvusiwa,* yo vha i sa koni u eḓela.* 19 Khosi ya vuwa ya gidimela dindini ḽa ndau nga maḓautsha. 20 Musi khosi i tshi swika tsini na dindi, ya vhidzelela Daniele yo ṱungufhala. Ya vhudzisa ya ri: “Iwe Daniele mushumeli wa Mudzimu a tshilaho, naa Mudzimu ane wa mu shumela misi yoṱhe o kona u u tshidza kha ndau?” 21 Daniele a ṱavhanya a fhindula khosi, a ri: “Iwe thovhela, ngavhe u tshi tshila tshoṱhe. 22 Mudzimu wanga o ruma muruṅwa wawe a ḓa a vala milomo ya ndau,+ a dzo ngo nkhuvhadza,+ ngauri ndo vha ndi si na mulandu phanḓa ha Mudzimu; a hu na tshe nda khakhela iwe thovhela ngatsho.”

23 Khosi ya takala nga maanḓa, ya amba uri Daniele a bviswe dindini. Daniele a bviswa dindini, a wanala a songo huvhala na luthihi, ngauri o vha o fhulufhela Mudzimu wawe.+

24 Khosi ya amba uri vhanna vhe vha pomoka* Daniele vha ḓiswe vha poswe dindini ḽa ndau na vharwa vhavho na vhafumakadzi vhavho. Vha sa athu u swika fhasi dindini ndau dza vha gavha dza kwashekanya marambo avho oṱhe.+

25 Khosi Dario o ṅwalela vhathu vhoṱhe, vha tshaka na nyambo dzo fhambanaho ḽifhasini ḽoṱhe a ri:+ “Ngavhe ni tshi vha na mulalo munzhi! 26 Ndi khou vhea mulayo huṅwe na huṅwe hu re nga fhasi ha muvhuso wanga, vhathu vha fanela u ofha na u ṱhonifha Mudzimu wa Daniele.+ Ngauri ndi Mudzimu a tshilaho, ane a dzula e hone lini na lini. Muvhuso wawe a u nga ḓo vhuya wa fheliswa na vhuhosi* hawe ndi ha tshoṱhe.+ 27 U a tshidza,+ a lamulela na u ita zwiga na zwithu zwi mangadzaho ṱaḓulu na kha ḽifhasi,+ ngauri o tshidza Daniele kha ṋala dza ndau.”

28 Ngauralo, Daniele zwo mu tshimbilela muvhusoni wa Dario+ na muvhusoni wa Korese wa Muperesia.+